Azaya 63
63
Yâwɛɛ è ǹɔii ŋûŋ-ŋai yée mɛi ɣâle
1“Gbɛ̂ɛ ƃe ŋí m̀aa ɣiriɛ̂ɛi kpɔ́ ŋí a ǹɛ́lɛɛ ŋɔyokpo kpɔ̂lui su, gɛ́ kùla Boza taa-leei su Idɔŋ lɔii-kpiniŋ su a wála-wâla-laa gɛ́ pâi?”
Yâwɛɛ ká tí, ŋ̀wála-wâlaai a gɛ́ɛ é ŋɔnûai ŋuŋ-ma ƃó. Gáa pâi a gɛ́ɛ é ŋɔkpɔara-ƃelai yée mɛi ɣále tuŋ too da ŋɔŋuŋ-maa ƃô wala-wala-laai.
2“Ŋɔseɣei kpɔ̂lu pêre kɛ̂ɛi léŋ ŋí yɛ̂ɛ núu ƃé kpɔmɔ-ƃa táŋ-nîi a gɛɛ é ŋwã̂ai kpɛtɛ a ǹyái?”
3Yâwɛɛ è zu-too ǹyɛɛi, “Ŋà ƃɔ́rɔŋ ǹɔii ŋûŋ-ŋai dîa yɛ̂ɛ núu a ƃɔ̀rɔŋ kpɔmɔ-ƃa ma. Núu da fé naa é kpɔ́ŋ ḿâ. Lii ŋwâna ƃé gɛ̀ ŋ́gɛ gɛ̀ tí. Díŋãa a táa-tâa ŋáseɣei ma a zòŋ. 4Ŋánûai ŋuŋ ma ƃó tãi a seri. Tãi a seri a gɛ́ɛ ŋá díkɔara-ƃelai kula maa kɛ́. 5È kɛ̀ a guláa a ńyãa a gɛ́ɛ tãi ŋá ǹaa kàa lai, núu da fé kɛ́ ní naa é kpɔ́ŋ ḿâ. Kɛ́lɛ, ŋálii-ŋwânai è ŋ́wàla-wala, é gɛ́ ŋá díyee mɛi ɣále ńyãa kpîŋ. 6Ŋá ńii ŋwàna, ŋá sía ǹɔii-ŋûŋ-ŋai mɛi, ŋá dítaa-tâa. Ŋá díŋãa pû ǹɔii ma.”
Yâwɛɛ ŋɔmɛni lɛ́lɛɛi gáa Eezuɛ mɛni mai
7Ŋa pâi Yâwɛɛ ŋɔwɔ́lɔ-wɔlɔ wɛ̂li-kɛ-maai maa mɛ̂ni ƃôi.
Ŋa ǹáa maa tɛ̂i é pîlaŋ la m̀ɛnii a gɛ̀ kûɛi, mɛni ma.
A lûwa láa kpɔ́ Eezuɛ ma a ŋ̀ánaa
ŋɔwɔ́lɔ-wɔlɔ wɛli-kɛ-maai da ŋɔmaloŋ kâa laai mɛ̂ni ma.
8Yâwɛɛ è m̀o ǹyɛɛi, “Díkaa a ŋánûa, dífe pâi ḿbɛlɛ̂i.” M̀ɛni ma, è díŋuŋ mâ ƃò, 9é díkula dímɔ̃lɛ-laai su. Ɣâla-taa kêla fé m̀ɛnii ŋí kɛ́ ní. Kɛ́lɛ Yâwɛɛ ǹyaa kpîŋ ƃé díŋuŋ mâ ƃò. È díŋuŋ mâ ƃò ŋɔmaloŋ kâai da ŋɔwɛli kɛ́-maai sârai. A wɔ́lɔ dímɛi kâa nɔ́ a bɔlɔ. 10Kɛ́lɛ, da wɔ́lɔ dípôlu tɔ̀ɔ nɔ́ m̀a, díkɛ́ gɛ̀ Ŋɔmɔ̃̂leŋ Maa Waai líi kɛ́ tòo pôlu. Nya ƃe Yâwɛɛ è kɛ̀ a díkpɔara-nûu, é kɔ́ dípɔ.
11Nya ƃe tãi pɔlɔ-ŋai nyii kɛ́ a Yâwɛɛ ŋɔtii-kɛ-nuui Mose ŋɔtãi, kíli è tòo díŋa. Dí mare-kɛ̂ɛ kɛ̀ dîyɛɛi, “Mí ƃé Yâwɛɛ nyii wɔ́lɔ ŋɔnûai láa túɛ-ƃelai ŋuŋ mâ ƃò, é díkula yúo sui káa naai? Mí ƃé Yâwɛɛ nyii wɔ́lɔ Ŋɔmɔ̃̂leŋ Maa Waai tɛ̂ɛ ŋɔnûai sámai káa naai? 12-13Mí ƃé Yâwɛɛ nyii mɛni kpaya-kpaya kɛ̀ a ŋɔwála-wâla laai Mose sarâi, gɛ́ ǹyuoi ŋáa kɔ̀lɛ, gɛ́ tɔ̀ɔ ŋɔnûai túɛ díkɛ tɛ̀ɛ ǹyái loai a gɛ́ɛ ǹûa díkɛ ǹáa maa tɛ̂ wɔ́lɔ-wɔlɔ da wɔ́lɔ-wɔlɔ.”
Yâwɛɛ kɛ́ɛ dítuɛi, díkɛ̀ siâi, dífa kâreŋ yɛ̂ɛ lɔɔ-sôo-ŋa ƃé kîrɛ siɣêi, dífa kâreŋ. 14Yâwɛɛ Ŋɔmɔ̃leŋ è gɛ̀ dí dífii tɔ́ɔ yɛ̂ɛ niŋa-kpûlu ƃé da liî la lɔii lɛ́lɛɛ ma. È tɔ̀ɔ ŋɔnûai ŋɛ́i túɛ a gɛ́ɛ é gɛ́ ƃaa kɛ́ maa é kɛ́ ǹáa ma.
Ɣâla fɛliɛɛ ŋ̀ɛi-maloŋ kâa da kpɔŋ-mâ mɛni ma
15Yâwɛɛ, yái íkaa Ɣâla-taa íkwaa ma waai ma da ífolo-laai sui, lɛɛ naa í kú káa ǹɔii ma ƃɛ́. Kwa pɔ̂ri gɔ́lɔnîi léŋ a gɛɛ íkpaaŋɔ̂ɔi kú mɛni ma? Íwala-wâla laai káa mí? Íwɛ̂li-kɛ-maai da íŋɛi-maloŋ kâai káa mí? Ífe nia kûa. 16Yá ƃé íkaa a kúnâŋ. Kúnâŋ-pɔlɔ-ŋai Eberaɣɛ̃ɛ da Zeeka dífe kú kɔ́lɔŋ, kɛ́lɛ yá, Yâwɛɛ ƃa kúnâŋ. Yá ƃa ǹúui nyii a wɔ́lɔ kúŋuŋ-ma ƃò a tãi kéleei. 17Lé mɛni ƃé í ǹɛɛ la naa kúkɛ pú, kúkɛ kula íyêei? Lé ƃé gɛ̀ í kɛ́ ǹɛɛ naa kúkɛ woli kpɔ̂lɔ kùla, kúkɛ kú pôlu tɔ̀ɔ yâi? Pá pôlu, diai tíi kɛ̂i yɛ̂ɛi, da diai díkaa wɔ́lɔ ípôlui, dí mɛ̂ni ma.
18Ípɛrɛi è kɛ̀ ínûa maa waai yêei a tãi lòŋ, kɛ́lɛ díkpɔara-ƃelai dí pá dí ǹaa sòŋ dí ǹaa su kara. 19Ya tûai nɔ́ a kûa yɛ̂ɛ sɛŋ ƃé ífe tá kɛ́ ní a kú mɛi nûu, kúaŋ kúkɛ ƃò a ínûa.
Currently Selected:
Azaya 63: KWB
Highlight
Share
Compare
Copy
Want to have your highlights saved across all your devices? Sign up or sign in
© 2012 Bible Society in Liberia
