Zooɛ 3
3
Ɣâla a pâi ǹɔii-ŋûŋ-ŋai dímɛnii ŋá têei
1Yâwɛɛ ǹyɛɛ, “M̀aa ɣêle-ŋai tí su, ŋa pâi Zuda da Zerusâlɛŋ dítɔɔ-sãai da tɛɛ̂i pôlu. 2Ŋa pâi ǹɔii-ŋûŋ-ŋai kélee ŋáa tɛ̂i ma ŋa pá a dîa Zeosafa potoi su, naa ƃé ŋa pâi dímɛnii ŋáa têei naa ŋánûai mɛni ma da Eezuɛ nyii gáa a ŋápɔɔ-sɛŋ kpɛ́ni fêi, da ŋánûai táa-tâa ǹɔii-ŋûŋ-ŋai su, da ŋálɔii ŋáa kɔ́lɛ. 3Ǹyaŋ ká kpɛɛŋ tôo ŋánûai mɛ̂ni ma, ká zina-nɛyãai kɔ́lɛ wulu-wulu kɛ́ nɛni-ŋa pôlu, ka nɛya-nɛyãai kɔ́lɛ ŋwã̂ai pôlu ká gbele.
4“Óo Taya da Sidɔŋ, é pɛ́lɛ Felesia lɔii-kpiniŋ-ŋai dîa kákaa a lé ḿɛni ma? Ká káa ŋɔ́nɔ ḿvela-fêi sɛŋ da mɛni ma. Gɛ̀ ní ŋa pâi kásɔŋyɔ̂ŋ kélee pûi káŋûa a maa-felaa. 5Ká ŋákanei sìɣe, ŋágôoi, é pɛ́lɛ ŋátɔɔ-sãai dîa ká lí a dia káɣâla fɛli-pɛrɛ-ŋai mu. 6Ka Zuda da Zerusâlɛŋ-ƃelai kɔ́lɛ Gurii-ŋai dîa lɔii kôya-ŋa su. 7Kɛ́lɛ ŋa pâi díkulâi ƃɛ́i ká díkɔ̀lɛ naai, ǹyaŋ ŋa pâi kásɔnyɔ̂ŋ-ŋai pûi káŋûa. 8Ŋa pâi kálônii-sinaai da kálônii-nɛyãai kɔlɛ̂i Zuda-ƃelai dîa, ǹyaŋ da pâi dí kɔlɛ̂i Sabiyaŋ-ƃelai dîa lɔii kôya su.”
9“M̀ɛnii ŋí ƃó ǹɔii-ŋûŋ-ŋai su:
‘Ka kákpîŋ kpɛ̀tɛ kɔ́kɔ mɛni ma.
Ka gɔ́kulu-ƃa-ŋai líi kpéle.
Gɔ́kɔ-ƃelai kélee tóli díkîe ma dí pá.
10Ka ká kâli-ŋai ɣále a ƃóa-sɔkpɔ-ŋa,
ka kási-sãai kula kpawɔ-ŋai kélee kpɛ̀tɛ a sɔ̀ala-ŋa.
Tɔɔ vii-kpɛ̂ɛ nuui é mo ǹyɛɛ, “Ŋ́gaa a kɔkûlu-ƃa.”
11Ka pá a maa-felaa
káai a ǹɔii-ŋûŋ-ŋai ƃɛ́i,
ká káŋãa tɛ́ ma ǹyá ƃolo-ƃoloŋ su.’ ”
Pá a íkɔkuluƃa-ŋai óo Yâwɛɛ!
12“Tɔɔ ǹɔii ŋûŋ-ŋai kélee dí díkpîŋ kpɛ̀tɛ,
dí pá Zeosafa ya ƃolo-ƃoloŋ su.
Kpɛni fêi, ǹaa ƃé ŋa pâi seêi naa
ŋá ǹɔii ŋuŋ-ŋai kélee ƃɛ́i dímɛnii ŋáa-tee.
13Dí ŋwana-lɔɔi a ŋánaa.
Ka dí tée yɛ̂ɛ berei
da mɔlɔŋ tèe lai.
Ŋa díluaŋ yɛ̂ɛ berei da m̀á kpɔmɔ ƃa luâŋ la
é lɛ́ɛ la zu é bú-sɛŋ-foloi láa fɛ́ɛ
gɛ́ yèŋ lai.”
14Núu wála támaa
káa mɛni ŋãa-tee ya-ƃolo-ƃoloŋ su.
Yâwɛɛ ŋɔɣelei a lɛ̀ɣɛ
mɛni ŋá-tee mɛni ma ǹyá-ƃolo-ƃoloŋ su.
15Vóloi fé pâi toôi, ŋ̀áloŋ fé pâi fôloi
ǹyaŋ ƃɛ́mɛlɛŋ-kao-ŋai dífe pâi fôloi.
Ɣâla a pâi lûwa toôi ŋɔnûai dîa
16Yâwɛɛ wóo káa tɛ̂i Zãiyɔŋ Yeei ma.
Ŋ̀óo kɛ́ kùla Zerusâlɛŋ,
ŋ̀ele-kɔlɔŋ da ǹɔii díkɛ kpɛ̃lîŋ.
Kɛ́lɛ Yâwɛɛ káa a ŋɔnûai mɛi káa-nuu,
dɔɔ̂i kpanaŋɔɔ ŋɔnûai Eezuɛ-ŋai mɛni ma.
17“Ka pâi ŋ́gɔlɔnii naa a Yâwɛɛ Káɣâlai,
nyii gáa Zãiyɔŋ Yeei mai, ŋáyee maa-waai.
Zerusâlɛŋ a pâi kɛ̂i a maa-waa. Ŋɔ̃́ya da kélee yée fé ŋɔ́nɔ pâi tɛɛ̂i naa.
18Maa ɣêlei tí ŋwã̂ai nɛ̃ɛ a pâi kulâi ǹyée kpaya-kpayai su,
niŋa-ŋini-ya kɛ́ kula ǹyée pɛlɛ-pɛlɛi su,
ǹyaŋ Zuda ya-pɛlɛɛi kélee láa a pâi fɛ̂ɛi a yá.
Ya-lêe a pâi kulâi Yâwɛɛ ŋɔpɛ́rɛi mu
é Akasia ya-ƃolo-ƃoloŋ láa fɛ́ɛ.
19“Ize lɔii a pâi lɛɛ̂i kpɛ́ni-kpɛni.
Idɔŋ lɔii é lɛ́ɛ a fɛ̃ɛ-kpâlaŋ,
dí mɛni nyɔ́mɔɔi mɛni ma nyii dí gɛ̀ a Zudai.
Kpɛ́ni fêi, dí kɔ́ pɛ̀lɛ Zuda-lɔii ma,
dí zu-ƃelai páa nyii-ŋai dífe mɛni nyɔ́mɔɔ kɛ́ níi.
20É máŋ kɛ́ tí, núu a pâi kɛ̂i nɔ́ Zuda
da Zerusâlɛŋ lɔii su wɔ́lɔ-wɔlɔ da wɔ́lɔ-wɔlɔ.
21Ŋa pâi ŋánûai díkpâi kulâi.
Fé pâi mɛni nyɔ́mɔɔ kɛ́-ƃelai su mɛni lɛɛ̂i,
kpɛ́ni fêi, ńyãa Yâwɛɛ káa Zãiyɔŋ Yeei ma.”
Currently Selected:
Zooɛ 3: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia