Samia Veerɛi 9
9
Deeƃé è mɛni lɛ́lɛɛ kɛ̀ Mɛfebosɛ mì
1È kɛ̀ tí Deeƃé é m̀ó ǹyɛɛi, “Núu fé lɛ̀ɛ ní Sɔ̂ɔ ŋɔpɛ́rɛi mu nyíi ŋa pɔri ŋáwɛli kɛ́-maai lɛ̂i Zonetaŋ mɛni ma?”
2Sɔ̂ɔ yée mu-nuu tɔnɔ è kɛ̀ naa. Ǹáa ƃé kɛ̀ a Ziƃa. Dí dòli Deeƃé ǹyɛɛ mai, “Yá ƃé da kɛ̂ yâ Ziƃai?”
Ǹyɛɛ mai, “Ńyãa ƃe.”
3Gâloŋ ǹyɛɛ m̀ai, “Núu da è lɛ̀ɛ Sɔ̂ɔ ŋɔpɛ́rɛi mu nyíi ŋa pɔri ŋáwɛli kɛ́-maai lɛ̂i ma yɛ̂ɛ berei ŋá ŋ́gono tèe la Yâwɛɛ yeei?”
Ziƃa ǹyɛɛ m̀ai, “Zonetaŋ ǹóŋ surɔŋ tɔnɔ káa niî naa. Kɛ́lɛ gɔ̃liŋɔ̂ɔi.”
4Ǹyɛɛ mai, “Ǹyaa kɔɔ?” Ziƃa ǹyɛɛ m̀ai,
“Gáa Amɛɛ ǹóŋ Maka pɔ́-naa Lo-deba taai su.” 5Gâloŋ Deeƃé è ŋ̀orɛ̂ tɛ̀ɛ dí pá la.
6Sɔ̂ɔ ǹóŋ lóŋ Mɛfebosɛ è pà é pîlaŋ ŋ̀ume ŋá Deeƃé ŋɛ́i-tuɛ é ƃaa kɛ́-maa tɛ́ɛ bɔ́. Deeƃé ǹyɛɛ m̀ai, “Mɛfebosɛ!” È zu tòo ǹyɛɛ m̀ai, “Íyee mu-nuui ká ŋí.”
7Deeƃé ǹyɛɛ m̀ai, “Ífe yao. Ŋa pâi ŋáwɛli kɛ́-maai lɛ̂i yâ ínâŋ sârai. Ŋa pâi ínâŋ ŋɔlɔii-ŋai kélee tɛɛ̂i ípɔ. Ya pâi kɛ̂i ílaa miî ŋáteƃelei ma a ɣele kélee.”
8Mɛfebosɛ è pìlaŋ ŋ̀ume ŋá gâloŋ ŋɛ́i túɛ ǹyɛɛ m̀ai, “Íyee mu-nuui kɔɔ ǹyaa ya mɛni lɛ́lɛɛ kɛ́ɛ ŋí kɛ̂i ɣîla kɛ́ɛ yɛ̂ɛ ńyãa ḿîi?”
9Nya ƃe gâloŋ è Sɔ̂ɔ yée mu-nuui Ziƃa tòli ǹyɛɛ m̀ai, “Ŋa Sɔ̂ɔ kɔ̃liŋ da ŋɔpɛ́rɛi mu-ƃelai kélee tɛɛ̂i ǹóŋ pɔ́. 10Yá, ílônii-sinaai da íyee mu-ƃelai ka pâi kɛ̂i ǹyée mu. Ka kɛ́ tíi kɛ̀ mì. Mii-sɛŋ é kɛ́ ŋɔpɛ́rɛi mu a ɣele kélee. Kɛ́lɛ Mɛfebosɛ a pâi kɛ̂i ǹáa miî ŋáteƃelei ma.” Ziƃa ǹônii-sinaai díkɛ̀ puu káo lɔ́ɔlu, ǹyée mu-ƃelai díkɛ ƃò buu feerɛ.
11Ziƃa ǹyɛɛ gâloŋ mai, “Ŋa pâi mɛ̀nii kélee kɛ̂i yɛ̂ɛ berei ya m̀ó la ḿâi.”
Mɛfebosɛ a kâa ǹáa mìi Deeƃé ŋɔteƃelei ma yɛ̂ɛ gâloŋ ǹônii da. 12Mɛfebosɛ è lóŋ-surɔŋ maa sɔlɔ ƃò é ǹáa sée a Maka. Ǹyaŋ dîai kélee kɛ̀ Ziƃa yée mui dí kɛ̀ a Mɛfibosɛ yée mu-ƃela. 13Mɛfebosɛ è sèe Zerusâlɛŋ, kpɛ́ni fêi, a kâa ǹáa mìi gâloŋ ŋɔteƃelei ma. Gɔ́ɔ veerɛ è kɛ̀ a búɔɔ.
Currently Selected:
Samia Veerɛi 9: KWB
Highlight
Copy
Compare
Share
Want to have your highlights saved across all your devices? Sign up or sign in
© 2012 Bible Society in Liberia
