Lomaŋ Tuɛ mɛni ƃóɔɔ
Tuɛ mɛni ƃóɔɔ
Pɔ̂ɔ è gɔlɔi ŋí pɔ̃̀yɛ Lomaŋ-ŋai pɔ́ naa a gɛ́ɛ dí díkpîŋ kpɛtɛ mɛni kpɛtɛɛ naa-kaai mɛni ma ǹyaa Pɔ̂ɔ è kɛ̀ pâi gɛ̂i dípɔ naa Ŋ̀âla-pɛrɛi mui. Ŋɔmɛni kpɛtɛɛi ƃé kɛ̀ a gɛ́ɛ é lí é kɛ́ dísama da Kôrai-ƃelai da-ni dí tíi kɛ́ tãi kpua yée mu, à kɛ̀ da díyee sèe m̀u, dí lí a díi tuɛ pere Sipîŋ lɔii su. È gɔlɔi ŋí pɔ̃̀yɛ yɛ̂ɛ berei è kɛ̀ a Kôrai-ƃelai dílaa-lai kɔ́lɔŋɔɔ la da berei da tíi kɛ̀ la dífulu-laai sui. Ŋ̀orɛ̂-wooi Pɔ̂ɔ è m̀o Kôrai-ƃelai diai bɔ̃yɛɛ̂i gɔlɔi ŋí su.
Pɔ̂ɔ è ǹáa tí Lomaŋ-ŋai dîa é m̀o dîa a gɛ́ɛ a Ɣâla fɛlii dímɛni ma. Ǹaa pôlu ma, ǹónoi Pɔ̂ɔ è kɛ̀ gɛ̂i Lomaŋ-ŋai pɔ́i è zɛ̂lɛŋ-ɣɛli lɛ̀ dîa ǹyɛɛi, “Duŋ Lɛ́lɛɛi a ǹɛ berei Ɣâla a ǹyée sèe la núu mu a gɛ́ɛ maa nuui é kɛ́ a tɔ̃yâ-nuui. Ɣâla a ǹyée sèe nɔ́ núu da mu maa nuui ŋɔlaa-lai é kúla gɔ́ɔ pîlani é tóo gbɛɛ ŋá ma” (gɔlɔ-ŋuŋ 1:17).
Nyíŋí pôlu ma, Pɔ̂ɔ è lì tuɛ a ŋ̀óo. È m̀o dîa a gɛ́ɛ fɛ̂ɛ núu kélee é kɔ́ é pere kɔ́ri a gɛ́ɛ laoi-laa lɛ́lɛɛ kɛ́ ƃò díloai da Ɣâla, núu-kpune káa sɔnyɔ̂ŋ ŋɔwála-walai mu wɔlɔ, Zûu-nuu kpaa máŋ ǹúui vé a Zûu-nuui. Ǹyɛɛ dîa Ɣâla a ǹyée sèe nɔ́ núu da mu maa nuui ŋɔlaa-lai mɛni ma Zîsɛ sarâi. È lòno é pîlaŋ vúlu-laa ninai ma núu a zɔlɔ ƃo à kɛ̀ maa nuui da Zîsɛ díkaa zu tɔnɔ. Nyɛɛ à kɛ̀ tí, gɛ̀ ní da Ɣâla da kɛ́ laoi-laa lɛ́lɛɛ su. Ǹúui laa-la káa ǹyêei lii-sêe káa ǹyêei ǹyaŋ a ŋuŋ ma ƃo sɔlɔ ƃo Ɣâla é gula sɔnyɔ̂ŋ ŋɔwála-walai mu da saa. Pɔ̂ɔ è lòno é pîlaŋ Ɣâla ŋɔtɔ̂ŋ da ŋɔmɔ̂leŋ díwala-walai má nyíi gaa laa-la nuu ŋɔfúlu-laai mɛni ma. Zia-nuui Pɔ̂ɔ è gíli ŋá sìa kpɔ́ a gbanaŋɔɔ é pîlaŋ m̀ɛni kpɛtɛɛi mâ gáa Ɣâla yêei Zɛ̃tai nuu da Zûu nuu mɛni ma núu-kpune ŋɔkɛ-ɣeniɛi sui. Ǹyɛɛ Zûu-ŋai dí díyee kùla Zîsɛ mu. Nyíŋí è kɛ̀ a Ɣâla kpɛtɛ mɛni a gɔ́ɔ pîlanii a gɛ́ɛ ŋ̀éniɛi gwaa kélee su-ƃelai dí ǹyaa Ɣâla ŋɔƃɛlɛ-sêei sɔlɔ ƃó. È kɛ̀ a gɔ́lɔŋɔɔ a gɛ́ɛ Zûu-ŋai dífe pâi wɔ́lɔ kɛ̂i a díyee kúlaa Zîsɛ mu. Gbɛɛ ŋái, Zia-nuui Pɔ̂ɔ è mɛni-ŋa pɔ̃̀yɛ gɔlɔi ŋí su é pîlaŋ berei ma Kôrai-ƃelai da pɔ̂ri díkɛ-ɣeniɛi kɛ̂i lai, ŋuŋ kpîŋ ƃa berei da pɔ̂ri díkîe-ni sonîi lai. Ŋ̀óo lá kula-wooi ƃé kɛ̀ a gɛ́ɛ díi gaa kúyêei ǹyaa ƃa kúkɛ a kúkpaaŋɔɔ kúkîe-ni mɛni ma. È ŋɔkɔlɔi ŋí lá tɛ̀ a gbîŋ worɛ-woo-ŋa da Ɣâla láa ma tɛ́ woo.
M̀ɛni-ŋûŋ-ŋai gɔlɔi ŋí sui
Tuɛ mɛni ƃóɔɔ da m̀ɛni-ŋuŋ gɔlɔi ŋí mɛni mai (1:1-17)
Ǹɛ́lɛɛi núu é ƃálo-laa maa sɔlɔ ƃó ŋ̀éniɛi su (1:18--3:20)
Berei Ɣâla a núu ŋuŋ ma ƃò lai (3:21--4:25)
Vúlu-laa ninai Kôrai kponôi (5:1--8:39)
Ɣâla ŋɔmɛni kpɛtɛɛi Eezuɛ mɛni ma (9:1--11:36)
Kôrai-nuu tûa pere (12:1--15:13)
Gɔlɔi lá tɛ́-wooi da laa tí-maa woo-ŋa (15:14--16:27)
Currently Selected:
Lomaŋ Tuɛ mɛni ƃóɔɔ: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia