Azaya 59
59
Ɣâla ŋɔlóno kɛ́-nuui è ǹûai dísɔnyɔ̂ŋ mɛni ƃò dîa
1Ka gɔ́lɔŋ a gɛ́ɛ sɛŋ da fé naa nyíi a Yâwɛɛ perêi kpàaŋ núu da ŋuŋ ma ƃó mɛni ma, kpaa máŋ ŋ̀óli tíniŋɔɔ, va ká fɛli-wôoi mɛ̂ni. 2Kɛ́lɛ kásɔnyɔ̂ŋ ƃa gɛ́ ka Káɣâlai ni kámaa a kôya gîe ma. Kásɔnyɔ̂ŋ a gɛ́ a ŋ̀ɛ́i lóo kâa, kà kɛ̀ vɛlîi, va káwoo su tòo. 3Kákaa a lɛ́ɛ-ƃela, mɛni su-kara-ƃela, da núu paa-ƃela. Kákaa a sɔŋyɔ̂ŋ-ƃela, kákɛ ƃò a núu nyɔ́mɔɔ-ŋa.
4Káfa nûa dímɛni ŋá tèe a teniŋ ƃô-pere. Káfa dɔ̂ŋ ƃô a zã́a. Ka káwoli tɔ̀ɔ nɔ́ lɛ́ɛ mɛni-ŋa dîa. Ka mɛni nyɔ́mɔɔ-ŋa kpɛ̀tɛ é pîlaŋ nûa dîa, ká gɛ́ a dîa. 5-6Káŋwana-lɔ̂ɔ mɛni kpɛtɛɛi káa nɔ́ yɛ̂ɛ kali ŋwâna. Núu a mìi, a sâa. Gáa yɛ̂ɛ kali ɣâloŋ. A pòrɛ, kali nɔ́ ƃa kûla zu. Kɛ́lɛ, káfe pâi mɛni lɛ́lɛɛ da sɔlɔ ƃoi kámɛni kpɛtɛɛi su. Díkaa nɔ́ yɛ̂ɛ núu a seɣe pâla a sĩi-nanɔ̂ɔ. Kátii-ŋai káa nɔ́ a sɔnyɔ̂ŋ tee-tee. Kákɛ mɛ̂ni-ŋai káa nɔ́ a mɛni su kara mɛ̂ni tee-tee. 7Kákɔɔ maa félaai a gɛ́ɛ ká mɛni nyɔ́mɔɔ kɛ́. Káfa kálii maa sôŋ a gɛ́ɛ ka ǹúui páa nyii zɔ̀ŋ fé mai. Kákili-ŋa-sîai káa nɔ́ a mɛni nyɔ́mɔɔ maa kíli-ŋa-sia. Ƃɛ́i kélee ka tɛ̂ɛ naai, ka ǹaa su kàra, ǹaa é lɛ́ɛ a pilêŋ. 8Káfe berei kɔ́lɔŋ ka pɔ̂ri kɛ̂i la lii-sêe sui. Káfa tûa a teniŋ ƃô-pere. Kátûa-pere kélee káa nɔ́ a pere kpĩ́naŋɔɔ. Ǹúui nyii kélee a lɛ̂ɛ kátûa-pere mai, va lii-sêe sɔlɔ ƃô.
Eezuɛ-ƃelai dí dísɔnyɔ̂ŋ-ŋai ƃô
9Ǹûai dí m̀o dîyɛɛi, “Kwaâ m̀ɛnii kɔ́lɔŋ Ɣâla fé kúŋuŋ-mâ ƃôi la kúkpɔara-ƃelai yêei. Kwa kɛ̀ kwaa ponoɔɔ kɔ̂rii a gɛ́ɛ kú sia zu, kɛ́lɛ kpíni nɔ́ ƃé a kɛ̂ a doɔ́ɔ kûa, 10ǹyaŋ a gɛ̀ kúkɛ sìa nɔ́ yɛ̂ɛ ŋɛi-pû-ƃela. Kwa kúkɔɔ tuâi a vólo tɛ́ɛ ŋuŋ mai, kú tóo a vólo maa-laai yɛ̂ɛ sɛŋ ƃé kwa kɛ̀ siâi a kpíni, kwa kɛ̀ ŋ̀wála-wala-ƃelai sáma, kúkɛ ƃò yɛ̂ɛ saa-ƃêla. 11Kwa kɛ́ nyîɣɛi yɛ̂ɛ ditala-ŋa, kúkɛ wɔ̀lɔ a malôŋ-pere yɛ̂ɛ tòloŋ-ŋa. Kwa teniŋ ƃô-laa kɔ̂rii, kɛ́lɛ kúfa gàa. Kwa ƃálo-laa kɔ̀ri, kɛ́lɛ gɛ̂i kôyaa kûa.
