Wule-ŋa Kélee Mɛi Wûle 2
2
1Ńyãa ƃa Sarɔŋ yeei ma wuru-poai,
ŋ́gɛ ƃò a dìŋ-tiŋ su wuru-poai
Zurɔ̂ŋ
2Ŋáwɛli kɛ́-maa nuui káa nɔ́ m̀arâa nɛni-kpela-ŋa sáma
yɛ̂ɛ ɣalêŋ-kpɔlɔ-ŋa su wuru-poa.
Ǹɛnîi
3Ŋáwɛli kɛ́-maa nuui káa nɔ́ m̀arâa nyàŋkpa-ŋai sáma
yɛ̂ɛ âpɔ-wuru ƃé wolâ wuru-ŋa sáma.
Ŋa ŋ̀wɛli ŋá sée ǹinîŋ mu.
M̀á kɛ́-pere lɛ̂lɛɛi a ńîa.
4È pà a ńyãa kúu kɛ́tɛ su,
ŋɔwɛli kɛ́-maai káa ḿɛi yɛ̂ɛ ƃenâa.
5È kpɔmɔ-ƃa kpala nɛ̃ɛ tɛ̀ɛ ḿbɔ é ŋ́gbonôi kpanaŋ,
é âpɔ tɛ̀ɛ ḿbɔ ŋá tóo ŋ́gbonôi.
Í wɛ̀li kɛ́-maa lîi a tɛɛ ńii pôlu. À kɛ̀ yà wàla íwɛli kɛ́-maai lɛ́ ḿâ, ŋà pâi kɔ̂lɛi.
6Gɔ́ɔ-yee káa ŋ́uŋ mu,
ǹáa mii-yêe kpíniŋɔɔ a ńyãa.
7Zerusâlɛŋ nɛyaa, ka káfoo ńyêei.
Kà káfoo a lóma da tôa láa a gɛɛ
káfe pâi kúwôlii karâi tãi kwa kɛ̂ lâa-ni lai, é lɛ́ɛ la zu kú kúmu siɣe.
Ŋ̀ulei veerɛi
Ǹɛnîi
8Ŋá ŋáwɛli kɛ́-maa nuui wóo mɛ̀ni.
Gáa kîrɛ siɣêi gɛ́ kùla ǹyée kɛ́tɛi tôŋ su,
gɛ́ tɛ̂ɛ guro-téi tôŋ su, gɛ́ pà ḿbɔ yɛ̂ɛ lóma kpaa máŋ tôa.
9Gáa yɛ̂ɛ tôa,
kpaa máŋ yɛ̂ɛ lóma sîrɛ.
Ka gáa, gáa tɔɔ̂ni bɛ́rɛ-kaŋ kɔlɛ.
A tɔɔ̂ni wônai lá, gɛ́ bɛ́rɛi mu kàa.
Ŋ̀ɛ́i káa ƃɔ̂i wônai la-sãai su gɛ́ bɛ́rɛi mu kàa.
10Ŋá wɛli kɛ́-maa nuui è lòno ḿbɔ ǹyɛɛ,
Zurɔ̂ŋ
Ímu siɣe í pá ḿbɔ naa kú lí
ŋáwɛli kɛ́-maa nuu lɛ́lɛɛi.
11Zama yâi ŋɔtãi a kpɛɛ. Tuna fa ŋɔ́nɔ pù.
12Wúru-poa káa niî ɣele ma.
Wule too tãi a seri.
Tòloŋ-ŋa wóo a kɛ́ tɛ̂i ŋɔlɔii ma.
13Fîi wuru-ŋai da ƃâi yɛ̂ɛ berei da kâa gɛ̀ lai,
gbɔmɔ-ŋai poa-ŋai kúŋ kɛ́ tɛ̀ yɛ̂ɛ wúru-ya kúŋ nɛ̃ɛ.
Ímu siɣe ŋáwɛli kɛ́ maa-nuu lɛ́lɛɛi
í pá kú lí.
14Ŋá wɛli kɛ́-maa nuui, íkaa yɛ̂ɛ tòloŋ nyii a ǹoo gɔni wôloi su ǹyéei pɛ̂rɛ mai.
Tɔɔ ŋá íŋɛi káa.
Wule tóo, ŋá íwoo mɛ́ni,
kpɛ́ni fêi, íwoo nɛ̃ɛ̂i, íŋɛi lâai lɛ́lɛɛ.
15Gɛlɛ̂ŋ-ŋai sôŋ, da bɛ̀lɛɛ-pɛlɛɛi
dífa la kúkpɔmɔ kpâlaŋ-ŋai ŋá kara la kpɛ́ni fêi bòa tãi a seri.
Ǹɛnîi
16Ŋá wɛli kɛ́-maa nuui káa a ḿbɔɔ, ńyaŋ ŋ́gɛ ƃò a bɔ́ɔ.
A ŋɔtaa tûlɛ-ŋai ŋáa kɔ̀ŋ ŋ̀úru-pôa-ŋai sáma.
17Ŋáwɛli kɛ́-maa nuui,
ɣele é lɛ́ɛ pâi ƃɔ̂i,
kwaa é pono, íkpîŋ kɛ́ yɛ̂ɛ tôa
kpaa máŋ lóma-sîrɛ ƃé mãla-mã̂lai yée pɛ̂rɛ ma.
Currently Selected:
Wule-ŋa Kélee Mɛi Wûle 2: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia