Zerusâlɛŋ Karáa Maa Wɔ̂lɔ-wooi 3
3
Tɔŋ kpɛ́-maa da kili kɛ̀ zú
1Ńyãa ƃa ǹúui dɔ̀nɔ nyii berei kɔ́lɔŋ Ɣâla ŋɔmɛni kula maai kɛ́-pere káa lai.
2A ŋ́gbɛ, a gɛ́ ŋ́gɛ sìa kpînii.
3A ŋ́gula maa kɛ́ a ŋánaa a kpíni da fólo.
4A ŋ́gao ɣále ŋ́gbonôi, a gɛ́ ŋ́gɔlɔ a fɔ̃ya ḿâ,
ńuu kɛ́ lula ŋ́gɔlɔ̂i.
5A ǹyée pɛ́lɛ ḿâ, a ḿaa tínaŋ a mɛni kpɔ̂lu da lii ŋwâna.
6A gɛ́ ŋ́gɛ ƃò kpînii yɛ̂ɛ nuu ƃé a saa a tãi su kôyaa.
7A siɣaŋ tínaŋ ḿâ, fa pɔ̂ri pûi.
A ńdoo yɔlɛ ŋá, fa pɔ̂ri pûi.
8A nɛ̃ɛ ma ŋá wɔ́lɔ, va ŋ̀óli tɔ̀ɔ mâ.
9A ḿberêi kpáaŋ a kɔni. A ńzia-perei kpínaŋ.
10A ḿaa kpɛ́ŋ-nii yɛ̂ɛ dítala ƃé sua maa kpɛ́ŋ-nii, gɛ́ pìli, gɛ́ pà ḿâ yɛ̂ɛ yala-sulu.
11È ŋ́gâla, é ŋ́gula berei su é ńzu tée-tee é ńɛɛ naa é lí.
12È ŋɔkerâŋ ŋáa tɛ̀ a gɛɛ é ḿoŋ a ŋɔtɔ̃ai.
13È ḿòŋ a ŋɔtɔ̃ai ńii-gbɛ̃ ma.
14Nûa da kɛ̂ nɔ́ ɣɛ́lɛ maa kulâi ŋ́gbônoi a ɣele kélee.
Ŋ̀ulei kélee da dòoi, da ɣɛ́lɛ maa kûla ŋ́gbonôi.
15À gɛ́ mɛni sôli a kɛ́ a ŋ́gɔnɔ̃ŋ da ŋ́gbele-sɛŋ.
16A ńa kîiŋ muluŋ su a ńyiŋ ɣále a gɔni-kayaŋ.
17Lii-see fé ŋɔ́nɔ ńyêei. Lii-nɛ̃ɛ mɛni fé ŋɔ́nɔ ŋ́gili ŋá.
18Ŋá kɛ-ɣeniɛi su fé ŋɔ́nɔ kôya-ni. Kili kɛ zu fé ŋɔ́nɔ ńyêei Yâwɛɛ mɛni ma.
19Ŋa mɔ̃lɛ̂i, ŋ́gɛi fé ma.
M̀ɛnii ŋí kíli a tòo ŋá, ńii a tôo pôlu a ŋánaa.
20Ŋa ŋ́gili ŋá sìa é pîlaŋ m̀ɛni-ŋai ŋí dîa,
ńii a tôo pôlu a ŋánaa ŋámɔ̃leŋ su.
21É máŋ kɛ́ tí, ŋa ŋ́gili ŋá sìa é pîlaŋ yâ,
kili kɛ-zu káa ńyêei.
22Yâwɛɛ ŋɔwɛli kɛ́-maa kɛ́tɛi kúmɛni mai, góyɛŋ fé ma.
Ŋɔmaloŋ kâai kóyɛŋ fé ma.
23Ŋɔwɛli kɛ́-maai da ŋɔmaloŋ kâai káa nɔ́ a nina a ɣele kélee.
Ŋɔteniŋ ƃô-laai kɛ̂tɛi.
24Nya ƃe ŋá mò ńyɛ̂ɛi, “Yâwɛɛ káa a ŋá mɛnii kélee.
Ŋa pâi ŋ́gili kɛ̂i mà.”
25Yâwɛɛ ŋɔmɛni lɛ́lɛɛi káa naa diai mɛni ma díkili káa mài, da diai da gɔ̀rii.
26Ǹɛ̂lɛi kú Yâwɛɛ maa kpɛ́ŋ a lii kpêle a gɛɛ é kúŋuŋ maa ƃó.
27Ǹyaŋ ǹɛ̂lɛi kú ǹíi kpêlei ŋí maa kɔ́ri a tãi kú káa la kúnuu ŋûnu kɔlɔi.
28Kwa kɛ̀ mɛni-soli kâai, fɛ̂ɛ kú sée a lii kpêle pere kú maa kpɛ̂ŋ kɛ́.
29Fɛ̂ɛ kú pɛ́lɛ gɔ́ɔ mu a ƃɛlɛ-pere. Tãi da kili kɛ-zu a pâi kɛ̂i naa kúmɛni ma.
30Núu da a kú lòkwa, é kúƃɛlɛ tóo, kwaa kúyee sée gélee mù.
31Kpɛ́ni fêi, Ǹuu-namui fa ǹyée kùla núu da mu wɔ́lɔ-wɔlɔ da wɔlɔ-wɔlɔ.
32Berei máŋ a pâ la a lii-too pôlui, maloŋ kâa káa ǹyêei.
Ŋɔwɛli kɛ́ maa kɛ́tɛi kóyaŋ fé ma.
33Ǹíi-nɛ̃ɛ mɛni fa núu da kɛ́ mɔ̃̀lɛ,
kpaa maloŋ too-maa é kɛ́ núu da ma.
34Da ƃɔ̀rɔŋ diai dîa díkaa kpini pɛ̂rɛ mui,
35dí núu da kpera a gɛɛ
vé lì Ŋ̀âla Kɛ́tɛi, ŋɛ́i túɛ,
36dí wôya mɛni ŋa tée a núu da, Ǹuu-namui è gélee kɔ́lɔŋ.
37À kɛ̀ Ǹuu-namui a wàla fáa ma, kwa pɔ̂ri mɛni da ƃôi a gɛɛ é kɛ́, m̀aa mɛ̂nii é kɛ́?
38Ŋ̀âla Kɛ́tɛi lá ƃé mɛni nyɔ́mɔɔ da ǹɛ́lɛɛ a kûla naa.
39A núu da kùla maa kɛ̂ ŋɔsɔnyɔ̂ŋ mɛni ma,
m̀aa nûui a ŋuŋ su-woo sàa lé mɛni ma?
40Kwa kúkpîŋ maa kpɛ́ɛ kú tínaŋ pôlu Yâwɛɛ pɔ́naa-pere.
41Kwa kúlii da kúyee lá ƃó Ɣâla mì kú vɛli, kûɛ mai,
42“Kwa sɔnyɔ̂ŋ kɛ́ a yá, kwa tɔɔ yâ, ǹyaŋ ífe kúsu mɛni lɛɛ̂i.
43“Ya ílii ŋwána, íkɛ kú kpɛ́, íkɛ kú su kàra. Ífe kúmalôŋ káa ní.
44Ya ímɛi pɛ́lɛ a ɣele-kɔlɔŋ a gɛɛ ífe kúfɛli-wooi mɛ̂ni.
45Ya gɛ́ nûa dífa díyee sèe kúmu ŋ̀éniɛi su.
46“Kúkpɔara-ƃelai da díla tɔɔ̂i kûa.
47Mɛni kpaya-kpaya da kulâi nɔ́ kûa, kúsu kɛ́ kàra. Kwa yaôi, ŋuŋ ma ƃô fé kúyêei.
48Ŋánûai su-kara pere a gɛ̂i ŋ́gɛ wɔ̀lɔ ŋ́ɛi-ya kɛ́ yèŋ yɛ̂ɛ ya lêe.
49“Ŋ́ɛi ya a pâi kɛ̂i nɔ́ pûi, góyaŋ fé mà,
50é lɛ́ɛ la zu Yâwɛɛ é lɛ́ɛ Ɣâla-taa é ḿbɔ naa pêre káa.
51Lii too pôlu káa ḿâ m̀ɛni-ŋai mɛni ma kɛ̂i a ǹɛyâai daa lêei sui.
52“Ŋ́gbɔara-ƃelai díkaa ŋ́gɔ̂rii yɛ̂ɛ wɔ̃ni,
berei máŋ fé tá mɛni nyɔ́mɔɔ da kɛ́ ní la a diai.
53Dí ḿbili lôai a ḿvulu,
dí kɔni-ŋa pú ḿɛi.
54Ǹyái è ḿɛi pɛ̂lɛ.
Ŋá kɛ̀ gâai ŋa pá saâi.
55“Ŋá kɛ̀ ǹóai kpóŋ ma ŋá láɣi a ílaa, óo Yâwɛɛ.
56Ǹyaŋ tãi ŋá wɔ̀lɔ la yâ kpɔŋ mâa mɛni mai,
í íwoli tɔ̀ɔ ḿâ.
57Tãi ŋá ítòli lai, í lɛ̀ɣɛ a ńyãa yɛ̂ɛ ḿâi,
‘Ífe yào.’
58“Óo Ǹuu-namui, í pà ŋáwɔlɔ-wooi ma, í ŋ́uŋ ma ƃó.
59Óo Yâwɛɛ, ya m̀ɛni nyɔ́mɔɔ-ŋai káa da gɛ̂i a ńyãai.
Ŋá mɛnii ŋáa tée a ǹɛ́lɛɛ.
60Í m̀ɛni nyɔ́mɔɔ-ŋai kɔ́lɔŋ gbɛtɛ̂i dílii su é pîlaŋ ḿâi.
61“Óo Yâwɛɛ, í díwòo yɔ̂ŋ-ŋai mɛ̀ni dí bìli ḿâi.
Mɛni nyɔ́mɔɔ-ŋai dí gbɛ̀tɛ a gɛɛ dí gɛ́ a ǹyãai, í gɔ́lɔŋ.
62Ŋ́gbɔara-ƃelai díkaa mɛni nyɔ́mɔɔ kpɛ̂tɛi é pîlaŋ ḿâ a ɣele kélee.
63M̀ɛnii kélee da kɛ̂ gɛ̂i, da kɛ̂ nɔ́ ɣɛ́lɛ maa kulâi ŋ́gbonôi wule-woo su a ɣele kélee.
64“Dísɔnyɔ̂ŋ-ŋai gula maa kɛ́ a dia, óo Yâwɛɛ.
65Gɛ́ díkili-ŋa é tɛi, í dínaɣaŋ láa.
66Óo Yâwɛɛ ílii ŋwânai su, dí kɔ́ri ƃɛ́i kélee da lɔ̂ naai, í dísu kara.
Dítɔnɔ da kpîŋ fé lɛ̀ɛ ŋ̀éniɛi su.”
Currently Selected:
Zerusâlɛŋ Karáa Maa Wɔ̂lɔ-wooi 3: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia