Lomaŋ 15

1Kúai kúsu kpanaŋɔɔ̂i, maa nɛ̃ɛ̂i kú kúlii kpéle vii-kpɛɛ-ƃelai díkili-ŋa-sia nyɔ́mɔɔ-ŋai yêei, kúfe kúkpîŋ líi làa; 2fɛ̂ɛ kúkelee kúkɔlɛ-ma-ƃelai líi láa a gɛ́ɛ mɛni lɛ́lɛɛ e pa dípɔ dísu e kpanaŋ. 3Kpɛ́ni fêi, Kôrai fe gbîŋ líi láa ni; kɛ́lɛ, yɛ̂ɛ berei bɔ̃yɛɛ̂i lai, “Mɛni nyɔ́mɔɔ-ŋai dí mò e pîlaŋ yâi, gélee e pù ŋ́ûa.” 4Mɛni-ŋai dí bɔ̃̀yɛ nàa tuɛi, dí bɔ̃̀yɛ a gɛ́ɛ ku mɛni maa kɔ́ri a dia, a gɛ́ɛ lii-kpele su da Ŋ̀âla-kɔlɔi ŋɔŋa-nɛnɛ kili-kɛ-zu e kɛ́ kúyêei. 5Nii-kpelei da ŋ̀anɛnɛ-Ɣalai é gɛ́ ka kákîe-ni wóo mɛni yɛ̂ɛ berei Zîsɛ Kôrai e mo lai, 6a gɛ́ɛ ka Kúnuu-namui Zîsɛ Kôrai Naŋ-Ɣala ŋɔfólo-laai maa tɛ a woo-kɛ-zu tɔnɔɔ.

Duŋ Lɛ́lɛɛi a liî Zɛ̃tai-ŋai pɔ́

7Mɛni ma ka káyee see kákîe-ni mu yɛ̂ɛ berei máŋ Kôrai e ǹyée see la kúmu Ɣâla ŋɔfólo-laai mɛni mai. 8Ŋa môi a gɛ́ɛ Kôrai è kɛ̀ a núu-kpɛtɛ-mɛni yee-mu-nuu Ɣâla ŋɔtɔ̃yâi mɛni ma a gɛ́ɛ e Ɣâla ŋɔkono-tee-ŋai ŋ̀aa-see kɛ́ nyíi e gɛ Kúnuu-pɔlɔ-ŋai yêei, 9a gɛ́ɛ ŋɔ́nɔ Zɛ̃tai-ŋai dí Ɣâla ŋɔfólo-laai maa tɛ ŋɔmaloŋ-kaai mɛni ma, yɛ̂ɛ berei bɔ̃yɛɛ̂i lai,

“Mɛni ma ŋa pâi ímaa-mɛni ƃôi Zɛ̃tai-ŋai sama,

ŋa wule tóo a ílaa”;

10È mò ŋɔ́nɔ, ǹyɛɛi,

“Zɛ̃tai-ŋai, ka lii-nɛ̃ɛ kula ka ŋɔnûai”;

11Ǹyɛɛ ŋɔ́nɔ,

“Káai a Zɛ̃tai-ŋai kélee ka Kúnuu-namui láa maa tɛ,

ka ǹɛɛ naa ǹûai kélee dí ǹáa maa tɛ”;

12Nya ƃe Azaya e mò ŋɔ́nɔ, ǹyɛɛ,

“Núu tɔnɔ a pâi kulâi Zɛse ŋɔsuui su,

nya ƃe pâi kɛ̂i Zɛ̃tai-ŋai mɛi;

Zɛ̃tai-ŋai da pâi díkili kɛ̂i ma.”

13Gili-kɛ-zu-Ɣalai é kálaa fɛ́ɛ a Líi-nɛ̃ɛ da lii-sêe laa-la su, a gɛ́ɛ kili-kɛ-zu támaa é kɛ́ káyêei M̀ɔlêŋ Maa Waai ŋɔwála-walai sârai.

