Azaya 61
61
Ŋ̀uŋ-ma ƃô tuŋ lɛ́lɛɛi
1Ŋ̀wála-wâla kélee Yâwɛɛi Ŋɔmɔ̃̂leŋ káa ḿbôlu.
A ńziye zu a ńdɛɛ,
a gɛ́ɛ ŋá dùŋ lɛ́lɛɛi ƃô gôlo-ƃelai dîa,
diai dílii toɔɔ̂i pôlui, ŋá díŋa nɛnɛ,
diai díkaa kɔ-sôŋ laa sui, ŋá díŋuŋ-mâ ƃó túŋ tòo,
diai díkaa kpini-pɛrɛ mui ŋá dí maa-tee.
2A ńdɛɛ a gɛ́ɛ ŋá Yâwɛɛ ŋɔkóraŋ lɛ́lɛɛi maa tûŋ too.
Ŋ̀elei a seri,
Yâwɛɛ a pâi pâi ŋɔnûai ŋuŋ-ma ƃó mɛ̂ni ma,
é díkpɔara ƃelai yée mɛi ɣalei.
A ńdɛɛ a gɛ́ɛ diai wɔ́lɔi, ŋá díŋa nɛnɛ,
3Diai díkaa maloŋ tôo maa su Zãiyɔŋ, ŋá pâi díŋa-nɛnɛ̂i.
Ŋa pâi kâloŋ ƃɔrɔ lɛ́lɛɛ seêi díŋûa luu pɔ́ɔ ŋá.
Ŋa pâi wúlɔ pûi díŋûa lii-nɛ̃ɛ kɛ́ ƃò dîa dífa ŋɔ́nɔ malôŋ see ƃò.
Ŋa pâi gɛ̂i nûa díkɛ dílaa ma yɛ̂ɛ núu a yokpo tòo ma. Ŋa pâi ǹii-too pôlu mɔleŋ kulâi díkponôi.
Da pâi dítôlii a teniŋ ƃô wuru-ŋa
nyii Yâwɛɛ ǹyaa kpîŋ è zì a gɛ́ɛ nûa díkɛ ǹáa màa tɛ̀.
4Da pâi daa-lêe-ŋai nyii dípuɔɔ su a kôyaai, tɔɔ̂i pôlu ŋɔ́nɔ.
5Ŋɔ̃́ya-ŋa da pâi kɛ̂i ká ƃála-ŋai ŋá kɔnîi.
Da pâi kɛ̂i tíi kɛ̂i kákpâlaŋ-ŋai ŋá, díkɛ kákpɔmɔ-ƃa kpalaŋ-ŋai mɛi kâa.
6Da pâi ká tôlii a Yâwɛɛ ŋɔsâla láa-soŋ ƃela,
Ɣâla ŋɔtíi kɛ́-ƃela.
Ka pâi ǹɔii-ŋûŋ-ŋai dítɔɔ-sãai ŋàa-nɛ̃̂ɛ kulâi,
ká kɛ́ yoŋka tèe a gɛ́ɛ díkaa a ká pɔ́ɔ.
7Káŋumɛi da káƃaa-kûla-maai da pâi kpɛɛ̂i.
Ka pâi seêi ká kpɔɔi lɔii su,
kátɔɔ-laai su é kɛ́tɛ gîei feerɛ.
Koi-nɛ̃̂ɛ a pâi kɛ̂i kâa wɔ́lɔ-wɔlɔ.
8Yâwɛɛ è mò ǹyɛɛ,
“Ŋá teniŋ ƃô-laa wɛ́lini, ŋuma da wôya m̀ɛni ƃɛlɛ fé ŋ́goi.
Ŋa pâi ŋánûai féla-fêi a tɔ̃yâ laa,
ŋá wɔ́lɔ-wɔlɔ da wɔlɔ-wɔlɔ kpanaŋ-woo kɛ́ díyêei.
9Ǹɔii-ŋûŋ-ŋai kélee da pâi díkɔlɔnîi.
Diai nyii pâi ŋánûai kâai, da pâi ŋánûai kɔ́lɔnîi
a gɛ́ɛ díkaa a ŋánûa nyii-ŋai ŋá lûwa tòo dîai.”
10M̀ɛnii Yâwɛɛ è gɛ̀i Zerusâlɛŋ a m̀aa koi-nɛ̃ɛ kula.
Zerusâlɛŋ a m̀aa ɣíri yɛ̂ɛ nɛnî ƃé liî surɔ̂ŋ kulâi.
Ɣâla a Zerusâlɛŋ m̀aa ɣíri a ƃálo-laa da yee-tɛɛ maa lâa.
11Berei kpɔ́ nɔ́ da sí-sɛŋ sì la, é sóo é ƃɔlɔi,
Ŋ̀wála-wâla kélee Yâwɛɛi a pâi ŋɔnûai ƃâloi.
À kɛ̀ tí, ǹɔii-ŋûŋ-ŋai su ƃelai kélee da pâi ǹaa maa tɛ̂i.
Currently Selected:
Azaya 61: KWB
Highlight
Share
Compare
Copy
Want to have your highlights saved across all your devices? Sign up or sign in
© 2012 Bible Society in Liberia
