Zasua 2
2
Zasua è mɛni maa kpɛɛ-ƃela tɛ̀ɛ Zɛleko
1Nya ƃe Nuŋ ǹóŋ Zasua è mɛni maa kpɛɛ kpakolo feerɛ tɛ̀ɛ loo-pêre su dí kúla Akesia ƃɛ́i díƃûui è kɛ̀ naai, ǹyɛɛ dîai, “Ka lí ká Keena lɔii maa kpɛ́ɛ, ŋuŋ kpîŋ ƃa Zɛleko taa-leei.” Nya ƃe dí lì. Dí seriɛɛ naai, dí lɔ̀ wulu-wulu kɛ́ nɛni tɔnɔ ŋɔpɛ́rɛi mu dí nyíi naa. Ǹɛniî ŋí láa ƃé a Leea. 2Maa kpînii tí nɔ́ ƃé Zɛleko kaloŋ é mɛ̀ni la a gɛ́ɛ Eezuɛ-ŋai da-ni dí káa daa lêei su a gɛ́ɛ dí ǹɔii maa kpɛ́ɛ. 3Nya ƃe gâloŋ è nɔii kpɛ́-ƃelai da-ŋa tɛ̀ɛ Leea pɔ́ naa dîyɛ mai, “Gbakolo feerɛi díkaa ípɛrɛi mui, dí tɛ́ɛ, kpɛ́ni fei, dí pà a gɛ́ɛ dí ǹɔii gwaa kélee maa kpɛ́ɛ.”
4Kɛ́lɛ ǹɛniî è gbakolo feerɛi lòo. Nya ƃe è mò dîa ǹyɛɛi, “Tɔ̃yâ ma, kpakolo feerɛ dí pà ḿbɔ, kɛ́lɛ fé ƃɛ́i kɔ́lɔŋ dí kùla naai. 5Ǹyaŋ dílɛɛ pâi daa-lêei ŋɔsiɣãŋ láa tɛ̂i a ŋ̀ele wûlii, dífeerɛ dí kùla bɛ́rɛi mu. Kɛ́lɛ fé ƃɛ́i kɔ́lɔŋ dí lì naai. Kà lɛ̀ɛ dípôlu a maa félaa, ka pâi dísoniî.” 6Ǹɛniî è nâa gbakolo feerɛi lòo ŋɔpɛ́rɛi ŋ̀elêi pere ǹyaa kpîŋ é kala pù dímɛi. 7Nya ƃe gâloŋ ŋɔnûai dí pɛ̀lɛ m̀ɛni maa kpɛɛ-ƃela feerɛi ŋí kpɛ́ɛ ma é lɛ́ɛ la zu dí seri Zɔdiŋ Ya-leei lá. Ǹûai ŋí dí kùla kpɔ́ nɔ́ daai su, dí gónaŋ lá tɛ̀.
8Tãi m̀ɛni maa kpɛ́ɛ kpakolo feerɛi ŋí dí kɛ̀ lâani lai, Leea è ŋɔ́nɔ lì bɛ́rɛi ŋ̀elêi pere ƃɛ́i è dí lòo naai, 9ǹyɛɛ dîai, “Ŋá gɔ́lɔŋ a gɛ́ɛ Yâwɛɛ a ǹɔii ŋí tɛ́ɛ kápɔ. Kámaa tûŋ a seri kûa ǹyaŋ kúkelee kúkaa nâa yaôi kâa, 10kpɛ́ni fêi, kú mɛ̀ni berei Yâwɛɛ è ǹyái kpàla la kátuɛ kákɛɛ kulâi Ize lɔii sui. Kú ŋɔ́nɔ mɛ̀ni berei ká Siɔŋ da Oŋ pàa la da diai kɛ̀ a Amɔra-ŋai díkâloŋ feerɛi Zɔdiŋ Ya-leei pôlu da berei ŋɔ́nɔ ká nàa-ƃelai pâa lai. 11M̀ɛ̀nii ŋí mɛniɛɛ kûɛi, kú yào kpɔ́ a ŋ̀ánaa. Berei kú kátuŋ mɛ̀ni lai, lii kpêle fé kɛ́ ní núu da kélee yêei ŋɔ́nɔ, kpɛ́ni fêi, Yâwɛɛ Káɣâlai ƃa Ŋ̀âlai gáa ŋ̀elei su da ǹɔii mɛi. 12M̀ɛni ma, ka kákono tée ńyêei Yâwɛɛ láai su a gɛ́ɛ berei ŋá kásòŋ la a ǹɛ́lɛɛi, káa máŋ ka pâi ńzoniî tí a ǹɛ́lɛɛ kwa ŋápɛrɛi mu-ƃelai. Ka ŋɛi kɛ́-maa sɛŋ-lɛɛ ńyêei. 13Ka kákono tée a gɛ́ɛ kà pà, káfe pâi ńâŋ, ńee, ńzaaƃɔlɔ-sinaai, ńêɣe da ńîa ǹɛyâai da dípɛrɛi mu-ƃelai kélee da paâi. Ǹyaŋ ka pâi kúŋuŋ ma ƃôi.”
14Nya ƃe Zinâai dí mò mà dîyɛɛi, “À kɛ̀ ƃa wàla m̀ɛnii ŋí da ƃó núu da ma a gɛ́ɛ kú pà ǹɔii ŋí maa kpɛɛ̂i, kwa pâi tûai a yá a ǹɛ́lɛɛ à kɛ̀ Yâwɛɛ a ǹɔii ŋí tɛ̀ɛ kúpɔ, kwa wàla gɛ́ tí, gɛ̀ ní Ɣâla é kúpaa”
15Nya ƃe Leea è ɣɛli kpûlɔŋ wônai lá a gɛ́ɛ ǹûai dí yéŋ la galai pôlu pere, kpɛ́ni fêi, Leea ŋɔpɛ́rɛi è kɛ̀ galai kpono ma. 16Nya ƃe è mò dîa ǹyɛɛi, “Ka lí ǹyéei su ka káloo naa fólo saaƃa yée mu, ka kásoŋ-ƃelai ká fa lâa koyɛ̂ŋ la. À kɛ̀ kásoŋ-ƃelai da pà pôlu, gɛ̀ ní ka lí pôlu káƃûui su.”
17Ǹûai dí mò ma dîyɛɛi, “Kwa pâi gono têei ŋí ŋ̀aa-see kɛ̂i nyíi ƃa gɛ́ kwa kúfoo la íyêei. 18Ƃɛ́ káa, tãi kwa pâi pâi la a gɔ́i ǹɔii ŋí sui, ŋ̀ɛli kpɔ̂lui ŋí píli íwônai lá ƃɛ́i í kútɛ̀ɛ naai. À kɛ̀ tí, í ínâŋ, ílee, da ípɛrɛi mu-ƃelai kélee ŋáa tɛ́ ma ípɛrɛi mu. 19Kɛ́lɛ à kɛ̀ núu da kélee a kùla bɛ́rɛi mu a lì ŋ̀énei ŋá, gɛ̀ ní è lì zaâi kɔ̂rii, kúsɔŋ fé pâi kɛ̂i zu. Kɛ́lɛ à kɛ̀ núu da a ǹyée pɛ̀lɛ ípɛrɛi mu-ƃelai da ma, gɛ̀ ní kúa ƃé gɛ̀. 20Kɛ́lɛ à kɛ̀ ƃa m̀ɛnii ŋí da ƃò núu da ma, gɛ̀ ní kúfe pâi gono têei ŋ̀aa-see kɛ̂i nyíi kú gɛ̀ íyêei.” 21È mò dîa ǹyɛɛi, “Yɛ̂ɛ ƃerei ka m̀ó lai, tɔ́ɔ é kɛ́ tí.” Nya ƃe ǹûai dí lì, ǹyaŋ é ŋ̀ɛli kpɔ̂lui ɣíri ŋɔwônai lá.
22Nya ƃe m̀ɛni-maa kpɛ́ɛ-ƃelai feerɛi dí lì ǹyéei su dí gɛ́ naa a fólo saaƃa é lɛ́ɛ la zu dísoŋ-ƃelai lì díkɔ̂rii dí lene pôlu Zɛleko, kpɛ́ni fêi, dí díkɔ̀ri kwa kélee ma dífe díkaa ní. 23Gɛ́ɛ tíi, ǹúu feerɛi ŋí dí kùla ǹyéei su dí ǹya lêei tíyeŋ dí lí Nuŋ ǹóŋ Zasua pɔ́ naa dí m̀ɛnii kélee ƃó mà nyíi kɛ̀ a dîai. 24Dí mò Zasua ma dîyɛɛi, “Tɔ̃yâ ma Yâwɛɛ a ǹɔii kélee tɛ́ɛ kúpɔ, ǹyaŋ ǹɔii su-ƃelai kélee da nâa yaôi kûa.”
Currently Selected:
Zasua 2: KWB
Highlight
Copy
Compare
Share
Want to have your highlights saved across all your devices? Sign up or sign in
© 2012 Bible Society in Liberia
