Galesiɛŋ 2
2
Pɔ̂ɔ da Zia-ƃelai kpéli-ŋai
1Kóraŋ puu kao náaŋ pôlu ma, kwa Banaba ku li ŋɔ́nɔ Zerusâlɛŋ, ŋá Taitɔ siɣe máŋ kwa ǹyaa ku li. 2Ɣâla ƃe ńɛ̀ a gɛ́ɛ ŋá lí; ǹyaŋ ŋá Duŋ Lɛ́lɛɛi làa díŋɛi nyíi ŋá maa-mɛni ƃò Zɛ̃tai-ŋai samai (kɛ́lɛ, diai kɛ̀ a núu-tuɛ-ƃelai ŋá nâa díŋɛi kútee-tee-kwaa ma) a gɛ́ɛ gîrɛi ŋa ziɣêi, kpaa máŋ gîrɛi ŋá zìɣei, fe zìɣe kpɛni-kpɛni. 3Kɛ́lɛ, Taitɔ máŋ, nyíi kɛ̀ ŋ́gɔlɛi, berei máŋ è kɛ̀ la a Gurii-nuui, dífe gbɛtɛ ni a wála-wala-laa. 4Dífe nyíŋi kɛ́ ni, berei máŋ diai díkpîŋ kɛ̀ a káƃarâa woya-pere sui dí pà la loo-pere su a gɛ́ɛ dí kúŋuŋ ma-ƃoi káa nyíi gáa kúyêei Zîsɛ Kôrai kponôi a gɛ́ɛ dí li a kúa luɛ-laa sui, 5kúfe kúwoli tɔ̂ɔni dîa a tãi kpua-loŋ kpîŋ a gɛ́ɛ Duŋ Lɛ́lɛɛi ŋɔtɔ̃yâi é kɛ́ nɔ́ naa kámɛni ma. 6Diai kɛ̀ a ǹúu-tuɛ-ƃelai (díkɛ-pere fe kɛ́ ni a da kpɛni ŋ́ɛi; Ɣâla fa núu su ɣɛɛ) dífe ŋátuŋ lɛ́lɛɛi da pu ni ma; 7kɛ́lɛ, dí gàa a gɛ́ɛ Ɣâla e Duŋ Lɛ́lɛɛi lɛ̀ɛ ńyêei a gɛ́ɛ ŋá lí la diai pɔ dífe kpɛtɛ níi, yɛ̂ɛ berei e nɛ̀ɛ la Pitɛ yêei a gɛ́ɛ é lí la diai pɔ díkpɛtɛɛ̂i 8kpɛ́ni fêi, ǹúui Pitɛ kɛ̀ a sia-nuu a gɛ́ɛ e tíi kɛ́ diai sama díkpɛtɛɛ̂i, e ŋ́gɛ̀ máŋ a sia-nuu Zɛ̃tai-ŋai mɛni ma. 9Dí m̀ɛlɛ-seei kàa Ɣâla e dɛ̀ɛ ḿbɔi. Tãi dí nyíŋi kélee kàa lai, Zĩi da Sîfa é pɛ́lɛ Zɔ̂ŋ ma, nyíi-ŋai kɛ̀ a núu-tuɛ-ƃela kpanaŋɔɔ-ŋai, dí díyêei sèe kúmu a gɛ́ɛ ku li Zɛ̃tai-ŋai pɔ naa, dîa-máŋ dí li diai pɔ naa dífe kpɛtɛ níi; 10dí kɛ̀ nɔ́ ŋ̀wɛ̂lii máŋ a gɛ́ɛ dí gôlo-ƃelai maa-mɛni too kúkili ŋa, nyíi kɛ̀ a mɛnii kpîŋ ŋá kɛ̀ ŋ̀wɛ̂lii kpɔ́ a gbanaŋɔɔ a gɛ́ɛ ku gɛ́i.
Pɔ̂ɔ è tɔ̀ɔ Pitɛ ma Ɛŋtiɔ
11Kɛ́lɛ, tãi Sîfa è pà la Ɛŋtiɔ, ŋá tɔ̀ɔ ma kpɔ́ ŋ̀ɛi, kpɛ́ni fêi, e mɛni nyɔ́mɔɔ kɛ̀. 12Kpɛ́ni fêi, ǹûai kùla Zĩi pɔ naai, dí lɛ́ɛ pâi, Pitɛ da Zɛ̃tai-ŋai dí dílaa mìi; kɛ́lɛ, tãi ǹûai ŋí dí pà lai, Pitɛ da Zɛ̃tai-ŋai dífe ŋɔ́nɔ dílaa mii ni. E gbîŋ kùla dísama, kpɛ́ni fêi, è kɛ̀ yáôi diai dîa dí mò a gɛ́ɛ fɛ̂ɛ dí núu kpɛtɛ é lɛ́ɛ kɛ̂i a Kôrai-nuui. 13Pitɛ da Zûu-ŋai kpéli-ŋai dí tùa yɛ̂ɛ kíri-ƃela, Banaba máŋ e díkiri-tuai siɣe. 14Kɛ́lɛ, tãi ŋá gàa la a gɛ́ɛ dífe sã́a ni Duŋ Lɛ́lɛɛi ŋɔtɔ̃yâi mɛni mai, ŋá mò Sîfa ma díkelee díŋɛi, “À kɛ̀ berei máŋ íkaa la a Zûu-nuui ífa tûa yɛ̂ɛ Zûu-nuu, kɛ́lɛ, yɛ̂ɛ Zɛ̃tai-nuu, gɛ̀ ní ya pɔ̂ri Zɛ̃tai-ŋai kɛ̂i leŋ a gɛ́ɛ dí tûa yɛ̂ɛ Zûu-ŋa?”
Zûu-ŋai da Zɛ̃tai-ŋai da ƃálo-laa sɔlɔ ƃô laa-laa sârai
15Kúa kpîŋ dí kúmaa sɔlɔ ƃô a Zûu-ŋa, ǹyaŋ kúfe a Zɛ̃tai-sɔnyɔŋ-ƃela, 16é máŋ kɛ́ ti ku gɔ́lɔŋ a gɛ́ɛ núu fa kɛ̂ a tɔ̃yâ-nuu dɔ̂ŋ ŋɔtíi sârai, kɛ́lɛ, núu a kɛ̂ a tɔ̃yâ-nuu laa-la sârai Kôrai kponôi. Ku làa máŋ a Zîsɛ Kôrai a gɛ́ɛ ku kɛ́ a tɔ̃yâ-ƃela laa-la sârai Kôrai kponôi, kɛ́lɛ, dɔ̂ŋ ŋɔtíi kɛ́ɛ fei, kpɛ́ni fêi, núu da kélee fa kɛ̂ a tɔ̃yâ-nuu dɔ̂ŋ ŋɔtíi kɛ́ɛ sârai. 17Kɛ́lɛ, à kɛ̀ tãi ku kɛ̀ kɔ̂i la a gɛ́ɛ ku kɛ́ a tɔ̃yâ-ƃela Kôrai kponôi, dí kúa kpîŋ kúkàa a sɔnyɔ̂ŋ-ƃela, gɛ̀ ní sɔnyɔ̂ŋ a kûla Kôrai kponôi? Ve ti a dɔnɔ kpîŋ! 18Kɛ́lɛ, à kɛ̀ zãâi ŋá díkarai, ŋa ŋɔ́nɔ dítɔ̀ɔ pôlu, gɛ̀ ní ŋa ŋ́gbîŋ lɛ̂i a tɔ̂ŋ-kara-nuu. 19Kpɛ́ni fêi, dɔ̂ŋ sârai kwa dɔ̂ŋ kúloai téɛɛ̂i a gɛ́ɛ ŋá kɛ́ ɣele ma Ɣâla maa-mɛni ma. 20Kwa Kôrai dí kúkpàmo wúru su-tíyeŋɔɔ ma; ǹyaŋ fe ŋɔ́nɔ ɣele ma, fɛ̂ɛ Kôrai nyíi gáa ŋ́gbonôi; vulu-laai nâa ŋa gɛ̂i ŋ́gbonôi, ŋa gɛ̂i a laa-la Ɣâla Ǹóŋ kponôi nyíi ŋ́wɛ̀li é gbîŋ tɛɛ ḿɛni mai. 21Fa gɛ̀ a gɛ́ɛ Ɣâla ŋɔƃɛlɛ-sêei é kɛ́ nɔ́ kpɛni-kpɛni; kpɛ́ni fêi, eêi kɛ̀ dɔ̃yâ-laa eêi kɛ̀ dɔ̂ŋ sârai, gɛ̀ ní Kôrai ŋɔsaai maa-sâpo fei kɛ̀ ma.
Currently Selected:
Galesiɛŋ 2: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia