Azaya 35
35
Maa wâa-laa maa perei
1Vɛ̃ɛ-kpâlaŋ-ŋai da ǹɔii kpâlai da pâi lii-nɛ̃ɛ kulâi,
kala-ŋa dí tɛ́niŋ vɛ̃ɛ-kpâlaŋ-ŋai su.
2Vɛ̃ɛ-kpâlaŋ-ŋai da ǹɔii kpâlaŋ-ŋai da pâi kɛ́i wule-ŋa toôi díkɛ lii-nɛ̃ɛ kùla a zu-kɛ́tɛ.
Gwaa-ŋai ŋí ma a pâi kɛ̂i a ǹɛ́lɛɛ yɛ̂ɛ Lɛƃanɔŋ Yee-ŋai ma.
Ǹɔii a pâi kɛ̂i a ǹɛ́lɛɛ gwaa-ŋai ŋí ma Kamɛɛ Yeei da Sarɔŋ tiŋ-tiŋ su.
Ǹaa-ƃelai kélee da pâi Yâwɛɛ ŋɔfólo-laai kâai,
dí Ɣâla ŋɔkɛ́tɛ-laai kɔ́lɔŋ da ŋɔwála-walai.
3Gɛ́ diai díyee su-saai, díyee su é kpanaŋ.
Diai díkɔɔ su-saai díkɔɔ su é kpanaŋ.
4Diai yao káa díkponôi, m̀ó dîa yɛ̂ɛi,
“Ka tɔɔ a gbanaŋɔɔ, káfe yào!
Káɣâlai a pâi kákulâi kákpɔara-ƃelai yêei,
é díkula maa kɛ́.”
5À kɛ̀ tí, diai díŋɛi pûɔi da pâi kwaa kâai,
diai díwoli tíniŋɔɔ̂i dí mɛni mɛ́ni.
6Diai díkɔɔ pûɔi da pâi dímu-siɣêi dí píli ɣelêi dí mã́la.
Diai dífa pɔ̂ri lônoi, díla a pâi fúlonîi, dí lóno dí wule-ŋa too a lii-nɛ̃ɛ pere.
Ya lêe-ŋa da pâi lâai vɛ̃ɛ-kpâlaŋ-ŋai su.
7Ƃɛ́i-ŋai ǹaa káa a ŋãya sui, póa-ŋa da pâi têei naa.
Ƃɛ́i-ŋai ǹaa káa a lɔii kpâla-ŋa mai, ya-ɣɛ̂li pɛlɛ-pɛlɛɛ-ŋa da pâi lâai naa.
Ƃɛ́i-ŋai lɔɔ-ɣîla-ŋa da kâa kɛ̀ naai,
kala a pâi pâra su.
8Pere-lêe a pâi kɛ̂i ƃɛ́i nûa da kâa kɛ̀ yaôi a gɛ́ɛ dí tɛ́ɛ naai.
Maa pere-leei ŋí láa ƃé pâi kɛ̂i a, “Bere-lêe Maa Waai.”
Vé pâi kɛ̂i a sɔnyɔ̂ŋ-nuu tɛɛ pêre.
Ɣâla ƃé pâi kɛ̂i nûa téniŋ tɔɔ̂i berei ŋí su.
Ǹúui kpîŋ táre da fé ŋ̀uŋ sui, a pâi pɔ̂ri tɛɛ̂i a berei ŋí.
9Yala-sûlu-ŋa da kélee fé pâi siâi a berei ŋí,
kpaa máŋ maa yâo ŋwana-lɔ̂ɔ fɛnɛ-sɛŋ da.
Díta fé pâi wɔ́lɔ tɛɛ̂i la.
Diai nɔ́ Yâwɛɛ a díŋuŋ ma ƃôi,
dia ƃé pâi kɛ̂i tɛɛ̂i la.
10Da pâi tɛ̂i Zerusâlɛŋ a lii-nɛ̃ɛ su-kɛ́tɛ.
Da pâi kɛ̂i wule-ŋa toôi, díkɛ lâɣi a lii-nɛ̃ɛ pere.
Da pâi kɛ̂i lii-nɛ̃ɛ kulâi wɔ́lɔ-wɔlɔ da wɔlɔ-wɔlɔ.
Maloŋ tôo-maa da lii-too pôlu fé ŋɔ́nɔ pâi wɔ́lɔ kɛ̂i dîa.
Currently Selected:
Azaya 35: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
