Zia-ƃelai Kɛ́-mɛni-ŋai 25

Pɔ̂ɔ è lì a ŋɔmɛnii Gâloŋ Siizɛ pɔ́

1Fɛtɔ páa ŋɔlɔii-kpiniŋ sui, ɣele kûu saaƃa pôlu mai, è kùla Sɛsɛria é lí Zerusâlɛŋ. 2Zâla láa soŋ-ƃela kpaya-kpayai da Zûu-ŋai túɛ-ƃelai dí gíli ŋá pòno a Pɔ̂ɔ maa mɛni. Dí gbera fé, 3Dí m̀arê kɛ̀ a gɛ́ɛ é mɛni lɛ́lɛɛ kɛ́ dîɛ, nya ƃa é Pɔ̂ɔ worɛ̂ tɛɛ é pa Zerusâlɛŋ. Dí gbɛ̀tɛ a gɛ́ɛ dí gbã tee berei dí bàa berei su. 4Kɛ́lɛ, Fɛtɔ è díwoo su too ǹyɛɛ dîa, “Pɔ̂ɔ káa Sɛsɛria. Ńyãa kpîŋ ŋa pâi liî naa a maa félaa. 5Tɔɔ kwa kálaa túɛ-ƃelai da-ŋa kú lí Sɛsɛria, à kɛ̀ mɛni nyɔ́mɔɔ da kélee káa gbonôi dí m̀ó.”

6Gɛ́ɛ da dîa-ni da ɣele kûu lɔ́ɔlu mɛi saaƃa kpaa máŋ puu kɛ́ nɔ́ naai, è lì Sɛsɛria. Bôlu ma ɣelei è sèe mɛni-sâa ƃó see-sɛŋ ŋá é m̀o a gɛ́ɛ dí pá a Pɔ̂ɔ. 7Pɔ̂ɔ è páai, Zûu-ŋai, nyíi-ŋai kùla Zerusâlɛŋ dí tìnaŋ ma, dí mɛni kpaya-kpaya támaa ƃó a ǹáa, nyíi-ŋai vé kɛ́ ní a tɔ̃yâi. 8Pɔ̂ɔ è gbîŋ maa kɔ̃ɔ a ŋ̀óo-ŋai ŋí, ǹyɛɛi, “Fé niî Zûu-ŋai dítɔ̂ŋ da kara ní, kpaa máŋ Ŋ̀âla-pɛrɛ kɛ́tɛi, kpaa máŋ ŋá tɔ́ɔ Gâloŋ Siizɛ ma pere sîi da kélee su.” 9Kɛ́lɛ, Fɛtɔ è kɛ̀ ŋ̀wɛ̂lii è Zûu-ŋai líi láa. È mò Pɔ̂ɔ ma ǹyɛɛi, “Ya ŋ̀wɛ̂lii a gɛ́ɛ í lí Zerusâlɛŋ a gɛ́ɛ ŋá kámɛnii su káa naa?” 10Pɔ̂ɔ ǹyɛɛ mài, “Ŋ́gaa tɔ̂ɔni Gâloŋ Siizɛ ŋɔmɛni ƃó-kerei mu, ƃɛ́i maa nɛ̃ɛ̂i dí ŋámɛnii ŋá tee naai. Í gɔ́lɔŋ kpɔ́ a ǹɛ́lɛɛ a gɛ́ɛ fé niî mɛni nyɔ́mɔɔ da kɛ́ ní a Zûu-ŋai da. 11À kɛ̀ ŋ́gaa a mɛni nyɔ́mɔɔ kɛ́-nuu, ŋa mɛni nyɔ́mɔɔ kɛ́, nyíi fɛ̂ɛ ŋá sáa mɛni mai, fa kɔ̂ a gɛ́ɛ ŋá kúla saa yêei. Kɛ́lɛ, à kɛ̀ mɛni-ŋai ŋí da m̀ó a ńaai ńzɔŋ fé dɔnɔ kpîŋ da su, núu da kélee fé ńdɛ̀ɛ dípɔ. Ŋa liî a ŋámɛnii Gâloŋ Siizɛ pɔ́.” 12Fɛtɔ kɛ́ɛ a m̀ɛnii ŋí seri ŋɔlia-woo ƃo-ƃelai diai, è Pɔ̂ɔ wóo su tòo, ǹyɛɛi, “Ya liî a ímɛnii Gâloŋ Siizɛ pɔ. Ǹya ƃé Gâloŋ Siizɛ ƃé ya pâi liî bɔ́.”

Da pá a Pɔ̂ɔ Agulepa ŋɛ́i túɛ da Bɛnîi

13Ɣele kûu da-ni tɛ̂ɛi pôlu ma, gâloŋ Agulepa da ŋɔsaaƃɔlɔi Bɛnîi dí pà Sɛsɛria a gɛ́ɛ dí díla ti Fɛtɔ ma. 14Tãi dí ɣele kûu támaa kɛ̀ la naai, Fɛtɔ e Pɔ̂ɔ maa-mɛni làa gâloŋ ŋɛi, ǹyɛɛ mài, “Nalôŋ tɔnɔ káa ƃɛ Feli e nɛ̀ɛ kpini-pɛrɛ mu. 15Tãi ŋa kɛ̀ la Zerusâlɛŋ, Zûu-ŋai dísâla láa soŋ-ƃela kpaya-kpayai da dínuu-pɔlɔ-ŋai dí ŋ́gili-ŋa pòno a maa-mɛni. Dí mò a gɛ́ɛ ŋá m̀ɛnii lɛ́ɛ mà. 16Nya ƃe ŋá zu tòo a gɛ́ɛ ve a Lomaŋ-ŋai tûa-pere a gɛ́ɛ da mɛni da ƃo a núu láa dí kúla maa-nuui pôlu a gɛ́ɛ e sáa fɛ̂ɛ diai mɛnii ƃo a ǹáai da dîa-ni da díkîe kàa. 17Mɛni ma tãi dí pà la ƃɛ gîe mai, fe tãi siɣe ni. Kɛ́lɛ, bôlu ma ɣele ƃɔ́ɔi ŋá sèe mɛni-ƃo see-sɛŋ ŋá, ŋá m̀ó a gɛ́ɛ dí pá a ǹalôŋ. 18Diai mɛnii ƃo a ǹáai, dí siɣe dí tɔ́ɔ, kɛ́lɛ, dífe mɛni nyɔ́mɔɔ ƃo ni a ǹáa, yɛ̂ɛ berei ŋa kɛ̀ gâai da pâi môi lai; 19kɛ́lɛ naa-saai, nɔ́ kɛ̀ díloai, nya ƃé kɛ̀ a díkpɔɔ̂i-Ɣâla-mɛni da Zîsɛ laa-nuu tɔnɔ, nyíi wɔ́lɔ saai. Kɛ́lɛ, Pɔ̂ɔ e mò a gɛ́ɛ gáa a vulu. 20Fe kɛ́ ni a mɛni-sii kɛ́ɛ ti su-kaa-pere kɔlɔŋɔɔ. Mɛni ma ŋá Pɔ̂ɔ marê kɛ̀, à kɛ̀ a ŋ̀wɛ̂lii e li Zerusâlɛŋ dí mɛnii su káa naa. 21Kɛ́lɛ, Pɔ̂ɔ kɛ́ɛ a mɛnii tɛ́ɛ Gâloŋ Siizɛ pɔ a gɛ́ɛ ǹyaa Pɔ̂ɔ e lɛ́ɛ ŋɛi-gao-kpɔnɔ ŋá é lɛ́ɛ la zu dí mɛnii ƃói, ŋá mò a gɛ́ɛ dí zoŋ e lɛ́ɛ la zu ŋá dɛɛ Gâloŋ Siizɛ pɔ naa.” 22Nya ƃe Agulepa e mò Fɛtɔ ma, ǹyɛɛi, “Ŋa ŋ̀wɛ̂lii máŋ ńyãa kpîŋ ŋá ǹalôŋ kpîŋ wóo mɛni.” Fɛtɔ ǹyɛɛ mài, “Ya pâi ŋ̀óo mɛnîi tínaa.”

23Ɣele ƃɔ́ɔi Agulepa da Bɛnîi dí pà yɛ̂ɛ kâloŋ kɛ́tɛ pá-pere. Dí lɔ̀ mɛni-ƃo-kerei mu, da ǹɔii maa kpɛ́-ƃelai mɛi-ƃela kpaya-kpayai, e pɛ́lɛ daa-ƃela kpaya-kpayai dîa. Nya ƃe Fɛtɔ e mò a gɛ́ɛ dí pá a Pɔ̂ɔ, ǹyaŋ dí pà la. 24Fɛtɔ e mò, ǹyɛɛi, “Gâloŋ Agulepa da káai kákaa ƃɛi, ka nalôŋ ŋí káa, nyíi Zûu-ŋai kélee díkaa ḿbôlu m̀ɛni ma Zerusâlɛŋ da ƃɛ máŋ. Díkaa lâɣii a gɛ́ɛ ve a sɛŋ nalôŋ ŋí e ŋɔ́nɔ kɛ́ ɣele ma. 25Kɛ́lɛ, gɛɛ ŋa gáa a gɛ́ɛ ve mɛni nyɔ́mɔɔ da kɛ́ ni nyíi a pɔ̂ri saâi mɛni mai; a gɛ́ɛ ŋɔ́nɔ ǹyaa kpîŋ a ŋɔmɛnii tɛ́ɛ Gâloŋ Siizɛ pɔi, ŋá gbɛ̀tɛ ŋ́gili ŋá a gɛ́ɛ ŋa dɛɛ. 26Fe niî mɛni da kaa ni a gɛ́ɛ ŋá bɔ̃̀yɛ ŋánuu-namui pɔ naa e pîlaŋ ma. Mɛni ma ŋa pá la káŋɛi tuɛ, yá kpîŋ tela íŋɛi tuɛ gâloŋ Agulepa, a gɛ́ɛ kwà dímɛnii su kaa, ŋa pɔ̂ri mɛni da kâai a gɛ́ɛ ŋá bɔ̃̀yɛ. 27Kpɛ́ni fêi, gáa mâ nɔ́ a ƃoo-mɛni a gɛ́ɛ núu e pelesinɛ tɛɛ, m̀ɛnii e dɛ̀ɛ lai ve ǹɛ́ ni.”

Currently Selected:

Zia-ƃelai Kɛ́-mɛni-ŋai 25: KWB

Highlight

Copy