Samia Veerɛi 21
21
Dí Sɔ̂ɔ ǹônii pàa
1Deeƃé kɛ́ɛ a kâloŋ, puru è tòo ǹɔii ma kóraŋ saaƃa yée mu. Nya ƃe è Yâwɛɛ fɛ̀li Yâwɛɛ ǹyɛɛ m̀ai, “Puru káa ǹɔii su, kpɛ́ni fêi, ŋãa káa Sɔ̂ɔ yée ma da ŋɔpɛ́rɛi mu-ƃelai Gibiyɔŋ-ŋai paa mɛni ma.” 2Giƃiyɔŋ-ŋai dífe kɛ́ ní a Eezuɛ-ƃelai da. Dí kɛ̀ a Amɔra-ŋai lɛ̀ɛ Eezuɛ lɔii su gɔ́i kpɛɛ pôlu mai. Díkɛ̀ nɔ́ a núu-kpulu loŋ. Kɛ́lɛ Eezuɛ-ŋai dí wɔ́lɔ dí fòo a gɛ́ɛ dífe pâi dímaa kɔ̃ɔ̂i. Berei máŋ Eezuɛ-ŋai dí ŋuŋ ma ƃô tɛ̀ɛ la dípɔi, Sɔ̂ɔ è kɛ̀ kɔ̂i a gɛ́ɛ é dípaa, kpɛ́ni fêi, è kɛ̀ ŋ̀wɛ̂lii nɔ́ Eezuɛ-ŋai da Zuda-ŋai tee-tee díkɛ ƃò ǹɔii mɛi. Nya ƃe Deeƃé è dítòli é lóno dípɔ. 3È mò dîa ǹyɛɛi, “Lé ƃé ŋa pɔri gɛ̂i kâai? Lé ƃé ŋa pɔri gɛ̂i a gɛ́ɛ ká nia mɛni nyɔ́mɔɔi ma kɛ̀ a káa a gɛ́ɛ ká lûwa láa Yâwɛɛ ŋɔnûai dîa?”
4Dí mò ma dîyɛɛi, “Kúfe wɛ̂lii a ƃara kpaa gôo Sɔ̂ɔ yêei da ŋɔpɛ́rɛi mu-ƃelai. Kúfe tela wɛ̂lii máŋ kú kɔ́ Eezuɛ-ŋai pɔ́.”
È ŋɔ́nɔ mò dîa ǹyɛɛi, “Lé ƃé ka lâai la fɛ̂ɛ ŋá gɛ̂i kâai?”
5Dí ŋ̀óo su tòo dîyɛɛ m̀ai, “Gâloŋ, ǹúui kpɔ́ kúnûai su kàra é tela gbɛtɛ a gɛ́ɛ kúsuui láa da fé lɛ̀ɛ Eezuɛ lɔii mai, 6ǹônii-sinaai ǹɔ́ɔlu mɛi feerɛ ƃé kwa wɛ̂lii í dítɛɛ kúpɔ a gɛ́ɛ kú dísɛ̂lɛŋ Yâwɛɛ ŋɛ́i Yâwɛɛ ŋɔyéei ma Giƃiyɔŋ.”
Gâloŋ ǹyɛɛ dîai, “Ŋa pâi dítɛɛ̂i kápɔ.” 7Gâloŋ è ŋuŋ ma ƃô tɛ̀ɛ Sɔ̂ɔ ǹóŋ-surɔŋ Zonetaŋ ǹóŋ Mɛfibosɛ pɔ́, kpɛ́ni fêi, da Zonetaŋ dí díwoo kɛ̀ Yâwɛɛ ŋɛ́i. 8È Aia ǹóŋ-nɛnii Lizipa ǹônii-sinaa feerɛi da Sɔ̂ɔ dí dímaa sɔlɔ ƃoi sìɣe, Amoni da Mɛfibosɛ, Sɔ̂ɔ ǹóŋ-nɛnii Mera ǹônii-sinaa lɔ́ɔlu da Mɛota naloŋ ǹóŋ-nɛnii Aduriɛ dí m̀aa sɔlɔ ƃoi, 9é dítɛɛ Giƃiyɔŋ-ŋai pɔ́, dí dísɛ̂lɛŋ ǹyéei ma Yâwɛɛ ŋɛ́i. Dí dípàa a Bâle tée tãi kɔ́ɔ pîlanii.
10Aia ǹóŋ-nɛnii Lizipa è maloŋ-too maa seɣe-ŋa sìɣe é dɔ́ɔ a ƃûu gɔnii ŋá gɛ́ ƃò mù é síɣe vólo-la ƃóɔɔ tãi ma é tóo zama tãi ma buma-ŋai kɔlɛ. Vé fáa ní ma ŋɔni da é lɛ́ɣɛ boma-ŋai dîa a fólo ŋá kpaa máŋ fɛnɛ-sɛŋ da é lɛ́ɣɛ dîa a gbínii.
11Deeƃé kɛ́ɛ a m̀ɛnii ŋí mɛ́ni Lizipa a gɛ́i, 12è lì é Sɔ̂ɔ da ǹóŋ Zonetaŋ káo kúla Zabisi, Gilia kpiniŋ su kpakolo-ŋai yêei. Felesia-ŋai ƃé wɔ́lɔ ǹûai ŋí pàa kɔ̂i Giboa dí dípoma sɛ̀lɛŋ Bɛsaŋ taa-leei su panaŋ ma ƃɛ́i Zabisi-Gilia-ƃelai dí wɔ̀lɔ dí dísìɣe naa loo pêrei dí lí a dia dípɔ taai dí díloo naai. 13È pà a Sɔ̂ɔ da Zonetaŋ káo da dîai Giƃiyɔŋ-ŋai dí dísɛ̀lɛŋ. 14È Sɔ̂ɔ da ǹóŋ díkao lòo Bɛŋsima lɔii ma Zila Sɔ̂ɔ ǹâŋ Kisi ƃolôŋ su. Dí m̀ɛnii kélee kɛ̀ nyíi gâloŋ è mò dîai. Naa pôlu ma, Ɣâla è ǹyée sèe ǹɔii ŋuŋ ŋɔɣâla fɛli-wooi mu.
Felesia-ŋai dí kɔ́ pɛ̀lɛ Eezuɛ ma
(Kɔlɔnikɔ Maa-ŋuŋ 20:4-8)
15Felesia-ŋai dí kɔ́ pɛ̀lɛ ŋɔ́nɔ Eezuɛ-ŋai dîa. Deeƃé da ŋɔkuluƃa-ŋai dí kɔ̀ dípɔ. Kɛ́lɛ kɔlɔ é kpɛ́ɛ Deeƃé ma gɔ́i da kpɛ́ni kɔ́ɔ su. 16Isibibenɔ è kɛ̀ wɛ̂lii é Deeƃé páa. Ǹalôŋ ŋí è kɛ̀ a kpakolo kɛ́tɛ yée lá mu-siɣeɛ wála-walaa. È kùla ŋ̀wála-wala-ƃelai dísuui su. Ŋɔkpálai ŋɔwuyɛ è kɛ̀ yɛ̂ɛ pãŋ lɔ́ɔlu mɛi feerɛ da gbura ƃóa-sɔ̂kpɔ nina sɛ̂lɛŋɔɔ ǹeŋei. 17Kɛ́lɛ Zeruia ǹóŋ Abisai è pà é kpɔ́ŋ ma é Felesia naloŋ páa. Kɛ́lɛ ŋɔkuluƃa-ŋai dí ǹîa-woo ƃò dîɛ m̀ai, “Kwa kɛ̀ liî kɔ́ ma ífe lɛ̀ɛ kúpôlu. Kúfe wɛ̂lii ŋ̀ɔŋ é líiŋ Eezuɛ lɔii su.”
18Nyíŋi pôlu ma dí ŋɔ́nɔ kɔ́ tòo Felesia-ŋai dîa Gɔ̂ɔ. Usãŋ naloŋ Sibeka è gɔ-kuluƃai Safi pàa gɔ́i ŋí su. Safi è kɛ̀ a ŋ̀wála-wala-ƃelai dísuui su nuui dɔnɔ.
19Ǹaa pôlu ma kɔ́ è ŋɔ́nɔ tòo Felesia-ŋai da Eezuɛ-ŋai loai gwaa tɔnɔi ma. Bɛpeleɣɛ̃ɛ-nuui Zareogiŋ ǹóŋ Ɛnaaŋ è Golaya pàa. Ŋɔƃóa-sɔkpɔi ŋuŋ è kɛ̀ yɛ̂ɛ yee pâla-nuu ŋɔkena.
20Dí ŋɔ́nɔ kɔ́ tòo Gâa. Nalôŋ wála-walaa tɔnɔ è kɛ̀ Gâa. Ǹalôŋ ŋí yée-gbua kɛ́ ƃò puu káo feerɛ, gɔ́ɔ-gbua kɛ́ ƃò puu káo feerɛ. È kɛ̀ a ŋ̀wála-wala nuu-kpului su-nuui dɔnɔ. 21È Eezuɛ-ŋai maa fòo. Nya ƃe Deeƃé ǹeɣê Simɛɛ ǹóŋ Zonetaŋ è kɔ̀ bɔ́ é bàa.
22Dia náaŋ ŋí ƃé kɛ̀ a dîai kùla ŋ̀wála-wala-ƃelai dísuui su Gâa. Dí kɔ́ pɛ̀lɛ Deeƃé ma da ǹyée-mu-ƃelai. Kɛ́lɛ Deeƃé-ni dí díyee mɛi ɣàle.
Currently Selected:
Samia Veerɛi 21: KWB
Highlight
Copy
Compare
Share
Want to have your highlights saved across all your devices? Sign up or sign in
© 2012 Bible Society in Liberia
