Zasua 13
13
Ǹɔii nyíi a lɛ̀ɛ ziɣe mɛ̂ni mai
1Zasua è nâa kɛ̀ a bɔlɔɔ a ŋ̀ánaa. Nya ƃe Yâwɛɛ è mò mà ǹyɛɛi, “Yaâ nâa pɔlɔ a ŋ̀ánaa kɛ́lɛ lɔii támaa káa niî naa ziɣe mɛ̂ni ma. 2Maa lɔii-ŋai ká ŋí: Felesia-ŋai dílɔii da Gɛsɔ-ŋai dílɔii kélee, 3é síɣe Siɔŋ Ya-leei ma nyíi gáa a Ize ŋɔkoyaŋ-perei, é lí vóloi kulâi-pere pere é seri Ɛkulɔŋ lɔii ŋɔkoyaŋ-perei ma. Ǹɔii ŋí è kɛ̀ a Keena lɔii da. Kâloŋ lɔ́ɔlu ƃé kɛ̀ Felesia taa-lêe-ŋai ŋí mɛi: Geza taa-leei, Asɔdɔ taa-leei, Asikɛlɔŋ taa-leei, Gâa taa-leei, Ɛkulɔŋ da Aviŋ lɔii. 4Ǹɔii nyíi-ŋai gáa niî naa ziɣe mɛ̂ni mai dia ƃa Keena-ŋai dílɔii kélee da Meara taa-leei nyíi gáa a Sidɔŋ-ŋai dílɔii, é tóo Afɛ lɔii ma é seri Amɔra-ŋai dílɔii ŋɔkoyaŋ-perei ma, 5Geba-ŋai dílɔii, Lɛƃanɔŋ-ŋai dílɔii kélee, gɛ́ lî vóloi kulâi-pere, é siɣe Beega é lí Ɛmɔŋ Yeei kwára é seri Ama taa-leei ma. 6Ǹɔii-ŋai ŋí kélee káa a Sidɔŋ-ŋai dílɔii nyíi-ŋai kɛ̀ Lɛƃanɔŋ Yeei loai da Mɛsefɔ lɔii.” Yâwɛɛ è mò Zasua ma ǹyɛɛi, “Ńyãa kpîŋ ŋa pâi ǹûai ŋí kpɛ̂i kátuɛ. Ǹɔii ŋáa kɔ́lɛ Eezuɛ-ŋai dîa yɛ̂ɛ berei ŋá mò la yâi. 7Ŋ̀áa kɔ́lɛ zîi lɔ́ɔlu mɛi náaŋ da Manasɛ ŋɔsuui kpéli ma.”
Zɔdiŋ Ya-leei vóloi kulâi-pere lɔii-ŋai ŋáa kɔ́lɛ mɛni
8Yâwɛɛ yée mu nuui Mose è nâa kpɛ̀ɛ a ǹúu sûu saaƃai ŋí díwɔ̂ lɔii tɛɛ̂i dípɔ. Dia ƃé kɛ̀ a Manasɛ ŋɔuui gbéli, Lubiŋ da Gâa. Ǹɔii-ŋai ŋí dí kɛ̀ Zɔdiŋ Ya-leei pôlu vóloi kulâi-pere. 9Dílɔii è sìɣe máŋ Aroɛi, nyíi gáa Ano tiŋ-tiŋ kóyaŋ ma da daa-lêei gáa Ano tiŋ-tiŋ sámai é pɛ́lɛ Mɛdeba tiŋ-tiŋ lɔii ma é tóo Dibɔŋ lɔii ma. 10Dílɔii è Amɔra-ŋai díkâloŋ Siɔŋ nyíi zéɛɛ è kɛ̀ Ɛsibɔŋ ŋɔlɔii kélee sìɣe é lí Amɔŋ-ŋai dílɔii ŋɔkoyaŋ-pere ma. 11Ǹɔii è Gilia lɔii sîɣe, Gɛsɔ-ŋai dílɔii, Maka-ŋai dílɔii, Ɛmɔŋ Yeei ma lɔii kélee da Basãŋ-ŋai dílɔii é tóo Saleka lɔii ma. 12Ǹɔii è ŋɔ́nɔ Atarɔ da Ɛdira kaloŋ Oŋ ŋɔlɔii kélee sìɣe. Oŋ è kɛ̀ a ŋ̀wála-wâla-ƃelai dɔnɔ nyíi lɛ̀ɛ ǹɔii ŋí mai. Kɛ́lɛ Mose è gbéli-ŋai yée mɛi ɣàle é díkpɛ. 13Eezuɛ-ŋai dífe Gɛsɔ da Maka-ƃelai kpɛ́ ní. Da dîa-ni díkaa sâa Eezuɛ lɔii ma é too gɔlɔi ŋí pɔ̃yɛ tãi ma.
14Mose fé ǹɔii da tɛɛ ní Liiva-ŋai dísuui pɔ́. Díwɔ̂ kɔ̃̂liŋ ƃa géreŋ sala sãai nyíi ǹûai da pâ la Eezuɛ Ɣalai Yâwɛɛ pɔ́, yɛ̂ɛ berei è góno tèe la díyêei.
