Zia-ƃelai Kɛ́-mɛni-ŋai 12
12
Dí Zĩi pàa, dí Pitɛ pili kpini-pɛrɛ mu
1M̀aa-tãi tí Gâloŋ Ɛɛlɔ è m̀ɛni kpɔ̂lu ŋánaa làa Kôrai-toli-kpɔŋ su-ƃelai da-ni dîa. 2È gɛ̀ dí Zɔ̂ŋ ǹîa Zĩi pàa a ƃóa-sɔkpɔ. 3È ŋɔ́nɔ kɔ̀ a gɛ́ɛ é Pitɛ soŋ, kpɛ́ni fêi, è gàa a gɛ́ɛ Zĩi paa mɛni è kɛ̀ a Zûu-ŋai líi-laa mɛni. È kɛ̀ a Dɛ́-sɛŋ fé kpoloi maa kûui. 4È zòŋ é bù kpini-pɛrɛ mu. È dɛ̀ɛ ǹɔii maa kpɛ́ nuu-kpulu seêi náaŋ pɔ́ (ǹáaŋ kɛ́ ƃo gbulu tɔnɔ su) a gɛ́ɛ dímɛi káa. È kɛ̀ gíli ŋá a gɛ́ɛ Dɛɛ-mɛi kûui à tɛ̀ɛ, é gula é pá la ǹûai ŋɛ́i. 5Pitɛ è kɛ̀ gbini-pɛrɛi mu. Kɛ́lɛ, Kôrai-toli-kpɔŋ è kɛ̀ Ɣâla fɛlîi m̀ɛni ma a gbanaŋɔɔ.
Dí Pitɛ kùla gbini-pɛrɛi mu
6Ɛɛlɔ è gbɛ̀tɛ a gɛ́ɛ é Pitɛ kula gbini-pɛrɛi mu é bàa a ŋ̀ele-walai. M̀aa kpinii tí Pitɛ è kɛ̀ gbini-pɛrɛ mɛi káa-ƃelai veerɛ loai. È kɛ̀ a ŋ̀íriɛɛ a yɔlɔ feerɛ. Gbini-pɛrɛ mɛi-kaa-ƃelai dí kɛ̀ gbini-pɛrɛi lá díkɛ naa mɛi kaa. 7Kúnuu-namui Ŋɔɣâla-taa-kela tɔnɔ è pà Pitɛ pɔ́ gbini-pɛrɛi mu. Nàa è pono kpɔ́ a ŋ̀ánaa. È Pitɛ lòkwa bɛ́rɛ ma é ŋ̀ɛ́i lá ƃo, ǹyɛɛ mài, “Ímu siɣe a maa félaa.” Ǹyɔlɔi kélee è tèe ǹyée ma é pu ǹɔii ma. 8Ŋ̀âla-taa kelai, ǹyɛɛ mài, “Ímaa ɣiri, í íkpaŋ-kpalii lɔ́.” Pitɛ è gɛ̀ tí. Ŋ̀âla-taa kelai ǹyɛɛ mài, “Íbili-gbãai tóo yâ í pîlaŋ ḿbôlu.” 9È kùla ŋínii ŋá é lɛ́ɛ bôlu. Kɛ́lɛ, vé kɛ́ ní mɛni-ŋai ŋá kâai kɛ̂i. È kɛ̀ nɔ́ gâai ǹyɛɛ yɛ̂ɛ seêi pere mɛni. 10Dí tɛ̀ɛ gbini-pɛrɛi mɛi-kaa-nuui maa-ŋuŋ ma da veerɛi, dí pá galai lá nyiî kɛ̀ a dɔɔ a kɔlii. Galai ŋí lá è kɛ̀ a gúlaa daai su-pere. Nya ƃe ǹá è ƃò díperei gbɔɔi-yee ma, dí kúla dí zoŋ a pere tɔnɔ. Ŋ̀âla-taa kelai è ǹɛɛ naa é lí a maa félaa. 11Pitɛ kɛ́ɛ a gbîŋ kíli kɔ́lɔŋ, è mò, ǹyɛɛ, “Ŋaâ gɔ́lɔŋ a gɛ́ɛ Kúnuu-namui è ŋɔkélai tɛ̀ɛ a gɛ́ɛ e ŋ́gula Ɛɛlɔ yêei da mɛni-ŋai perêi Zûu-ŋai dí kɛ̀ wɛ̂lii dí gɛ́ a ńyãai.”
12M̀ɛnii ŋí kɔ́lɔŋɔɔ mìi, è pà Zɔ̂ŋ, nyíi ǹáa kpeli è kɛ̀ a Mâki, ǹee Mere ŋɔpɛ́rɛi lá. Núu támaa dí kɛ̀ naa díŋa tɛ́ɛ gîe ma díkɛ Ɣâla fɛli. 13Gbôŋ tuaa Pitɛ mìi, yée mu-nɛni tɔnɔ, nyíi ǹáa è kɛ̀ a Lodai, è pà a gɛ́ɛ é naa káa. 14Pitɛ wóo su kpɛɛ mìi, ǹíi nɛ̃ɛ vé bɛ́rɛi lá ƃo ní. Kɛ́lɛ, è kîrɛ sìɣe é lí pôlu bɛ́rɛi mu é m̀ó ǹûai dîa a gɛ́ɛ Pitɛ è kɛ̀ tɔ̂ɔni gbôŋ ma. 15Dîyɛɛ mài, “Gáa yɛ̂ɛ ǹyaa ƃé táre fé íŋuŋ su.” Kɛ́lɛ, è mò dîa a gɛ́ɛ gáa tí. Dîyɛɛ mài, “M̀ɛi káa-kelai ká tí kùla Ɣâla-taai!” 16Kɛ́lɛ, Pitɛ è kɛ̀ nɔ́ gbôŋ tuâi. Bɛ́rɛi lá ƃóɔɔ dîɛ dí gaai, díla è kpàla dîa. 17Kɛ́lɛ, è ǹyée lɛ̀ dîa a gɛ́ɛ dí dímɛi sáa. È mò dîa berei Kúnuu-namui è gùla la gbini-pɛrɛi mui. Ǹyɛɛ dîai, “Ka lí ka mɛni-ŋai ŋí lɛ́ Zĩi ma da kúƃarâai.” Gɛ́ɛ tí è kùla naa é lí kwaa da kpɛ́ni ma.
18Ɣele ƃɔ́ɔi, è kɛ̀ kpɔ́ a pɛlɛ-pu-mɛni gbini-pɛrɛ mɛi káa-ƃelai dîa a dámaa. Dífe kɛ́ ní a m̀ɛnii kɔ́lɔŋɔɔ kɛ̀ a Pitɛi. 19Ɛɛlɔ è m̀ɛi káa-ƃelai dîa a gɛ́ɛ dí gɔ́ri. Gɛ́ɛ dífe gáa níi, è m̀o dîa a gɛ́ɛ dí gbini-pɛrɛ mɛi-kaa-ƃelai pá. Nyíŋi pôlu ǹyaa è kùla Zuda é lí Sɛsɛria é lɛ́ɛ naa.
Ɛɛlɔ ŋɔsaai
20Ɛɛlɔ è kɛ̀ a ǹíi ŋwánaa kpɔ́ Taya-ƃelai dîa da Sidɔŋ-ƃelai a ŋ̀ánaa. Kɛ́lɛ, dí pà bɔ́ a díkpulu. Dí lii-see maa-fɛli Ɛɛlɔ ma ǹyée mu-nuui Bilɛ́ɛtɔ sârai, nyíi dí gɛ̀ a díwɛlii, kpɛ́ni fêi, dílɔii è kɛ̀ a gíli láa gâloŋ ŋɔlɔii ma mii-sɛŋ mɛni ma.
21Dí gbɛ̀tɛ a gɛ́ɛ dí koyâŋ. Díkɛɛ pâi koyânii, Ɛɛlɔ è ŋɔkâloŋ seɣei tòo ma é sée ŋɔkâloŋ see-sɛŋ ŋá, gɛ́ lòno dípɔ. 22Ǹûai kélee dí làɣi, dîyɛɛi, “Ɣâla sii da wóo ká ŋí, núu wóo fei!” 23Ɣâla-taa kela è ǹokwa kpɔ́ a maa félaa, kpɛ́ni fêi, vé Ɣâla pɔ́ láa ma tɛ́ ní gɛ́ɛ a vúlui kpeli-ŋa dí pu ma díkɛ mii é lɛ́ɛ la zu é sáa.
24Kɛ́lɛ, Ɣâla ŋɔwóoi è ƃûu ƃo.
25Banaba da Sɔ̂ɔ kɛ́ɛ da kpɛɛ dítii ma Zerusâlɛŋ, dí kùla naa dí lí pôlu. Da Zɔ̂ŋ ni ƃé lì, nyíi ǹáa kpéli è kɛ̀ a Mâki.
Currently Selected:
Zia-ƃelai Kɛ́-mɛni-ŋai 12: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
