Táre-woo-ŋa 2
2
Zɛŋ núu a zɔlɔ ƃô táre sui
1Ńoŋ, zɛŋ ŋa nɛ̀ yâi, gɛ́. Ífe wɔ́lɔ nìa m̀ɛni-ŋai dîa ŋá mò yâ a gɛɛ í gɛi. 2Íwoli tɔ́ɔ dáre-woo-ŋai dîa. Kɔ́ í díŋa káa. 3Ɣâla kpera fé a gɛɛ é kili-ŋa pôno tɛɛ ípɔ da mɛni-ŋa káa. 4Gɔ́ri a gbanaŋɔɔ yɛ̂ɛ berei nûa da káne kɔ̀ri lai, kpaa máŋ yɛ̂ɛ diai da tɔɔ-sãa sɔ̃ɔ kpanaŋɔɔ kɔ̀ri nyii gáa loo-perei. 5À kɛ̀ ƃà gɛ̀ tí, gɛ̀ ní ƃa pâi Ɣâla Yâwɛɛ ŋɔyao-maai ŋá kâai, í ŋɔ́nɔ táre m̀aa mɛ̂ni su. 6Ɣâla Yâwɛɛ ƃa táre tɛ̀ɛ. Ǹyaa ƃé sɛŋ kɔ́lɔŋɔɔ da mɛni ŋá-kaa a kûla ǹyêei. 7A kpɔŋ diai dîa dítûa-pere sãai, gɛ́ dɔ̃yâ-ƃelai maa kɔ̃ɔ. 8A diai mɛi kâa da tûa sãa kɛ̀ a nûa da kpɛ́nii, gɛ́ diai mɛi kâa da díkpîŋ tɛ̀ɛ bɔ́i.
9Ƃà íwoli tɔ̀ɔ ḿâ, gɛ̀ ní ƃa pâi táre kɔ́lɔnîi, teniŋ ƃô-laa, tɔ̃yâ-tua kɛ́ɛ da núu kélee mɛni siɣeɛ a bɔriɛɛ. 10Táre a pâi kɛ̂i íŋuŋ su, mɛni ŋá-kaa é lii-nɛ̃ɛ tɛɛ ípɔ. 11Í mɛni kpɛtɛɛi lɛ́lɛɛi a pâi ímɛi kâai, mɛni ŋá-kaa é ímaa kɔ̃ɔ. 12Táre a pâi íkulâi mɛni nyɔ́mɔɔ maa pere su da ǹúu pɛlɛ-ƃelai dínuu pɛlɛ-woo-ŋai. 13Ǹûai ŋí dí gwaa-ponoɔi ŋɔpere-sãai lɛ̀ɛ, dí gbínii ŋɔperei síɣe sɔnyɔ̂ŋ kɛ́ mɛni ma. 14Ǹûai ŋí da lii-nɛ̃ɛ kùla mɛni nyɔ́mɔɔ kɛ́ɛ su da wôya-tua kɛ́ɛ. 15Dítûa-pere fé sã́a ní. Da tûa a wôya-pere.
16Táre a pâi íkulâi núu da kpɛ́ni ŋɔnɛnî yêei, nyii a kɔ̂ a gɛɛ é ǹyée láa yâ a la-nɛ̃ɛ-maa wooi, 17nyii a bôlu tɔ̀ɔ ŋɔsurɔ̂ŋ ma, é nia ŋɔkono-tee-wooi ma è gɛ̀ Ɣâla ŋɛ́i-tuɛi. 18À kɛ̀ ƃà lɔ̀ ŋɔpɛ́rɛi mu, gɛ̀ ní íkaa saa kɔ̂rii. À kɛ̀ ƃà lì naa, gɛ̀ ní ƃa saa táa pere siɣe. 19Diai kélee da ǹaa kaai, dífa pà pôlu. Dífe pâi wɔ́lɔ pâi pôlu fúlu-laa ŋɔperei ma. 20Ya pìlaŋ táre pôlu, a pâi gɛ̂i ílɛɛ dɔ̃yâ-ƃelai díperei ma, í sía a pere sã́a. 21Kpɛ́ni fêi, ǹɔii a pâi kɛ̂i a ǹúu sãa-ŋai pɔ́ɔ, dɔ̃yâ-ƃelai dí sée naa. 22Kɛ́lɛ Ɣâla a pâi ŋ̀wana-lɔ̂ɔ-ƃelai kpɛ̂i ǹɔii ma, é zɔnyɔ̂ŋ-ƃelai kúla yɛ̂ɛ kala.
Currently Selected:
Táre-woo-ŋa 2: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia