Lomaŋ 7

Dɔ̂ŋ kɛ́-pere káa yɛ̂ɛ tûa-laa

1Ŋánûa, ŋa lônoi kápɔ, káai dɔ̂ŋ kɔ́lɔŋ káfe gɔ́lɔŋ a gɛ́ɛ dɔ̂ŋ ŋɔwála-walai káa núu mɛi a tãi nɔ́ gáa la ɣele mai? 2Mɛni ma ǹɛnii nyíi a surɔ̂ŋ kulai, dɔ̂ŋ ŋɔwála-walai káa mɛi ŋɔsurɔ̂ŋ mɛni ma tãi nɔ́ ŋɔsurɔ̂ŋ káa la ɣele mai; kɛ́lɛ, à kɛ̀ ŋɔsurɔ̂ŋ à sàa, gɛ̀ ní dɔ̂ŋ ŋɔwála-walai fe ŋɔ́nɔ mɛi ŋɔsurɔ̂ŋ mɛni ma. 3Yɛ̂ɛ berei gáa lai, à kɛ̀ à tòo surɔ̂ŋ da kpɛni yêei, tãi ŋɔsurɔ̂ŋ káa niî la ɣele mai, da pâi dólîi a wulu-wulu kɛ-nɛni. Kɛ́lɛ, à kɛ̀ ŋɔsurɔ̂ŋ à sàa, dɔ̂ŋ ŋɔwála-walai fe ŋɔnɔ m̀ɛi. Ǹyaŋ à surɔ̂ŋ da kpɛni kùla dífa dòli a wulu-wulu kɛ-nɛni.

4Ŋánûa, ka kpera káɣeniɛi kɛ́ɛ ma dɔ̂ŋ mɛni ma a berei tɔnɔi ti Kôrai kponoi sârai, a gɛ́ɛ ká kɛ́ a núu da kpɛni pɔ́ɔ, nyíi Ɣâla e mu siɣe saa yêei, a gɛ́ɛ ku ƃá Ɣâla mɛni ma. 5Tãi ku kɛ̀ niî la kúkpîŋ tua-perei pôlui, dɔ̂ŋ e kúsɔnyɔ̂ŋ wɛli-lii-ŋai mu siɣe, nyíi-ŋai dí tíi kɛ̀ kúkponôi a gɛ́ɛ ku ƃa saa mɛni mai. 6Kɛ́lɛ, kúŋuŋ ma ƃóɔi nâa dɔ̂ŋ yêei. Kúloai téɛɛ̂i nâa kwa sɛŋ nyíi a kúkɛ̀ ku kɛ́ a luɛ-ŋai. Mɛni ma kúkaa a luɛ-ŋa bere ninai su, nya ƃa M̀ɔlêŋ ŋɔperei. Kúfe a luɛ-ŋa bere pɔlɔi su, nya ƃa kúfe a luɛ-ŋa dɔ̂ŋ yée mu nyíi bɔ̃yɛɛ̂i.

Sɔnyɔ̂ŋ káa kúkponôi

7Kwa pâi ŋaŋ kɛ̂i le? A gɛɛ dɔ̂ŋ káa a sɔnyɔ̂ŋ? Ve ti a dɔnɔ kpîŋ! É máŋ kɛ́ ti tɔ̂ŋ eêi wàla kɛ́ ɣele ma, fei sɔnyɔ̂ŋ kɔ̀lɔŋ. Fei sɛŋ maa-lii-teɛɛ kɔlɔŋ, eêi kɛ̀ dɔ̂ŋ eêi wàla m̀o, ǹyɛɛ, “Ífe sɛŋ maa-lii tèe.” 8Kɛ́lɛ, dɔ̂ŋ e sɔnyɔ̂ŋ kɔ́ɔ pìlaŋ a gɛ́ɛ e tíi kɛ́ ŋ́gbonôi. E ŋ́gɛ̀ ŋá sɔnyɔ̂ŋ-sii kélee wɛ́li. Bɛ́i tɔ̂ŋ fe naai sɔnyɔ̂ŋ saâi naa. 9Tãi fe kɛ́ ni la dɔ̂ŋ mui ŋa kɛ̀ ɣele ma a tãi da dɔ̂ŋ ŋɛi pôlu, kɛ́lɛ, tãi dɔ̂ŋ è pà lai, sɔnyɔ̂ŋ e ŋ̀ɛi la ƃo, nya ƃe ŋá sàa; 10dɔ̂ŋ tɔnɔi nyíi gono tèe a gɛ́ɛ e fulu-laa tɛɛ núu-kpune pɔi, e saa tɛ̀ɛ ḿbɔ. 11Kpɛ́ni fêi, dɔ̂ŋ e sɔnyɔ̂ŋ ŋɔtíi kɔ́ɔ pîlaŋ ŋ́gbonôi. Sɔnyɔ̂ŋ è ḿbɛ̀lɛ é ḿbaa a dɔ̂ŋ. 12Mɛni ma dɔ̂ŋ maa waâi. Mɛnii dɔ̂ŋ a m̀ôi maa waâi, dɔ̃yâ, ǹɛ́lɛɛ.

13Gɛ̀ ní ŋaŋ dɔ̂ŋ nyíi ǹɛ́lɛɛ̂i è pà ḿbɔ a saa? Ve ti a dɔnɔ kpîŋ! Sɔnyɔ̂ŋ ƃé pà ḿbɔ a saa sɛŋ lɛ́lɛɛ sârai, a gɛ́ɛ sɔnyɔ̂ŋ é lɛ́ a sɔnyɔ̂ŋ, a gɛ́ɛ dɔ̂ŋ é sɔnyɔ̂ŋ lɛ́ a sɛŋ nyíi nyɔ́mɔɔ̂i kpɔ́ a ŋánaai. 14Ku gɔ́lɔŋ a gɛ́ɛ dɔ̂ŋ a kûla M̀ɔlêŋ yêei; kɛ́lɛ, ŋ́gaa nɔ́ a núu-kpune. Dí ŋ́gɔ̀lɛ yɛ̂ɛ luɛ a gɛ́ɛ ŋá tíi kɛ́ sɔnyɔ̂ŋ mi. 15Mɛni-ŋai ŋa díkɛ̂i, fe gɔ́lɔŋ lé mɛni ƃe ŋa díkɛ̀ lai. Kpɛ́ni fêi, mɛni-ŋai ŋa díwɛli níi, fa díkɛ̀. Kɛ́lɛ, mɛni-ŋai ŋa díkpɔ̀arai, dia ƃe ŋa díkɛ̀. 16Kɛ́lɛ, à kɛ̀ ŋa mɛni-ŋai kɛ̀ nyíi-ŋai fa ŋwɛ̀li ŋá gɛ́i, gɛ̀ ní ŋa fáa a gɛ́ɛ dɔ̂ŋ lɛ́lɛɛ̂i. 17À kɛ̀ ti gɛ̀ ní ńyãa fa gɛ̀, kɛ́lɛ, zɔnyɔ̂ŋ gáa ŋ́gbonôi nya ƃa gɛ̀. 18Kpɛ́ni fêi, ŋá gɔ́lɔŋ a gɛ́ɛ mɛni lɛ́lɛɛ kélee fe ŋ́gbonôi, nya ƃa ŋ́gbîŋ-tua-perei su. Ŋa ŋ̀wɛli ŋá mɛni-ŋai kɛ́ dílɛlɛɛ̂i, kɛ́lɛ, fa díkɛ̀. 19Kpɛ́ni fêi, mɛni lɛ́lɛɛi ŋa ŋ̀wɛli ŋá gɛ́i, fa gɛ̀, kɛ́lɛ, ŋa mɛni nyɔ́mɔɔi kɛ̀ nyíi fa ŋ̀wɛli ŋá gɛ́i. 20À kɛ̀ ǹyaŋ ŋa mɛni-ŋai kɛ̀ nyíi-ŋai fa ŋ̀wɛli ŋá díkɛi, gɛ̀ ní ńyãa fa díkɛ̀, kɛ́lɛ, zɔnyɔ̂ŋ gáa ŋ́gbonôi nya ƃa díkɛ̀.

21Mɛni ma ŋa gáa a gɛ́ɛ gáa a tɔ̂ŋ a gɛ́ɛ tãi ŋa kɛ̂ ŋ̀wɛ̂lii la ŋa mɛni lɛ́lɛɛ kɛ̂i, mɛni nyɔ́mɔɔ káa nɔ́ ŋ́gɔlɛ. 22Kpɛ́ni fêi, ŋa Ɣâla ŋɔtɔ̂ŋ mɛi kaa a lii-nɛ̃ɛ ŋ́gbîŋ kponôi. 23Kɛ́lɛ, ŋa tɔ̂ŋ da kpɛni kâa ŋ́gbonôi gɛ kɔ dɔ̂ŋ pɔ nyíi gáa ŋ́gili ŋái, nyíi a ŋ́gɛ̀ a luɛ a gɛ́ɛ ŋá kɛ́ sɔnyɔ̂ŋ ŋɔtɔ̂ŋ mu nyíi gáa ŋ́gbonôi. 24Ŋ́gaa kpɔ́ a núu nyɔ́mɔɔ! Gbɛ̂ɛ ƃe pâi ŋ́gulâi ŋ́gbonôi ŋɔsaai yêei? 25Sɛɣɛi fe é tɛ́ɛ Ɣâla pɔ Kúnuu-namui Zîsɛ Kôrai sârai! À kɛ̀ ti gɛ̀ ní ńyãa kpîŋ ŋa Ɣâla ŋɔtɔ̂ŋ mɛi kâa a ŋ́gili, kɛ́lɛ, ŋa sɔnyɔ̂ŋ ŋɔtɔ̂ŋ mɛi kâa a ŋ́gbîŋ-tua-perei.

Currently Selected:

Lomaŋ 7: KWB

Highlight

Copy