Maka 7
7
Eezuɛ ŋɔwôya mɛni-ŋai
1Ŋátii kɛ́ɛi kélee káa kpɛ́ni-kpɛni! Ŋ́gaa yɛ̂ɛ puru-nuu nyii va ŋɔsí-sɛŋ wuru-ŋai da ƃá ka ŋá, da ŋɔkpɔmɔ-kpalaŋ-ŋai. Gélee ƃá a kpɛ́ɛ ŋá. Ŋa ŋ̀wɛ̂lii a gɛɛ ŋáfii-wurui ƃá da mii kɛlɛ m̀bá fé ŋa. 2Tɔ̃ya-nuu da kélee fé ŋɔ́nɔ ǹɔii su. Núu kélee fé naa nyii a yào Ɣâla mai. Ǹúui kélee a maa-kpɛ̂ŋ kɛ̂i gɛ́ pere kɔ̂ri a gɛɛ é núu páa. Núu kélee kɛ́ kɔ̀ a gɛɛ é gbɔ́ɔi nuai maa liî tée. 3Dí kélee dí táreɛi sɔŋyɔ̂ŋ kɛ̀ pere su. Gâloŋ da mɛni ŋá-tée-ƃelai díkɛ yee-pɛlɛ ǹá sɛŋ-kao sòŋ. Dɔɔ-ƃelai dí kɛ́ mò dîa zɛŋ da ŋ̀wɛ̂lii, ǹyaŋ da dîa-ni dí woo kɛ́ ƃò zu tɔnɔɔ. 4Dɔ̃ya-ƃelai ŋánaai ǹûai sámai, dí káa nâa yɛ̂ɛ kala nyɔ́mɔɔ nyii a sí-sɛŋ kpɛi.
Ŋ̀élei a nâa seri tãi Ɣâla a pá tɔ̂ŋ kpɛ̂i la ǹûai dîa yɛ̂ɛ berei è dília-wôo ƃò la ŋɔlóno kɛ́-ƃelai sârai. 5Ífe làa a íkɔlɛ-ma-nuu kpaa máŋ ísia-kîe pôlu nuu. Ílono-woo mɛi káa m̀ɛnii ma nyii ƃa mò ínɛnîi mai. 6Tãi ŋí su, lônii sinaa da kɛ́ tûai a dínâŋ-ni yɛ̂ɛ ƃoo-ƃela. Lônii-nɛyaa díkɛ tɔ̀ɔ dílee-ni dîa, lônii sinaa dínɛyâai díkɛ laa-sâa pɛ̀lɛ dísinaai dílee-ni dîa. Ǹyaŋ núu ŋɔkpara-ƃela kpîŋ ƃa ŋɔpɛ́rɛi mu-ƃela.
7À kɛ̀ a ńyãa, ŋa pâi ŋɛ́i kɛ̂i Yâwɛɛ ma. Ŋa pâi Ɣâla maa kpɛ́niii a kili-kɛ-zu nyii gáa a ŋáƃalo-nuui. Ŋáɣâlai a pâi ŋ́oo mɛnîi.
Yâwɛɛ a pá a ŋuŋ-ma ƃô
8Óo kúkpɔara-ƃela, káfe lii-nɛ̃ɛ kùla kú mɛi tãi kwa tòo lai, kpɛ́ni fêi kwa pâi kú siɣêi. Kúkaa kpíni su, kɛ́lɛ Yâwɛɛ a pâi kɛ̂i a kú kwaa ponoɔɔi. 9Kwa sɔnyɔ̂ŋ kɛ́ a Yâwɛɛ ǹyaŋ fɛ̂ɛ kú kúyee sée ŋɔtɔŋ-kpɛ-maai mu a tãi kpua. Kɛ́lɛ gbɛɛ-ŋai, a pâi kúmaa kɔ̃ɔ̂i é m̀ɛni nyɔ́mɔɔ-ŋai su-too nyii kɛ̂i a kúai. A pâi pâi a kúa kwaa ponoɔɔ ma, ǹyaŋ kwa pâi lɛɛ̂i ɣele ma é lɛ́ɛ zu é kú ŋuŋ-ma ƃó. 10Gɛ̀ ní kúkpɔara-ƃelai da pâi nyíŋi kâai ƃâa é kúla dîa, kúkpɔara-ƃelai ŋí kɛ̀ ɣɛ̂lɛi kûai dîyɛɛi, “Yâwɛɛ kɔ́ɔ nyii gáa a Káɣâlai?” Kwa pâi díyee mɛi ɣâlei kâai díkɛ dí tàŋ-taŋ yɛ̂ɛ pere-lêe ma pàra.
11Zerusâlɛŋ-ƃela, daa-lêei ŋɔsiɣãŋ tɔɔ tãi a pâi. Tãi tí ma kálɔii-kpîniŋ su a pâi kɛ̂tɛi. 12Kánûai da pâi kûlai lɔii kôya-ŋa su dí pá kápɔ. Da pâi kûlai Asiria nyii gáa vóloi kûlai perei, díkula Ize nyii gáa ǹɔii kwára perei. Da pâi kúlai Yufeletii Ya-leei kɔlɛ ma kpiniŋ su, dí kúla ya-lêe-ŋa da yée naa kôya ŋa pôlu pere. 13Kɛ́lɛ ǹɔii a pâi kɛ̂i a fɛ̃ɛ-kpâlaŋ, kpɛ́ni fêi diai díkaa zui, da mɛni nyɔ́mɔɔ kɛ̀.
Yâwɛɛ ŋɔmaloŋ kâai Eezuɛ mɛni mai
14Yâwɛɛ, ínûai í dílɛi, dí mɛi káa yɛ̂ɛ berei ƃála-mɛi-kaa nuu a ŋɔƃála-ŋai mɛi kâa lai. Berei máŋ díkaa la kwa kôya ma vɛ̃ɛ-kpâlaŋ sui, lɔii lɛ́lɛɛ káa díkɔlɛ ma. Tɔɔ dí lí dísee Basãŋ da Gilia lɔii lɛ́lɛɛ-ŋai ma yɛ̂ɛ berei dí wɔ́lɔ gɛ̀ lai.
15Kúnuu-namui, ŋɛi-kɛ-maa kpaya-kpaya kɛ́ kúmɛni ma yɛ̂ɛ berei í gɛ̀ la tãi í kúkùla la Ize lɔii sui. 16Ǹɔii-ŋuŋ-ŋai da pâi nyíŋi kâai dílii é tóo pôlu berei máŋ díwala-wâlai lai. Da pâi díyee pɛlɛ̂i díwoli lá dí díla tɛ́ a ŋumɛ pere. 17Da pâi kɛ̂i ɣâlai muluŋ su yɛ̂ɛ kali-ŋa. Da pâi kulâi díloo kwaa-ŋai ma dímaa kɛ́ kpɛ̀liŋ a yao. Da pâi yaôi dí tínaŋ Kúɣâlai Yâwɛɛ pɔ́ pere.
18Óo Yâwɛɛ, Ɣâla da kpɛ́ni kélee fé naa yɛ̂ɛ ƃía. Ƃa ínûai su-mɛni lɛ̀ɛ nyii-ŋai díkaa nîi ɣele mai. Ífa ílii ŋwànaa wɔ́lɔ-wɔlɔ da wɔlɔ-wɔlɔ, kɛ́lɛ ƃa íwɔlɔ-wɔlɔ da wɔlɔ-wɔlɔ wɛli-kɛ-maai lɛ̀ a lii lâa. 19Ya pâi ŋɔ́nɔ kúmalâŋ kâai. Ya pâi ƃɔ́rɔnîi kúsɔnyɔ̂ŋ-ŋai dîa í dípili Yúo káo ma. 20Ya pâi ílaa-laai da íwɔlɔ-wɔlɔ da wɔlɔ-wɔlɔ wɛli-kɛ-maai lɛ̂i ínûai dîa yɛɛ berei íwɔlɔ íkono tèe la kúnûa pɔlɔ ŋai, Eberaɣɛ̃ɛ da Zeeka yêei.
Currently Selected:
Maka 7: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia