Wule-ŋa Kélee Mɛi Wûle 8
8
1Îi kɛ̀ yɛ̂ɛ ŋálee-kaa saaƃɔlɔ kpîŋ,
ƃɛ́i kélee kwa yá kûi kòyaŋ naai,
ŋâi kpùlɔŋ yâ, ŋá ńa-gbɔ sèe yâ,
ǹyaŋ núu da fêi mò ḿâ a gɛɛ ŋa mɛni nyɔ́mɔɔ kɛ́.
2Ŋ́âi pà liî a yá ńee ŋɔpɛ́rɛi lá,
í wɛli kɛ́-maa lɛ́ ḿâ,
ŋá ŋwã̂ai sumoɔ́ɔ tɛ́ɛ ípɔ
da pɔmegurane-ya líyeŋɔɔ í gbèle.
3Íkɔɔ-yee lɔ́ ŋuŋ ḿû,
í ílaa-mii yêe kpíniŋ a ńyãa.
4Zerusâlɛŋ nɛyaa, ka káfoo ńyêei
a gɛɛ káfe pâi kúwôlii karâi tãi kwa kɛ̂ lâa-ni lai, é lɛ́ɛ la zu kú kúmu siɣe.
Ŋ̀ulei ǹɔ́ɔlu mɛi-dai
Ǹɛyâai
5Gbɛ̂ɛ ƃé ŋí kulâi vɛ̃ɛ-kpâlaŋ su,
gɛ́ pà díɣîŋɔɔ ŋɔwɛ́lii mai?
Ǹɛnîi
Ŋá íŋɛi lá ƃò âpɔ wurui mu,
ƃɛ́i ílee è ímaa sɔlɔ ƃô naai.
6Tɔɔ ŋá wɛli kɛ́-maa lîi é kɛ́ ílii su,
gɛ́ ƃò íyee ma a ŋɛi kɛ́-maa sɛ̂ŋ ḿaa mɛ̂ni ma.
Wɛli kɛ́-maa wála-wâlai yɛ̂ɛ saa,
dóloɔɔ yɛ̂ɛ ƃolôŋ.
A sôŋ,
gɛ́ núu kèreŋ yɛ̂ɛ ŋɔŋ.
7Yá fa pɔ̂ri wɛli kɛ́-maa ŋɔŋ líinîi.
Ɣilîŋ yà fa tèla pɔ̀ri ŋ̀waâi núu ma.
Núu da fa pɔ̂ri wɛli kɛ́-maa yâi a sɛŋ-kao.
À gɛ̀ tí, m̀ɛlɛ a kpɛ̂ɛ goi, é ǹyée kúla mù.
Ǹɛnîi záaƃɔlɔ-ni
8Kúlêɣe nɛ̀ni káa naa
nyíi ŋ̀íni fé niî kula ní.
Surɔ̂ŋ da à kɛ̀ wɛ̂lii é gula a nɛnî,
lé ƃé kwa pɔ̂ri gɛ̂i?
9À kɛ̀ a pɛ́rɛ-kâŋ,
kwa pâi káne pɛrɛ tôŋ kôyaa tɔɔ̂i mì.
À kɛ̀ a kpôŋ,
kwa pâi m̀aa tínanîi a sîda wuru.
Ǹɛnîi
10Ŋ́gaa a pɛ́rɛ-kâŋ,
ŋ́ini kɛ́ ƃò a pɛ́rɛ tôŋ kôyaa-ŋa.
Ŋá wɛli kɛ́-maa nûui a ŋ́gàa,
ǹíi a lâa.
Zurɔ̂ŋ
11Kpɔmɔ kpâlaŋ káa Saloma yêei Bee Amɔ.
A ǹaa tɛ̀ɛ nûa pɔ́ a gɛɛ dí tíi kɛ́ naa.
Kpâlaŋ ŋá tìi kɛ́ nuu tɔnɔ a sɛŋ kao kole kpua-kpua wála tɔnɔ (1,000) kpɛ̀ɛ a gbâlaŋ ŋí zûti.
12Ƃía óo Saloma, zɛŋ kao kole kpua-kpua wála tɔnɔi (1,000) é lɛ́ɛ íyêei,
ŋuŋ feerɛi é lɛ́ɛ kpâlaŋ mɛi káa-ƃelai yêei.
Kɛ́lɛ ŋá kpɔmɔ-kpâlaŋ káa nɔ́ a ńyãa tɔnɔ ḿbɔɔ.
13Ŋáwɛli kɛ́-maa nûui, yái tí zûai sui, lóno ŋa íwoo mɛ́ni.
Ḿarâai da ŋ̀wɛ̂lii dí íwoo mɛ́ni máŋ.
Ǹɛnîi
14Pá ḿbɔ naa ŋáwɛli kɛ́-maa nûui, yái íkaa yɛ̂ɛ tôai,
íkɛ ƃò yɛ̂ɛ lóma nâɣa nyii gáa yée ma ƃɛ́i sãâ kúŋ-nɛ̃ɛ támaa káa naai.
Currently Selected:
Wule-ŋa Kélee Mɛi Wûle 8: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia