Azaya 29

Zerusâlɛŋ su-kara mɛni

1Kpalo-ƃêlai Ɣâla ŋɔtêbelei, Deeƃé ŋɔtaa-lêei Zerusâlɛŋ ma. Daa-lêei ŋí Deeƃé è wɔ́lɔ kɛ̀ seêni zu gɛ́ sama-sãa támaa tɛ̀ɛ, gɛ́ kúu kpaya-kpaya-ŋa kɛ̀ a kóraŋ kéleei, ǹaa su a pá karâi. 2Yâwɛɛ a pâi mɛni kpɔ̂lu ŋánaa lâai ǹaa-ƃelai dîa. Díla-sɛŋ nɔ́ ƃé pâi kɛ̂i a wɔ́lɔ su-kɛ́tɛ. Ǹaa a pâi kɛ̂i a Ɣâla-teƃele nyíi ŋ̀á kélee káa a ŋãa tee-teei. 3Yâwɛɛ a pâi naa maa tînani é naa soŋ ƃéla kélee ma. 4Zerusâlɛŋ taa-leei, ya pâi kɛ̂i wɔ̂lɔi yɛ̂ɛ mɔ̂leŋ ƃé wɔ̂lɔi ŋ̀óo kɛ́ kùla ǹɔii mu-pere nyíi núu da fa târe zui.

5Zerusâlɛŋ, íkpɔara-ƃelai kélee su a pâi karâi. Da pâi lâni kpɔ́ nɔ́ yɛ̂ɛ fãa a tɛ̀ɛ a muluŋ-kpôlo. Ǹyaŋ a pâi kɛ̂i tí a màa félaa, gúlaa a núu. À kɛ̀ tí, 6Ŋ̀wála kélee Yâwɛɛi a pâi íŋuŋ ma ƃôi a ŋ̀ele-gbâna ŋɔŋ, lɔii wóloɔɔ zu, tínaŋ-fãa su kpanaŋɔɔ da ŋɔŋ lêŋ su kɛ́tɛ. 7À kɛ̀ tí, gɔ-kuluƃa-ŋai kélee kɔ̂i daa-lêei pɔ́i, Ɣâla a pâi dísu-karâi da díkɔ kɔ́-sãai kélee. Dímaa mɛ̂ni a pâi kɛ̂i nɔ́ yɛ̂ɛ see-woo nyii kûla núu kíli ŋá a màa félaai. 8Ǹɔii-ŋuŋ-ŋai da gbɛ̀tɛ a gɛ́ɛ dí kɔ́ pɛ́lɛ Zerusâlɛŋ mai, díƃoloŋɔɔ̂i ǹúui ma puru a zoŋ a ŋ̀ánaa nyii a tɛɛ la a pela nyiî-pere, a ŋ̀ɛ́i lá-ƃo burui kɛ́ ƃò m̀ai, kpaa máŋ díƃoloŋɔ̂ɔi ǹúui ma kpele-wɛ̂li ŋánaa káa m̀a, nyii a tɛɛ la, a gbele seêi-pere, a ŋ̀ɛ́i lá-ƃo, gbele-wɛ̂lii kɛ́ ƃò niî m̀ai.

Núu kɛ́ɛ va ǹyée sèe lia-wôo mu

9Ka kɛ́ tûai yɛ̂ɛ ƃoo-ƃela ǹyaŋ káfe ƃoo ní! Ka kɛ́ nɔ́ tûai yɛ̂ɛ ŋɛi-pu-ƃela ǹyaŋ káŋɛi fé pú ní! Ka kɛ́ nɔ́ kɛ̂i tàka-taka ǹyaŋ lɔɔ fé káŋuŋ su! 10Káai a Ɣâla ŋɔlólo kɛ́-ƃelai, Yâwɛɛ a kákɛ tiiyɔɔ. A pá kápûi nyii su-kôyaa su. Káa ƃé ǹɛ̂lɛɛi ká kɛ́ a ŋ̀ɛ́i-gao, kɛ́lɛ kátûa-pere a gɛ́ a káŋɛi pú. 11Káfe ŋɔ́nɔ târei ŋ̀orɛ̂ woo-ŋai su Ɣâla a dɛ̀ɛ a káa zĩ̂a sui. Dímaa mɛ̂ni a kɛ́ nɔ́ yɛ̂ɛ kɔlɔ ƃé yɔlɛ kpíniŋɔɔ̂i la kpoo toɔ́ɔ ǹá zɔɔŋ toɔ́ɔ. Ya m̀aa kɔ̂lɔi tɛ̂ɛ kɔlɔ lóno-nuu da pɔ́ yɛ̂ ma kpera yɛ̂ gɔlɔi ŋí lóno ḿî, a pâi m̀ôi yâ a gɛɛ va pɔ̂ri gɔlɔi ŋí lônoi, kpɛ́ni fêi, ǹáa tɛ̂ɛi zɔɔŋ toɔ́ɔ. 12À kɛ̀ máŋ yà dɛ̀ɛ núu da pɔ́ nyíi vé kɔlɔ kɔ́lɔŋ yɛ̂ m̀a kpera yɛ̂ gɔlɔ ŋí lóno ḿî, a pâi m̀ôi yâ a gɛɛ vé kɔlɔ kɔ́lɔŋ.

13Ǹuu-namui è m̀o ǹyɛɛi, “Ǹûai ŋí da lɛɣɛ̂i nɔ́ a ńyãa a díla-woo folo. M̀aa kɛ́-maai da dɛɛ̂i ḿbɔi, vé kulâi dílii su. Da ḿvɛlîi nɔ́ kpɛ́ni-kpɛni. Díɣâla mɛni kɛ́ɛi káa nɔ́ a núu-kpune tûa-pere nyíi-ŋai da m̀aa kɔ́ri, gɛ́ ƃò díli ŋai. 14M̀ɛni ma, ŋa pâi mɛni mĩli-miliɛɛ-ŋa da mɛni kpaya-kpaya-ŋa kɛ̂i díŋɛi. Ŋa pâi gɛ̂i dáre-ƃelai dísamai, díkili ŋá é tɛi, ŋá gɛ́ mɛni lɛ́lɛɛ da kélee fa kûla ŋ̀ôya tare-ƃelai kponôi.”

Gili kɛ zúi gáa tínaa tuɛ-pere mɛni mai

15Kpalo-ƃêlai diai dîa da dímɛni kpɛtɛɛ-ŋai lôo Yâwɛɛ mai. Dímɛni kpɛtɛɛ-ŋai kélee káa loo-pêrei. Da kɛ̂ gâai yɛ̂ɛ núu da fé díkâai. 16Da m̀ɛnii kélee kpâmo a dôŋ. Pɔ̂rɔ leɣi da gbɛtɛ-nuu, gbɛ̂ɛ ƃé mɛni kpanaŋɔɔ̂i? Ǹúui a sɛŋ da kpɛtɛi, m̀aa sɛ̂ŋ a pɔ̂ri m̀ôi maa nuui ma ǹyɛɛi, “Yá fé ŋ́gbɛtɛ ní,” kpaa máŋ é mó ǹyɛɛ, “Ífe m̀ɛnii kɔ́lɔŋ ya gɛ̂i”?

17Ǹaa kuro à kɛ̀ tí, wôla a pâi pênei a kpâlaŋ ŋá tii kɛ́ lɔɔ, kpâlaŋ ŋá tii kɛ́ lɔɔ kɛ́ pène a wôla.

18M̀aa ɣêlei tí, diai díwoli tíniŋɔɔ̂i, da pâi mɛni mɛnîi. Núu à kɛ̀ kɔlɔ lônoi díkɔlɛ, da pâi m̀aa nûui ŋɔkɔlɔ lóno-wooi mɛnîi. Ŋ̀ɛi-pu-ƃelai da pâi kwaa kâai. 19Yâwɛɛ a pâi gɛ̂i lii-nɛ̃ɛ kɛ́ ƃò diai dîa nûa díkɛ̀ lúanii. Eezuɛ Ŋɔɣâla Maa Waai a pâi gɛ̂i gôlo-ƃelai dí kɛ́ lii-nɛ̃ɛ kùla. 20Diai da nûa maa yâo díkɛ sãa kùla díyêei, da pâi lânii. Diai da ɣɛ́lɛ maa kûla Ɣâla kponôi, díŋuŋ lá a pâi pilîi. M̀ɛni nyɔ́mɔɔ kɛ́-ƃelai kélee su a pâi karâai. 21Diai kélee da lɛ́ɛ pɛ̀lɛ nûa dîa a gɛ́ɛ dímɛnii é nyɔ́ŋ m̀ɛni-sâa ƃó kwaa mai, Ɣâla a pâi m̀aa-ƃelai su-karâi. Diai da tɔ̀ɔ m̀ɛni nyɔ́mɔɔ kɛ́-ƃela pôlu a wôya pere a gɛ́ɛ ǹúui zɔŋ fé m̀aa mɛ̂nii su ŋɔmɛnii é nyɔ́ŋ, Ɣâla a pâi maa-ƃelai kula maa kɛ̂i.

22M̀ɛni ma, Eezuɛ Ŋɔɣâlai nyíi Eberaɣɛ̃ɛ ŋuŋ ma ƃò mɛni kpɔ̂lu su a m̀ôi ǹyɛɛi, “Ŋánûa, fé pâi ńyee kulâi kámu káƃɛlɛ é tóo. Fé pâi ǹɛɛ̂i naa núu da é ká ŋumɛ. 23Ka kákpɔɔi lonii kâa kásama, nyii ŋá dɛ̀ɛ kápɔi, ka pâi gɔ́lɔnîi a gɛ́ɛ ńyãa ƃa Eezuɛ Ŋɔɣâla Maa Waai. Gɛ̀ ní, ka pâi ŋ́gɔlɔnîi ká ńaa síɣe a m̀aa waa, ka ƃaa kɛ́-maa tɛ́ɛ ḿbɔ, ká ńyãai a Eezuɛ Ŋɔɣâlai láa maa tɛ́. 24Diai dítarei lá fé fɛ́ɛ níi, da pâi târei ḿaa mɛ̂ni su, dí ŋásɛŋ-lɛɛi maa mɛ̂ni siɣe a tɔ̃yâ.”

Currently Selected:

Azaya 29: KWB

Highlight

Copy