M̀ɛni-sâa Ƃó-ƃelai 5
5
Dibora da Bara díwulei
1Nya ƃe Dibora da Bara nyíi kɛ̀ a Aƃiaŋ ǹóŋ-surɔŋ dí ŋ̀ule ŋí tòo a m̀aa ɣelei tí:
2Laa maa tɛ̂ é tɛ́ɛ Yâwɛɛ pɔ́!
Eezuɛ-ƃelai dí díkpîŋ kpɛ̀tɛ a gɛ́ɛ dí kɔ́.
Ǹûai dí kɔ̀ kpɔ́ a kili kûla pere.
3Kâloŋ-ŋa, ka káwoli tɔ́ɔ!
Káai a ǹuu láa túɛ-ƃelai, ka káwoli tɔ́ɔ!
Ŋa pâi pêle kɛ̂i, ŋá wule tóo Eezuɛ-ŋai Díɣâlai Yâwɛɛ ma.
4Yâwɛɛ kuláa Siɛ Yee kpaya-kpayai ma
Idɔŋ lɔii kpiniŋ sui, ǹɔii è kpɛ̀liŋ.
Tuna è pú kpɔ́ a zu kɛ́tɛ.
Yá è kùla ŋ̀ele-kɔlɔŋ su.
5Ǹyée kpaya-kpayai dí kpɛ̃liŋ Eezuɛ Ŋɔɣâlai Yâwɛɛ ŋɛ́i túɛ. Sana Yeei máŋ è kpɛ̃liŋ.
Dí tàa-taa Yâwɛɛ ŋɛ́i túɛ nyíi gáa a Eezuɛ Ŋɔɣâlai.
6Ana ǹóŋ-surɔŋ Saŋka ŋɔtãi ma,
Zaɛɛ ŋɔtãi ma,
bɔni tɔɔ núu-kpulu kɛ́tɛi su-ƃela dí fa kàa tɛ̀ɛ ǹɔii su.
Zia-ƃelai da kâa tɛ̀ɛ a bere m̀aa tíyeŋ pere-ŋai.
7Kpâlaŋ ŋá tii kɛ́ mɛni-ŋa dí too pôlu Eezuɛ lɔii su,
é lɛ́ɛ la su yá Dibora í pá,
í pá yɛ̂ɛ Eezuɛ ǹee.
8Eezuɛ-ŋai díkɛ̀ ɣâla da kpɛ́ni fɛlîi.
Kɔ́ è tòo dí lɔii su.
Kɔ-kuluƃa maa kɔ̃ɔ kɔli-kalaŋ kpaa máŋ kpála-ŋa kàa
Eezuɛ sinaa wála buu náaŋ yêei?
9Ŋ́gili tɔɔ̂i Eezuɛ kɔ-kuluƃa-ŋai dîa,
nyii-ŋai díkili kùla a lii-nɛ̃ɛ pere dínûai sáma.
Kwaa Yâwɛɛ láa maa tɛ́!
10Káai kélee seêni káwɛlɛ-sôo kole-ŋai mɛi, káai kélee seêni ká kâloŋ see-sãai ŋái, káai máŋ liî kwaa-ŋa mai, ka m̀ɛnii ŋí duŋ too.
11Ka káwoli tɔ́ɔ ŋ̀ule-woo-ŋai dîa kulâi ǹya loai lái!
Ǹûai díkaa lônoi é pîlaŋ Yâwɛɛ ŋɔwála-wala-laai ma.
Nya ƃa gɛ́ Eezuɛ-ŋai da díkpɔara-ƃelai yée mɛi ɣále!
À kɛ̀ tí, Yâwɛɛ ŋɔkɔ-kuluƃa-ŋai da pâi siâi díkpulu ma dí lí dítaa-lee-ŋai maa konaŋ-ŋai lá.
12Dibora, tɔɔ kútuɛ! Ímu siɣe, ítɔɔ kútuɛ!
Ímu siɣe í tɔɔ kútuɛ, í wule too!
Aƃiaŋ ǹóŋ Bara ímu siɣe í dí kpɛ́.
Diai í dí soŋ gɔ́i sui, lí a dia.
13Ǹuu-namui ŋɔnûai kpéli-ŋai
dí pà dí kpɛtɛɛ dí kɔ́ mɛni ma.
14Gɔ kɔ́-ƃelai dí kula Ifiraŋ lɔii kpiniŋ su ƃɛ́i Amaleka-ŋai dí wɔ́lɔ kɛ̀ seêni naai, dí pá diŋ-tiŋ su.
Bɛŋsima suui su-ƃelai díkɛ̀ dítuɛ-pere.
Dí kɔ kɔ́-ƃelai láa túɛ-ƃelai dí pà dí kúla Makɛ.
Dí núu kpaya-kpayai dí kùla Zɛbulɔŋ.
15Isaka suui su-ƃelai láa túɛ-ƃelai da Dibora ni dí pà.
Tɔ̃yâ ma Isaka suui su-ƃelai da Bara ni dí pà máŋ.
Ǹyaŋ dí lɛ̀ɛ bôlu dí yéŋ diŋ-diŋ su.
Kɛ́lɛ Lubiŋ suui su-ƃelai díwoo fé kɛ́ ní zu tɔnɔ.
M̀ɛni ma dífe pɔri ní pâi gɔ́i ma.
16Lé ƃé gɛ̀ díkɛ lɛ̀ɛ pôlu m̀ála-ŋai kɔlɛi?
Káai a Lubiŋ suui su-ƃelai ká lɛ̀ɛ m̀ála konaŋ kɔlɛ lé mɛni ma?
Ká lɛ̀ɛ naa a gɛ́ɛ m̀ála mɛi káa-ƃelai da kɛ̀ m̀ála-ŋai tôlii ká kɛ́ díwoo mɛ̂ni?
Tɔ̃yâ ma Lubiŋ suui su-ƃelai díkɛ̀ a díŋaa kɔlɛɛ.
M̀ɛni ƃé dí fé pɔri ní pâi la.
17Gâa suui su-ƃelai dí lɛ̀ɛ Zɔdiŋ Ya-leei pôlu vóloi kulâi-pere.
Daŋ suui su-ƃelai dí lɛ̀ɛ tîma-ŋai kɔlɛ.
Asɛ suui su-ƃelai dia máŋ dí lɛ̀ɛ Yúo kɔlɛ ma,
dí kɛ́ sìa a góo.
18Kɛ́lɛ Zɛbulɔŋ da Nɛfɛtɛli dísuui su-kɔ kɔ́-ƃelai,
dí dífulu-laai see a sɛ́ɣɛ gɔ́ kɔ́ ɣenei ŋá.
19Kú kɛ́ɛ Taana taa leei su, Mɛgido ya loŋ kɔlɛi,
Kaloŋ-ŋa dí kɔ́ pɛ́lɛ kûa.
Keena kaloŋ-ŋai dí kɔ̀ kúpɔ,
kɛ́lɛ dí fé káne tɔnɔ kpîŋ kula ní kúyêei.
20Bɛ̂mɛlɛŋ káo-ŋai dí gɔ́i da kɔ̀.
Díkɛ sia-sîai ŋ̀ele-kɔlɔŋ m̀éla kélee ma,
dí kɛ̀ kɔ̀ Sisela pɔ́.
21Kisɔŋ Yai è fɛɛ é lí a Sisela ŋɔkɔ-kuluƃa-ŋai.
Kisɔŋ ya ŋíliŋ su kpanaŋɔ̂ɔi a ɣele kéleei.
Ŋa pâi liî kɔ́ ma. Ŋa pâi liî kɔ́ ma a lii kpele-pere a ɣele kélee!
22Sisela ŋɔkɔ kɔ́-soo-ŋai díkɛ pûi,
dísolo tíŋ kuláa yɛ̂ɛ ŋ̀ele gbâna.
23Yâwɛɛ ŋɔkélai è mò ǹyɛɛ, “Ye Mɛrɔ taa leei fóo.
Ye vóo. Ye vóo da ǹaa ƃelai kélee.
Dífe pá ní a gɛ́ɛ dí kpɔ́ŋ Yâwɛɛ ma.
Dífe pá ní yɛ̂ɛ kɔ-kuluƃa a gɛ́ɛ dí kɔ́ mì.”
24Ka ƃaa kɛ́-maa támaa tɛ́ɛ Zaɛɛ pɔ́.
Nya ƃa Keena nuui Ɛƃa ŋɔnɛnîi.
Ka ƃaa kɛ́-maa támaa tɛ́ɛ bɔ́ m̀ûu su nɛyãai sáma.
25Sisela è yá fɛ̀li ma, kɛ́lɛ è niŋa ŋini-ya tɛ̀ɛ bɔ́.
È niŋa ŋini-ya kìi-kpɛɛ tɛ̀ɛ bɔ́ káne sɛŋ-folo su.
26È ƃûu koôŋ soŋ wuru tɔnɔ sìɣe,
é kpɔ́-kpɔ síɣe a ǹaa mii yêe.
È ŋ̀úruii kpàmo Sisela ŋuŋ ma,
é ŋ̀uŋ wólo la.
27Sisela fé pɔri ní tɔɔ̂i ŋ̀ɛ́i.
È tòo gɔ́ɔ mu é láa tɔ̀ŋ.
Sisela è pìlaŋ gbelêŋ ŋá é tóo gɔ́ɔ mu.
È tòo ǹɔii ma a boma.
28Sisela ǹee è ŋuŋ ma laa ŋɔwônai lá. È mò ǹyɛɛ,
“Lé ƃé kɛ̀ ŋɔkɔ́ kɔ́-keleŋ fé niî pá nii?
Lé ƃé kɛ̀ ŋɔkɔ́ kɔ́-soo-ŋai dífe pâi a maa félaai?”
29Dáre nɛyãai dí ŋ̀óo su tòo,
kɛ́lɛ è kɛ̀ nɔ́ lônoi, gɛ́ mò ǹyɛɛ,
30“Díkaa nɔ́ sãâ kɔ̂rii a gɛ́ɛ dí gula yêei kɛ́ dí ŋ̀áa kɔ́lɛ,
díkɛ nɛnî tɔnɔ-tɔnɔ kpaa feerɛ tɛ̀ɛ kɔ-kuluƃa tɔnɔ pɔ́,
díkɛ tɔɔ-nuu maa seɣe tɛ̀ɛ Sisela pɔ́,
díkɛ pà a yɔlɛ sɔ̃ɔ kpanaŋɔɔ a gɛ́ɛ gâloŋ nɛnii é doo gɔŋ ma.”
31Óo Yâwɛɛ, tɔɔ íkpɔara-ƃelai kélee dí sáa a berei sîi tɔnɔi tí.
Kɛ́lɛ tɔɔ íwɛli kɛ́-maa-ƃelai dífolo yɛ̂ɛ fólo nɛ̂nɛŋ!
Nyíŋi pôlu ma lii sêe è kɛ̀ Eezuɛ lɔii su a kóraŋ buu náaŋ.
Currently Selected:
M̀ɛni-sâa Ƃó-ƃelai 5: KWB
Highlight
Copy
Compare
Share
Want to have your highlights saved across all your devices? Sign up or sign in
© 2012 Bible Society in Liberia