Nɔŋba 34
34
Keena lɔii kóyaŋ-ŋai ma
1Yâwɛɛ è mò Mose ma ǹyɛɛi, 2“Mɛni-ŋai ŋí ƃó Eezuɛ-ŋai dîa. Tãi ka lì la Keena lɔii sui, ǹɔii nyii ŋa dɛɛ̂i kápɔ a kápɔɔi, goyaŋ ma-ŋai ka ŋí. 3Ǹɔii kwára-pere koyaŋ ma a pâi siɣêi Ziŋ fɛ̃ɛ-kpalaŋ ma da Idɔŋ-ŋai dí lɔii koyaŋ ma pere, é síɣe Ǹyúo Saai kperai ŋá vóloi kulai-pere, 4gɛ́ yeŋ ǹɔii kwára-pere gɛ́ lì Akabiŋ yeei pɛrɛ ma-pere, é ŋɔ́nɔ tɛɛ Ziŋ fɛ̃ɛ-kpalaŋ su é kpéra Kedɛ Bania taai kwára-pere. A pâi ŋɔnɔ síɣe naa é lí Aza Ada é tɛ́ɛ Amoŋ taai su. 5É ŋɔ́nɔ kúla naa é lí diŋ-tiŋ su Ize koyaŋ ma, é kperâ Mɛditɛrenia Yuoi mâ.
6“Ǹɔii koyâŋ ma pere nyii pâi kɛ̂i voloi lii-perei a pâi siai a Mɛditɛrenia Yuoi kóo.
7“Ǹɔii ŋûa-pere koyâŋ ma kɔ́ɔ a pâi pîlanii é síɣe Mɛditɛrenia Yuoi ma é tɛ́ɛ Ɔ̂ɔ yeei ma. 8É síɣe ŋɔ́nɔ Ɔ̂ɔ yeei ma gɛ́ lì Ama-perei kɔlɛ ma é seri Zida taai ma. 9É síɣe ŋɔ́nɔ Zida taai ma é lí Zifɔŋ é kóyaŋ Aza Inaŋ ma. Kálɔii ŋûa-pere koyâŋ ma ká ŋí.
10“Vóloi kulai-pere lɔii koyâŋ ma a pâi kɛ̂i é síɣe Aza Inaŋ é lí Sifaŋ. 11A pâi ŋɔ́nɔ kúla Sifaŋ é yéŋ Liƃa nyii gáa Aiŋ foloi kulai-perei. É ŋɔ́nɔ síɣe naa é seri Galalii Yúo-loŋ kɔlɛ ma yeei ma vóloi kulai pere. 12É ŋɔ́nɔ síɣe naa é yéŋ Zɔdiŋ Ya-leei mâ é kóyaŋ Ǹyúo Saai mâ.
“Kálɔii ŋí ŋɔgoyâŋ perei ǹaaŋɔɔ ká ŋí.”
13Mose è mò Eezuɛ-ŋai dîa ǹyɛɛi, “Ǹɔii ká ŋí nyii Yâwɛɛ è dɛ̀ɛ ká pɔ́ a kápɔɔi. Ka ŋá kɔlɛ a kpɛyɛŋ toɔɔ, ǹúu-suu lɔ́ɔlu mɛi naaŋ da gburai loai. 14Kpɛni fêi, Lubiŋ ŋɔsuui su-ƃelai da Gâa ŋɔsuui su-ƃelai é pɛ́lɛ Manasɛ ŋɔsuui su-ƃelai m̀élai tɔnɔ ma dí díwɔ̂ lɔii sɔlɔ ƃô. 15Ǹúu-suu feerɛi ŋí da gburai dí díwɔ̂ lɔii sɔlɔ ƃò Zɔdiŋ Ya-leei pôlu vóloi kula-pere Zɛleko téniŋ ma.”
Ǹɔii ŋá kɔlɛ-ƃelai láa
16Yâwɛɛ è mò Mose ma ǹyɛɛi, 17“Ǹûai láa ká ŋí pâi ǹɔii ŋá kɔlɛ̂i ǹûai diai. Dia ƃa zâla láa-soŋ-nuui Ilieza da Nuŋ ǹóŋ Zasua. 18Ka núu-tuɛ nuu tɔnɔ-tɔnɔ kúla máŋ ǹúu-suu tɛi-tɛi kélee sáma a gɛɛ dí kpɔ́ŋ dîa dí ǹɔii ŋá kɔ́lɛ.” 19Ǹûai láa ká ŋí: Ǹúui kùla Zuda ŋɔsuui sui nya ƃa Zefunɛ ǹóŋ Kelɛ. 20Ǹúui kùla Simiɔŋ ŋɔsuui suii nya ƃa Amiyu ǹóŋ Simuɛ. 21Ǹúui kùla Bɛŋsima ŋɔsuui sui nya ƃa Kisilɔŋ ǹóŋ Ilida. 22Ǹúui kùla Daŋ ŋɔsuui sui nya ƃa Zogili ǹóŋ Buki. 23Ǹúui kùla Zosɛ ǹón Manasɛ ŋɔsuui sui, nya ƃa Ifɔ ǹóŋ Aniɛ, 24Ǹúui kùla Zosɛ kpéli ǹón Ifiraŋ ŋɔsuui sui, nya ƃa Sifaŋ ǹóŋ Kemuɛ. 25Ǹúui kùla Zɛbulɔŋ ŋɔsuui sui, nya ƃa Pâna ǹóŋ Ilizafaŋ. 26Ǹúui kùla Isaka ŋɔsuui sui, nya ƃa Azaŋ ǹóŋ Patiɛ. 27Ǹúui kùla Asɛ ŋɔsuui sui, nya ƃa Selomi ǹóŋ Aiyu. 28Ǹúui kùla Nɛfɛtɛli ŋɔsuui sui, nya ƃa Amiyu ǹóŋ Pɛdayɛɛ. 29Ǹûai ká ŋí Yâwɛɛ è dílɛ̀ a gɛɛ dí Eezuɛ-ŋai dílɔii ŋá kɔ́lɛ dîa Keena lɔii sui.
Currently Selected:
Nɔŋba 34: KWB
Highlight
Copy
Compare
Share
Want to have your highlights saved across all your devices? Sign up or sign in
© 2012 Bible Society in Liberia
