Zia-ƃelai Kɛ́-mɛni-ŋai 14

Pɔ̂ɔ da Banaba díkaa Akonia

1M̀ɛni tɔnɔi ŋí da è kɛ̀ Akonia: Pɔ̂ɔ da Banaba dí lì Zûu-ŋai Díɣâla-fɛli kerei mu. Dí lòno kpɔ́ nûa támaa pɔ́ gbɔŋ su. Nûa ŋí da-ŋa díkɛ̀ a Zûu-ŋa da-ŋa dí ƃò a Gurii-ŋa. Díworɛ̂-wooi è gɛ̀ dí dílii pène dí láa la. 2Kɛ́lɛ, Zûu-ŋai, nyíi-ŋai dífe laa ní lai, dí Zɛ̃tai-ŋai líi mu sìɣe dílii é nyɔ́ŋ díkoi dí tɔ́ɔ ǹaa-la-ƃelai dîa. 3Ǹaa-la-ƃelai dí ɣele kûu támaa sìɣe naa dí lóno kpɔ́ a lii-kpele pere Kúnuu-namui mɛni ma, nyíi ŋɔƃɛlɛ-sêe-wooi m̀aa sêre-faa kɛ̀ a ŋɛi-kɛ-maa da mɛni kpaya-kpaya-ŋa kɛ́ɛ dísârai. 4Kɛ́lɛ, daa-ƃelai díkɛ̀ a díŋaa kɔlɛɛ. Gbulu tɔnɔ è kɛ̀ Zûu-ŋai pôlu, gbulu tɔnɔ kɛ́ ƃo zia-ƃelai pôlu. 5Zɛ̃tai-ŋai, Zûu-ŋai, da dítuɛ-ƃelai, dí gbɛtɛ díkili ŋá a gɛ́ɛ dí dísoŋ a nyɔ́mɔɔ dí dísɔɔ a kɔni. 6Zia-ƃelai dí gɔ̀lɔŋ, dí pù dí lí Lesitɔra da Dɛƃi. Daa-ŋai ŋí díkaa a Lekaonia lɔii-kpiniŋ da naa kɔlɛ ma kpiniŋ su taa-ŋa. 7Naa ƃé dí Duŋ Lɛ́lɛɛi ƃò naa.

Dí Pɔ̂ɔ sɔ̀ɔ a kɔni Lesitɔra

8Nalôŋ tɔnɔ è kɛ̀ seêni Lesitɔra. È kɛ̀ a gɔ́ɔ púɔɔ é síɣe maa sɔlɔ ƃo ɣele ma. 9È sèe é ŋ̀óli tɔ́ɔ Pɔ̂ɔ wóo ma. Pɔ̂ɔ è gàa kpɔ́ sĩ́i é gɔ́lɔŋ a gɛ́ɛ laa-la è kɛ̀ ǹyêei. 10È mò a ŋ̀óo su kɛ́tɛ, ǹyɛɛi, “Ímu siɣe í tɔ́ɔ.” Ǹalôŋ m̀u-siɣe é píli ɣelêi é pîlaŋ é pɛ́lɛ siâi. 11Ǹûai kɛ́ɛ da m̀ɛnii ŋí káa Pɔ̂ɔ è gɛ̀i, dí díwoo tɛ̀ ɣelêi Lekaonia wooi su, dîyɛɛi, “Ŋ̀âla-ŋai da pá kúpɔ ǹɔii ma ƃɛ́ núu-kpune-pɔɔkɔ̂ŋ su!” 12Dí Banaba láa sèe a Zeu, dí Pɔ̂ɔ láa sée a Ɣɛ̂mii, kpɛ́ni fêi, ǹyaa ƃé kɛ̀ a ǹóno kɛ́-nuui gɛ́tɛi. 13Ŋ̀âlai Zeu ŋɔpɛ́rɛi è kɛ̀ daa-leei ŋɔsiɣaŋ lá. Ŋɔsâla láa soŋ-nuui da gbɔŋ su-ƃelai dí kɛ̀ ŋ̀wɛ̂lii dí sâla kula Banaba da Pɔ̂ɔ dîa. M̀ɛni ma è pà a niŋa sirɛ-ŋa góraŋ lá da felaƃa daa-leei su a gɛ́ɛ da ǹûai dí zâlai kúla a dîa. 14Banaba da Pɔ̂ɔ dí m̀ɛnii ŋí mɛ̀ni nɔ́, dí díseɣe-ŋai fála-fàla dîa dí kîrɛ sìɣe dí lɔ́ gbɔŋ su díkɛ làɣi, dîyɛɛi, 15“Nûa, ka nyíŋi kɛ̂i lé mɛni ma? Kúa máŋ kúkaa a nuu-kpune-ŋa yɛ̂ɛ káa, kú ƃò kásama. Kúkaa ƃɛ́ a gɛ́ɛ kú Duŋ Lɛ́lɛɛi ƃó kâa a gɛ́ɛ ká kápôlu tɔɔ mɛni folo-ŋai ŋí dîa ka pá Gɛ-ɣele-ma Ɣalai pɔ́. Ǹyaa ƃé ŋ̀elei kpɛ̀tɛ da ǹɔii, ǹyái da zãai kélee dísui. 16Wɔ́lɔ-wɔlɔi tí kɛ̀i, è núu kélee lɛ̀ɛ naa dí sía a díkpɔɔ̂i pere. 17È máŋ kɛ̀ tí, vé fɛ̀ɣɛ ní gbîŋ m̀aa sêre-faa kɛ̂i m̀ɛni lɛ́lɛɛ-ŋai è gɛ̀i mɛni ma. È tuna tɛ̀ɛ kápɔ, é sí-sãa lɛ́lɛ tãi tɛɛ, é mii-sãa tɛ̀ɛ kápɔ kálii é láa ka kɛ́ lii-nɛ̃ɛ kùla.” 18Berei máŋ zia-ƃelai dí ŋ̀óo-ŋai ŋí ƃo la ǹûai dîai, vé díkpera ní zâlai kula mɛni ma dîa.

19Zûu-ŋai da-ŋa dí kúla Ɛŋtiɔ Pasidia kpiniŋ su da Akonia dí pá naa. Dí ǹûai líi pène dí Pɔ̂ɔ sɔɔ a kɔni dí ŋ̀ála dí gula daai su, dí kɛ̀ gâai a saa. 20Kɛ́lɛ, Zia-ƃelai kɛ́ɛ da díŋaa tɛ́ gîe ma gɔlɛ mai, è m̀u sìɣe é pá daai su. Bôlu ma ɣelei da Banaba dí kùla naa dí lí Dɛƃi. 21Díkɛɛ da Duŋ Lɛ́lɛɛi ƃó Dɛƃii, dí Zia-ƃelai dámaa sɔlɔ ƃò. Nya ƃe dí lì pôlu Lesitɔra, dí lí Akonia, dí tɛ́ɛ naa dí lí Ɛŋtiɔ. 22Dí gɛ̀ Zia-ƃelai kponôi é kpanaŋ dí dílii kúla a lii kpele woo-ŋa a gɛ́ɛ dí tɔ́ɔ a gbanaŋɔɔ dílaa-lai su. Dí mò dîa máŋ a gɛ́ɛ fɛ̂ɛ kú tɛ́ɛ mɛni-soli támaa su kú lɛ́ɛ pâi liî Ɣâla ŋɔkâloŋ-laai su. 23Dí núu-pɔlɔ-ŋa lɛ̀ ŋ̀âla-pɛrɛ-ŋai mu tɛi-tɛi. Dí Ɣâla fɛ̀li dí suŋ sìɣe dímɛni dí dítɛɛ Ǹúu-namui pɔ́ nyíi dí làa lai.

24Dí tɛ̀ɛ a Pasidia pere dí pá Paŋfîlia. 25Dí ŋ̀orɛ̂-woo ƃò Pɛga dí tɛ̀ɛ naa dí yéŋ Atalia. 26Dí kùla naa dí yá ŋá-keleŋ siɣe dí lí pôlu Ɛŋtiɔ, ƃɛ́i dí dítɛ̀ɛ naa Ɣâla pɔ́ fúlɔi a gɛ́ɛ dí ŋɔƃɛlɛ-seei sɔlɔ ƃó díi mɛni ma da kpɛɛ mai. 27Dí páai, dí Kôrai-toli-kpɔŋ su-ƃelai kélee ŋá tɛ̀ ma, dí m̀ɛnii kélee ƃó dîa Ɣâla è gɛ̀ a diai da berei è pere lá ƃò la Zɛ̃tai-ŋai dîɛ a gɛ́ɛ dí láa lai. 28Dí ɣele kûu támaa kɛ̀ naa da Zia-ƃelai.

Currently Selected:

Zia-ƃelai Kɛ́-mɛni-ŋai 14: KWB

Highlight

Copy