12“Yâwɛɛ, kúsɔnyɔ̂ŋ su a kɛ́tɛ íŋɛi-tuɛ. Kúsɔnyɔ̂ŋ a kúmaa-sêre faa kɛ́ yɛ̂ɛ berei kúkaa lai. Kútɔ̂ŋ-karaai káa nɔ́ kúkponôi kú tɔɔ́ yâ, ǹyaŋ kwa kúmɛni nyɔ́mɔɔi kɔ́lɔŋ. 13Kúsɔnyɔ̂ŋ-ŋai ƃa tɔ̂ŋ-karaa, yá Yâwɛɛ, ímaa-sîa toɔɔ. Kú tɔɔ̂i yá Yâwɛɛ yâ, kwa kúpôlu tɔɔ ísɛŋ lɛ́ɛi ma. Kwa nûa lùaŋ, kúkɛ nûa pɛlɛ wôo-ŋa ƃò, kúkɛ lɛ́ɛ kɛ̀. 14Kwa teniŋ ƃô-laa kpɛ́, tɔ̃yâ mɛni kɛ́ɛ a gɛ̂i kôyaa kûa. Kúfe ŋɔ́nɔ tɔ̃yâ mɛni-ŋa kɛ̂i m̀ɛni-sàa ƃó kwaa-ŋai ma. Mɛni sã́a kɛ́ɛ fé ŋɔnɔ kútûa-pere-ŋai su. 15Tɔ̃yâ-laa fé ŋɔ́nɔ naa. Diai da dípôlu tɔ̀ɔ mɛni nyɔ́mɔɔ kɛ́ɛ mai, mɛni nyɔ́mɔɔ-ŋa ƃa pâ dípɔ.”
Yâwɛɛ è gbîŋ kpɛ̀tɛ a gɛ́ɛ é ŋɔnûai ŋuŋ ma ƃó
Yâwɛɛ è gàa a gɛ́ɛ teniŋ ƃô-laa fé kɛ́ ní ŋɔnûai tûa-pere su. M̀ɛnii ŋí è ǹíi tòo pôlu. 16Gulâai a ǹyaa a gɛ́ɛ núu da fé naa é kpɔŋ mâa tɛɛ ǹûai da dí lúanîi da pɔ́. M̀ɛni ma, a pâi díkpɔara-ƃelai yée mɛi ɣâlei, é ŋɔnûai ŋuŋ-ma ƃó a gbîŋ wàla-wala-laa. 17A pâi tɔ̃yâ-laa pɛlɛ̂i geŋe lá yɛ̂ɛ kɔ-kûluƃa keŋe lá kɔli-kalaŋ, é ƃálo-laa wàla-wala pɛlɛ ŋ̀ûa yɛ̂ɛ kɔkuluƃa ŋɔgba-ƃɛ́lɛ. A pâi mɛni kpa kuláa kɛ́ɛ toôi m̀a yɛ̂ɛ yòkpo, é m̀aa ɣirîi a lii-ŋwâna yɛ̂ɛ sɛŋ kpóŋ see-nuu, é gɛ́ mɛni-ŋa su é sã́a, é diai kula maa kɛ́ da nûa mɔ̃̀lɛi. 18A pâi ŋɔnûai kula maa kɛ̂i m̀ɛni nyɔ́mɔɔ-ŋai dí gɛ̀i, m̀aa mɛ̂ni ma. Diai díkaa lɔii-ŋûŋ su kôyaa sui, a pâi máŋ díkula-maa kɛ̂i. 19Ǹûai da pâi yaôi m̀a ŋɔwála-wala-laa kɛ́tɛi mɛ̂ni ma, é síɣe vóloi kulâi pere é tóo ǹîi pere. A pâi pâi yɛ̂ɛ ya-ɣɛ̂li da fãa kɛ́tɛ ƃé tɛɛ̂i.
20Yâwɛɛ è m̀o ŋɔnûai dîa ǹyɛɛi, “Ŋa pâi pâi Zerusâlɛŋ ŋá ká maa kɔ̃ɔ. Diai pâi dípôlu tɔɔ̂i dísɔnyɔ̂ŋ-ŋai diai, ŋa díŋuŋ maa ƃó. 21Ŋa pâi kpanaŋ-woo kɛ̂i káyêei. Ŋa pâi ŋámɔlêŋ tɛɛ̂i kápɔ ŋá ŋásɛŋ-lɛɛi ŋai lɛ́ɛ káyêei wɔ́lɔ-wɔlɔ. É síɣe sâa ma, ka pâi kɛ̂i a ŋ́oo mɛni-ƃela. Ka m̀ɛni-ŋai ŋí lɛ́ kálônii dîa, diaŋ dí ǹɛ́ a gɛ́ɛ dia máŋ da pɔ̂ri kɛ̂i a ŋ́oo mɛni-ƃela é síɣe sâa ma é lí tuɛ-pere.”
Currently Selected:
Azaya 59: KWB
Highlight
Share
Compare
Copy
Want to have your highlights saved across all your devices? Sign up or sign in
© 2012 Bible Society in Liberia