Ǹɔii ká ŋí dí dɛ̀ɛ Lubiŋ pɔ́ da ŋɔnûai
15Mose è Lubiŋ ŋɔsuui su-ƃelai díwɔ̂ lɔii tɛ̂ɛ dípɔ yɛ̂ɛ berei dísuui káa lai. 16M̀ɛni ma dílɔii è kùla Ɛroɛ nyíi gáa Ano tiŋ-tiŋ kóyaŋ ma é seri daa-lêei ma gáa díŋ-tiŋ kpîŋ sâmai é Mɛdeba tiŋ-tiŋ lɔii kélee síɣe, 17é tóo Ɛsibɔŋ da ǹaa taa-leei kélee kɛ̀ díŋ-tiŋ sui ma. Ǹɔii è lì Dibɔŋ, Bemobaa, Bɛbemiɔŋ, 18da Zea, Kedɛmo, Mɛfaa, 19Kiriata, Sima, Zeresara Yeei ma tiŋ-tiŋ su, 20Bɛpeɔ, Piga Yeei pɛ̂rɛi pere da Bɛzɛsimɔ lɔii. 21Ǹɔii ŋí è Siɔŋ, Amɔra-ŋai díkâloŋ ŋɔlɔii kélee sìɣe da ǹyéei ma lɔii-ŋai. Mose è Siɔŋ yée mɛi ɣâle da Midiaŋ kaloŋ-ŋai ŋí Evi, Lekeŋ, Zɔɔ, Ɔɔ, da Leba. Díkelee dí kɛ̀ a lɔii kâloŋ-ŋa Siɔŋ yée mu. 22Eezuɛ-ŋai dí dɛli kpɛ́-nuui Belaŋ pàa máŋ a tãi dí kɛ̀ gâloŋ-ŋai ŋí paâi lai. Belaŋ è kɛ̀ a Beɔ ǹóŋ surɔŋ. 23Lubiŋ-ŋai dílɔii è kòyaŋ Zɔdiŋ Ya-leei ma. Ǹɔii ŋí da zu taa-lêe-ŋai ƃé kɛ̀ a Lubiŋ ŋɔsuui su-ƃelai díwɔ̂ kɔ̃liŋ yɛ̂ɛ berei dísuui káa lai.
Gâa ŋɔsuui su-ƃelai díwɔ̂ lɔii
24È Gâa ŋɔsuui su-ƃelai díwɔ̂ lɔii tɛ̀ɛ dípɔ yɛ̂ɛ berei dísuui káa lai. 25Gâa-ŋai dílɔii è Zezɛ lɔii sîɣe, Gilia taa-leei kélee da Amɔŋ-ŋai dílɔii gbua, é tóo Ɛroɛ, nyíi gáa Laba vóloi kulâi-perei, 26é kúla Ɛsibɔŋ é tóo Lema-mipɛ da Bɛoniŋ, é kúla Meaniaŋ é tóo Dibɛ lɔii ma, 27é lí Bɛaraŋ tiŋ-tiŋ su, Bɛnira, Sukɔ da Zafɔŋ, é Siɔŋ kaloŋ ŋɔlɔii kpéli sìɣe nyíi kɔyɛŋ Zɔdiŋ Ya-leei mai, é tóo Galalii Poai kwára pere lɔii ma, Zɔdiŋ Ya-leei ŋûa-pere. 28Ǹɔii ŋí da zu taa-lêe-ŋai é pɛ́lɛ gbanâŋ-ŋai dîa ƃé kɛ̀ a Gâa-ŋai díwɔ̂ kɔ̃liŋ yɛ̂ɛ berei dísuui káa lai.
Ǹɔii dí dɛ̀ɛ Manasɛ ŋɔsuui su nuu-kpului dɔnɔ pɔ́ kɛ̀ Zɔdiŋ Ya-leei kɔlɛ vóloi kulâi-perei.
29Mose è Manasɛ ŋɔsuui su nuu-kpului dɔnɔ ŋɔlɔii tɛ̂ɛ bɔ́. È ǹɔii tɛ̀ɛ bɔ́ yɛ̂ɛ berei ŋɔsuui káa lai. 30Dílɔii è sìɣe Meaniaŋ, é Basãŋ lɔii gwaa kélee síɣe nyíi Oŋ è kɛ̀ ǹaa mɛi a kâloŋ, da Zea taai buu lɔ́ɔlu mɛi dai kélee. 31È Gilia lɔii gbua sîɣe, é seri Asatarɔ da Ɛdire lɔii ma da Basãŋ kaloŋ Oŋ ŋɔtaa lêe-ŋai kélee. Dí ǹɔii ŋí tɛ̀ɛ Manasɛ ǹóŋ Mesɛɛ pɔ́ yɛ̂ɛ berei ŋɔsuui káa lai.
32Ǹɔii-ŋai ká ŋí Mose è ŋ̀áa kɔ̀lɛ tãi è kɛ̀ la Môa lɔii sui. Ǹɔii-ŋai ŋí dí kɛ̀ Zɔdiŋ Ya-leei kɔlɛ vóloi kulâi-pere é síɣe Zɛleko. 33Kɛ́lɛ Mose fé ǹɔii da tɛ̀ɛ ní Liiva-ŋai pɔ́, kpɛ́ni fêi, Eezuɛ Ŋɔɣâla Yâwɛɛ ƃé gáa a díkɔ̃liŋ yɛ̂ɛ berei è mò la dîai.
Currently Selected:
Zasua 13: KWB
Highlight
Copy
Compare
Share
Want to have your highlights saved across all your devices? Sign up or sign in
© 2012 Bible Society in Liberia
