Azaya 57
57
Yâwɛɛ è tɔ̀ɔ Eezuɛ-ŋai dîa díɣâla pɔkɔɔŋ-ŋai fɛli mɛnii ma
1Ǹúu sɔŋ lɛ́lɛɛ-ŋai da sâa, kɛ́lɛ núu da fa târe m̀aa mɛ̂ni-ŋai su, kpaa máŋ nûa díkɛ a díkpaaŋɔɔ m̀ɛni ma. Da sàa, da kûla m̀ɛni kpɔ̂lu-ŋai su. 2Diai da sîa a teniŋ ƃô perei, da sàa da lî lii-sêe su. Da kɛ̂ fii tɔ̂ɔ su.
3Sɔnyɔ̂ŋ-ƃela, ka pá ká tɔ́ɔ m̀ɛni ŋá-teɛɛi ŋá! Kámaa fé nɛ̃ɛ ní é tɛ́ɛ dɛli kpɛ́-ƃelai, ŋ̀ulu-wulu kɛ́-ƃelai da ǹɛyâai da díkpîŋ tɛ̀ɛ sinâa pɔ́ sɛŋ mɛni mai dîa. 4Gbɛ̂ɛ ƃé ka ɣɛ́lɛ maa kulâi gbonôi? Gbɛ̂ɛ ƃé ka ká lá tâɣai kpɔ́ tí a zu kɛ́tɛ, kákɛ kánɛŋ kùla mai? Káfe a tɔɔ ma-ƃela da diai pɛlɛ káa díkponôi dílônii? 5Ká kɛ̀ nyiî a ǹɛyâai ôo wuru-ŋai mu ƃɛ́i ka káɣâla-pɔkɔɔŋ-ŋai fɛ̂li naai. Ka kɛ̂ kálônii kulâi naa a sâla gɔni-wôlo-ŋai su ǹyée-ŋai loai. 6Ka kɔni-ŋa sàa, ká díkɛ a káɣâla-ŋa, ká kɛ́ dífɛ̀li. Ka kɛ̂ ŋ̀wã̂ai sama-sãa da mii-sãa sama sãa tɛɛ̂i dípɔ. Ká lâai la kátûa-pere sãŋ-ŋai ŋí ƃɛlɛ káa ŋ́goi a gɛ́ɛ ńii é kɛ́ a ǹáa káyêei? 7Ka lî ǹyée kpaya-kpayai tôŋ su ká sâla-ŋa kula naa, ká kɛ́ lɔ-pɔ̂rɔŋ kɛ̀ naa a ǹɛyâai. 8Ka ɣâla pɔkɔɔŋ-ŋai tɔ̂ɔ kákpôŋ-ŋai pôlu da kákpôŋ falaŋ-ŋai ŋá. Ka tɔ̂ɔ ḿâ, ka kámaa sêɣe-ŋai kúla kâa, ka nyíi a káwɛli-ŋai kágbìŋ-ŋai ŋá, ká kákpîŋ líi láa, ká dífela fé. Ka kɛ̂ lâani kagbìŋ-ŋai ŋá, káŋɛi pîlaŋɔɔ díkâŋ ma kákɛ díkàa sĩ́i. 9Ka káwulɔ kúŋ nɛ̃ɛ-ŋai pû kâa, ká wúlɔ kpâne sia, ká lí a gɛ́ɛ ká Molɛ ɣalai fɛli. Ká kɛ̀ ɣâla kɔ̂rii. Ka kéla-ŋa tɛ̀ɛ kwaa kôya-koyaa-ŋa maa ponoɔɔ ma a gɛ́ɛ dí lí dí da-ŋa kɔ́ri kâa. Ká kpîŋ kéla-ŋa tɛ̀ɛ saa táa. 10Ká kɔlɔ kpɛ̂ɛ kâa ɣâla da kpɛ́ni-ŋa kɔ́ri mɛni su, kɛ́lɛ káfii fé kpɛ̀ɛ ní nyíŋi kélee su. Ka lâai la káɣâla pɔkɔɔŋ-ŋai da pɔ̂ri kponoi kpânaŋ tɛɛ̂i kápɔ kɔlɔ fa wɔ́lɔ kpɛ̀ɛ kâa.
11Yâwɛɛ a m̀ôi ǹyɛɛi, “Ŋ̀âla-ŋai kɔɔ da kɛ̂ kámaa yaôi, a gɛ́ɛ ká kɛ́ a lɛ́ɛ-ƃela ka nia ḿâ kpɔ́ kpúŋ? Káfe ŋɔ́nɔ yaôi ḿâ, kpɛ́ni fêi, ḿɛi saâi a zu-kôyaai? 12A nɛ̃ɛ ma kpîŋ ŋá káteniŋ ƃô-laai da kátua-pere lɛ̂lɛ-ŋai maa mɛni ƃó, dífe pâi kpɔŋ mâa tɛɛ̂i kápɔ. 13Kà wɔ̀lɔ kpɔŋ mâa mɛni ma, tɔɔ ŋaŋ káɣâla pɔkɔɔŋ-ŋai dí kpɔ́ŋ kâa, dí káŋuŋ ma ƃó. Vãai a pâi tɛɛ̂i a dia, ǹyaŋ ńɛwo a pâi dífɛ̂ɛi yɛ̂ɛ láa kpâla. Kɛ́lɛ diai pâi díkili tɔɔ̂i ḿâi, ǹɔii a pâi kɛ̂i a dípɔɔ, ǹyaŋ ŋáyee maa waai ma a pâi kɛ̂i a díkɛ̂i.”
Ɣâla è góno tèe kpɔŋ mâa da ƃâlo-laa mɛni ma
14Yâwɛɛ è m̀o ǹyɛɛi, “Ka berei su sã́a, ká zu kpɛtɛ ŋánûai mɛni ma. Ka díperêi kpáaŋ sãai kélee kúla naa. Ka berei su sã́a, ká zu kpɛtɛ ŋánûai tɛɛ mɛ̂ni ma!
15“Ŋ́gaa a Ŋ̀âlai nyíi dɛ̂ɛi ɣelêi wɔ́lɔ-wɔlɔ da wɔ́lɔ-wɔlɔi, nyíi ǹáa maa waai. Ŋ́gaa ɣele ma wɔ́lɔ-wɔlɔ da wɔlɔ-wɔlɔ. Ŋ́gɛ̂i káa ŋ̀elêi su póŋ-poŋ gwaa maa waai ma. Kɛ́lɛ ŋ́gaa diai sáma dímaa yeŋɔɔi, díkɛ dílii maa fâleŋ a gɛ́ɛ ŋá dílaa-laai, da díkili-kɛ-zui su-kpanaŋ. 16Ŋa fúlu-laa tɛ̀ɛ ŋánûai pɔ́. Fé pâi ŋɔ́nɔ da sɔŋ siɣêi kpaa máŋ ŋá ńii ŋwána dîa wɔ́lɔ-wɔlɔ da wɔ́lɔ-wɔlɔ. Ńyãa ƃé vúlu-laa lɛwoi tɛ̂ɛ dípɔ. 17Ŋá ńii ŋwàna dîa dísɔnyɔ̂ŋ-ŋai mɛ̂ni ma, da dísɛŋ wɛ̂li-tuai, ŋá díkula maa kɛ́, ŋá ńyee kúla dímu. Kɛ́lɛ dí kɛ̀ nɔ́ a díwôlii kpɔ̂lɔɔ, dífa dílii maa fàleŋ, díkɛ nɔ́ díkpɔɔi mɛni-ŋa kɛ̀.
18“Ŋá dítûa-pere-ŋai maa kpɛ̂ɛ, kɛ́lɛ ŋa pâi díƃâloi. Ŋa pâi díteniŋ tɔɔ̂i, ŋá kpɔ́ŋ dîa. Diai malôŋ see ƃôi díkɛ wɔ̂lɔi, ŋa pâi díŋa-nɛnɛ̂i. 19Ŋa lii-sêe tɛ̀ɛ núu kélee pɔ́, diai díkaa kwaa kôyaa mai, da diai dílɛɣɛ̂i a ńyãai. Ŋa pâi ŋánûai ƃâloi. Ńyãa Yâwɛɛ ƃé m̀o tí. 20Kɛ́lɛ ŋwana-lɔ̂ɔ-ƃela díkaa nɔ́ yɛ̂ɛ yúo nyíi va wɔ́lɔ kpèra toôi. Gáa nɔ́ tɛ̂i gɛ́ tòo gɛ́ pà a kala da pɔ̂rɔ. 21Ŋuŋ ma ƃô kwaa ma fé naa sɔnyɔ̂ŋ-ƃela mɛni ma. Ńyãa Yâwɛɛ ƃé m̀o tí.”
Currently Selected:
Azaya 57: KWB
Highlight
Share
Compare
Copy
Want to have your highlights saved across all your devices? Sign up or sign in
© 2012 Bible Society in Liberia