Sâpoi Pɔ̂ɔ è gɔlɔ pɔ̃yɛ lai

14Ŋánûa, ńyãa kpîŋ ńii lâai kámɛni ma a gɛ́ɛ káa kpîŋ kálaa fɛɛ̂i a lɛ́lɛ-laa, kálaa fɛ́ɛ a táre kélee, pɔ̂ri kɛ́ ƃo káa a gɛ́ɛ ka sɛŋ lɛ kákîe-ni dîa. 15Kɛ́lɛ, ŋa kɔlɔ pɔ̃yɛ káa a lii-kpele-pere e pîlaŋ la mɛni-ŋa dîa nyíi-ŋai ŋa ŋ̀wɛ̂lii é lɛ́ɛ kákili ŋái. Ŋá nyíŋi kɛ̀ m̀ɛlɛ-seei mɛni ma Ɣâla e dɛɛ ḿbɔ 16a gɛ́ɛ ŋá kɛ́ a Zîsɛ Kôrai ŋɔtii-kɛ-nuu Zɛ̃tai-ŋai dîɛi. Ŋa tíi kɛ̀ Zɛ̃tai-ŋai dîɛ yɛ̂ɛ Ɣâla ŋɔsâla láa soŋ nuui ŋɔtuŋ lɛ́lɛɛi mɛni ma a gɛ́ɛ Ɣâla e ǹyée see dímu yɛ̂ɛ sâla-sãa nyíi-ŋai M̀ɔlêŋ Maa Waai a dímaa wáai. 17Gɛ̀ ní, sâpo káa ńyêei Zîsɛ Kôrai kponôi a gɛ́ɛ ńii é nɛ̃ɛ ŋɔtíi mɛni ma Ɣâla mi. 18Kpɛ́ni fêi, fe pâi kɔ̂i a gɛ́ɛ ŋá lóno e pîlaŋ mɛni da kpɛni ma, kɛ́lɛ, fɛ́ɛ nɔ́ mɛni-ŋai Kôrai a gɛ́ ńzârai a gɛ́ɛ ŋá pá a Zɛ̃tai-ŋai woo-mɛni su ńono-woo su da ńdûa-pere, 19da ŋɛi-kɛ-maa-ŋa da mɛni kpaya-kpaya díwala-walai, da M̀ɔlêŋ Maa Waai ŋɔwála-walai a gɛ́ɛ ŋa Kôrai ŋɔtuŋ lɛ́lɛɛi ƃo é síɣe Zerusâlɛŋ e seri Iliɛkɔŋ gwaa kélee. 20Mɛni ma ŋá ŋ̀wɛli kpɔ́ a dámaa a gɛ́ɛ ŋa Duŋ Lɛ́lɛɛi ƃo nɔ́ ƃɛi-ŋai ma dífe niî Kôrai láa tóli ni naai. À kɛ̀ ti gɛ̀ ní fe pâi tíi kɛ̂i núu da kpɛni ŋɔtíi kɛ́ɛ su. 21Kɛ́lɛ, yɛ̂ɛ berei bɔ̃yɛɛ̂i lai,

“Diai dífe niî wɔ́lɔ m̀aa-mɛni ƃo ni diai, da pâi gâai.

Diai dífe niî wɔ́lɔ m̀aa-mɛni mɛni ni, da pâi tárêi zu.”

Pɔ̂ɔ e gbɛ̀tɛ gíli ŋá a gɛ́ɛ é lí Luŋ naa-kaa kɛ̂i

22Sapoi ká ŋí ŋa kpera la pâi kápɔ a tãi támaai. 23Kɛ́lɛ, tíi fe ŋɔ́nɔ ńyêei gbiniŋ ŋí su-pere. Kɛ́lɛ, berei ŋa kɛ̀ ŋ̀wɛ̂lii la a kóraŋ támaa ŋá kákaâi, 24gáa ŋ́gili ŋá, ŋá kákaa tãi ŋà kɛ̀ tɛɛ̂i la ŋ́gɛ lì Sipîŋ. Kwa ka-ni kwa yɛpɛ pu a guro, ká kápama mâ. 25Tãi ŋí su ŋa liî Zerusâlɛŋ a kpɔŋ-maa Ŋ̀âla-ƃelai pɔ. 26Kpɛ́ni fêi, Masadonia-ƃelai da Ɛkeya-ƃelai líi e làa a gɛ́ɛ dí kpɔŋ-gîe-maa kɛ́ gôlo-ƃelai mɛni ma Zerusâlɛŋ-Ɣala-ƃelai sama. 27Dí gɛ̀ lii-laa su, ǹyaŋ Zerusâlɛŋ-ƃelai díkpa káa Zɛ̃tai-ŋai dîa a tɔ̃yâ. Kpɛ́ni fêi, à kɛ̀ Zɛ̃tai-ŋai da pá a gɛ́ɛ dí dílûwai da sɔlɔ ƃo nyíi kula M̀ɔlêŋ Maa Waai yêei, gɛ̀ ní dîa máŋ fɛ̂ɛ dí kpɔŋ dîa a ŋ̀éniɛi ŋí su-luai. 28Mɛni ma tãi ŋà nyíŋi kpɛ̀ɛ la, ŋá zɛŋ-kaoi tɛ́ɛ dípɔ Zɛ̃tai-ŋai dí bu gîe mai, ŋa pâi tɛɛ̂i a kápɔ naa-pere ŋá lí Sipîŋ; 29ŋá gɔ́lɔŋ a gɛ́ɛ ŋà pà kápɔ ŋa pâi pâi a lûwa kɛ́tɛ e kula Kôrai (ŋɔtuŋ lɛ́lɛɛi su).

30Ŋa kákpera fêi, ŋánûa, Zîsɛ Kôrai sârai da M̀ɔlêŋ ŋɔwɛli kɛ́-maai a gɛ́ɛ ka kpɔŋ mâ ku Ɣâla fɛli ḿɛni ma a gbanaŋɔɔ 31a gɛ́ɛ ŋá kúla Zuda-ƃelai yêei nyíi-ŋai laa-la fe díyêei, a gɛ́ɛ ŋɔ́nɔ Zerusâlɛŋ-Ɣala-ƃelai dí díyee see gbɔŋ-maai mu ŋa liî la dípɔi, 32a gɛ́ɛ Ɣâla à fàa ma ŋá pá kápɔ a lii-nɛ̃ɛ, su-kpanaŋ é pá ḿbɔ kásama. 33Nii-see-Ɣalai é kɛ́ kákelee kákɔlɛ. É kɛ́ ti.

Currently Selected:

Lomaŋ 15: KWB

Highlight

Copy