Kâloŋ-ŋa Veerɛi 4
4
Ilasa è kpɔ̀ŋ mâa tɛ̀ɛ Bɔɔ-nɛnii pɔ
1Ɣâla ŋɔlóno kɛ́-ƃela kpului su-nuui dɔnɔ ŋɔpɔɔ-nɛnîi è wɔ̀lɔ Ilasa ma ɣelêi pere ǹyɛɛi, “Ḿbɔ̂ŋ nyii kɛ̀ a íyee-mu-nuui a saa, ǹyaŋ í gɔ́lɔŋ a gɛɛ è kɛ̀ a Yâwɛɛ ŋɔtíi lɛ́lɛɛ kɛ́ nuu. Kɛ́lɛ nâloŋ tɔnɔ nyii è wɔ́lɔ kpà sòŋ yêei, aâ pá a gɛɛ é ńônii-sinaa feerɛi síɣe a ŋɔluɛ-ŋa a ŋɔkpâi kpɛɛ̂i.”
2Ilasa è ŋ̀óo su tòo ǹyɛɛi, “Lé kpɔŋ-maa ƃé ƃa ŋ̀wɛ̂lii ŋá gɛ́ yɛ̂ɛi? Mó ḿâ lé ƃé íyêei ípɛrɛi mui?” Ǹɛnîi è mò ǹyɛɛi, “Sɛŋ da fé íyee-mu-nuui yêei é kúla wúlɔ kuro pôlu.”
3Ilasa è mò ma ǹyɛɛi, “Lí í sia-sîa íkɔlɛ-ma-ƃelai mɛi í dí marê kɛ́ sane fôlo-ŋa mɛni ma a gɛɛ í zíɣaŋ sóŋ. Ƃa gɛ̀ í dámaa mare kɛ̂ɛ kɛ́. 4Ƃa gɛ̀ tí, gɛ̀ ní, ka ílônii-sinaai ká lɔ́ kápɛrɛi mu ká ǹá tɛ́ kâa. Ye wúlɔ pú zane-ŋai kélee su. Ƃa da láa fɛ̀ɛ, zee íkɔlɛ.”
5Ǹɛnîi è Ilasa lɛ̀ɛ naa é lí é gɛ́ yɛ̂ɛ berei è mò la mai. Ǹaa pôlu ma da ǹônii sinaai dí lɔ̀ dípɛrɛi mu dí ǹáa tɛ́ dîa. Dí pà a zane fôlo-ŋai bɔ́ ǹyaŋ è kɛ̀ nɔ́ ŋ̀úlɔi pûi dí su. 6Gbɛɛ-ŋai, è mò ǹóŋ-surɔŋ dɔnɔ ma ǹyɛɛi, “Pá a zanei da kpɛ́ni.” Kɛ́lɛ è zu tòo ǹyɛɛi, “Sane fôlo fé ŋɔ́nɔ sâa naa.” Nya ƃe ŋ̀úlɔi è kpèra púɔɔ ma gɛ́ kùla ŋɔwulɔ-sanei su. 7È lì é mó ŋ̀âla-naloŋ ma. Ŋ̀âla naloŋ è mò ma ǹyɛɛi, “Lí í ŋ̀úlɔi kɔ́lɛ í gba-ŋai kpɛ́ɛ. Ká ílônii-sinaai ká zɛŋ-kaoi kpéli síɣe a ká pɔ́ɔ ká káɣeniɛi kɛ́ la.”
Ilasa è Sunɛŋ-nɛnii ǹóŋ-surɔŋ ƃâlo
8Ɣele tɔ̂nɔ da Ilasa è lì Sunɛŋ. Tɔɔ nɛ̂ni tɔnɔ è kɛ̀ naa è mò mà a gɛɛ é maa kpɛ̂ŋ kɛ́ é mii-sɛ̂ŋ mii. Nya ƃe tãi kélee a kâa pà lai, a kâa kpèra naa a gɛɛ é ǹáa míi. 9Ǹɛnîi è mò bɔ̂ŋ ma ǹyɛɛi, “Ŋá gɔ́lɔŋ a gɛɛ nalôŋ ŋí a pâ kúpɔ a tãi kéleei, gáa a Ɣâla-nuu maa waa. 10Kú lôŋpo loŋ tɔnɔ kpɛtɛ kúpɛrɛi ŋ̀elêi, kú gbìŋ see naa, têƃele tɔnɔ, see-sɛ̂ŋ tɔnɔ da lâŋpo tɔnɔ m̀aa mɛni ma. Gɛ̀ ní a pɔ̂ri kɛ̂i naa a tãi kélee à pà la kúpɔi.”
11Ɣele tɔ̂nɔ da Ilasa páai, è tɛ̀ ŋɔlôŋpoi su é láa naa. 12Ilasa è mò ǹyée-mu-nuui Giazɛ ma ǹyɛɛi, “Sunɛŋ-nɛnii tóli.” Nya ƃe è ǹɛnîi tôli, ǹɛnîi é pá é tɔ́ɔ Ilasa ŋɛ́i. 13Ilasa è mò ǹyée-mu-nuui ma ǹyɛɛi, “Mó mà, ‘Ƃa tɛɛ mɛni-kpɔ̂lu támaa su kú mɛni ma. Lé ƃé ŋa pɔ̂ri nâa gɛ̂i ímɛni mai? Kwa pɔ̂ri lônoi gâloŋ pɔ́ ímɛni ma kpaa máŋ gɔ-kûluƃa-ŋai mɛi-nuu kɛ́tɛi?’ ”
Ǹɛnîi è zu tòo ǹyɛɛi, “Zɛŋ kélee ŋa ŋ̀wɛ̂lii, gáa ńyêei ŋánûai sáma.”
14Ilasa è marê kɛ̀ ǹyɛɛ mai, “Gɛ̀ ní lé ƃé kwa pɔ̂ri gɛ̂i mì?” Giazɛ è zu tòo, “M̀ɛnii gáa mai nya ƃa lóŋ-surɔŋ fé ǹyêei, ǹyaŋ bɔ̂ŋ káa a siɛ-pɔ̂lɔ.”
15Ilasa è mò ǹyɛɛi, “Dóli.” Nya ƃe è dòli. Tãi è pà lai, è tɔ̀ɔ gbôŋ lá. 16Ilasa è mò ǹyɛɛi, “Góraŋ tí ŋɔtãi kɛ́ɛ ŋí, ƃa pâi lóŋ-surɔŋ lâai íyee tɔ̃ɔi.” È mò ǹyɛɛi, “Kpaa ŋánuu-namui. Ífe íyee-mu-nuui tûmo, Óo Ɣâla naloŋ!”
17Kɛ́lɛ ǹɛnîi è koo sîɣe a bôlu ma koraŋ a tãi tɔnɔi tí é lóŋ-surɔŋ maa sɔlɔ ƃó yɛ̂ɛ berei Ilasa è mò la mai.
18Ǹôloŋ è ƃɔ̀lɔ, ǹyaŋ ɣele tɔ̂nɔ da è lì ǹâŋ pɔ́ nyii kɛ̀ díkpâlaŋ ŋá da zí-sãa ŋá-lɛɛ ma-ƃelai. 19È mò ǹâŋ ma ǹyɛɛi, “Ŋ́uŋ a sôlii! Ŋ́uŋ a sôlii!” Ǹâŋ è mò ǹyée mu-nuui dɔnɔ ma ǹyɛɛi, “Lí la ǹee pɔ́.” 20Tãi ǹyée-mu-nuui è nâa ǹóloŋ mu sìɣe la é lí la ǹee pɔi, zurɔ̂ŋ-looi è kɛ̀ seê-ni gɔ́ɔ mɛi é lɛ́ɛ la zu vóloi é tɛ́ ŋuŋ-ma. Nya ƃe è sàa. 21Ǹɛnîi è bomai sîɣe é lí la bɛ́rɛi ŋ̀elêi-pere Ilasa ŋɔlôŋpoi su é ǹáa naa ŋɔgbìŋ ŋá é kúla é bɛ́rɛi láa tɛ́ bôlu pere. 22È ŋɔsurɔ̂ŋ tôli ǹyɛɛ mai, “Kúyee-mu-ƃelai dɔnɔ tɛɛ a wɛlɛ-sôo tɔnɔ a gɛɛ ŋá lí ŋ̀âla-naloŋ Ilasa pɔ́naa, ŋá pene pôlu.”
23Ŋɔsurɔ̂ŋ è marê kɛ̀ ǹyɛɛ mai, “Íkaa liî bɔ́naa sâa lé mɛni ma? Vé a ŋ̀áloŋ ninai kpaa máŋ Vii-tɔ̂ɔ Ɣelei.” Ǹyaŋ è ŋ̀óo su tòo ǹyɛɛi, “Kú nia nyíti ma. Tɔɔ nɔ́ ŋá lí.” 24Ǹɛnîi è ŋwɛlɛ-sôoi maa Ɣîri é mó ǹyée-mu-nuui ma ǹyɛɛi, “Lí a ńyãa. Ífe kpèra ḿî kwaa da ma fɛ̂ɛ nɔ́ ŋá mó tí yâ.” 25Nya ƃe è pɛ̀lɛ ŋɔsiai ma é lí Ilasa pɔ́naa Kamɛ Yeei ma. Tãi Ilasa è gàa la pâi kwaa kôya mai, ŋ̀âla-naloŋ è mò ǹyée-mu-nuui Giazɛ ma ǹyɛɛi, “Ƃɛ́ tí káa, Sunɛŋ-nɛnii ká tí! 26Lí a kîri ka ǹyaa ká koyaŋ. Gɛ̀ ní marê kɛ́, ‘Kú mɛni? Ísurɔ̂ŋ kɔlɔi ponôɔɔi? Íloŋ-surɔŋ kɔlɔi ponôɔɔi?’ ” Giazɛ è lì bɔ́ naa é marê kɛ́ yɛ̂ɛ berei Ilasa è mò la mai.
Nɛnîi è zu tòo ǹyɛɛi, “Mɛni nyɔ́mɔɔ fé naa.” 27Tãi è sèri la ŋâla-naloŋ pɔ́naa ǹyéei mai, è tòo gɔ́ɔ mu é gɔ́ɔ sóŋ. Giazɛ è pà mɛi a gɛɛ é duâŋ kɛ́lɛ ŋâla-naloŋ è mò ma ǹyɛɛi, “Tée bôlu! Gáa lii too pôlu kɛ́tɛ su, kɛ́lɛ Yâwɛɛ fé mó ní mâ.”
28È mò ma ǹyɛɛi, “Ŋánuu-namui, ŋá í marê kɛ̀ lóŋ-surɔŋ mɛni ma? Ḿve mó ní yâ a gɛɛ ífe níi tɔɔ?”
29Ilasa è mò Giazɛ ma ǹyɛɛi, “Í yokpoi tóo yâ í ŋásia-wûrii síɣe, í lí a kîrɛ ǹɛnîi ŋí ŋɔpɛ́rɛi lá. À kɛ̀ ƃà núu kélee da kàa berei sû, ífe ílaa tì ma. Núu da a ǹáa tí yâ, ífe ŋ̀óo su tòo. Ƃa sèri, ŋásia-wûrui láa ǹóloŋ ŋuŋ mɛi.”
30Ǹóloŋ ǹee è mò mà ǹyɛɛi, “Yɛ̂ɛ berei Yâwɛɛ káa la Ɣele ma a tɔ̃yâ, íkɛ ƃò Ɣele mai, ḿve pâi kulâi ípôlu fɛ̂ɛ nɔ́ kú lí ŋápɛrɛi la.” Nya ƃe è mù siɣe é lɛ́ɛ bôlu dí lí. 31Giazɛ è lì dí túɛ é zia-wûrui láa zurɔ̂ŋ-looi ŋuŋ mɛi, kɛ́lɛ vé ǹɛ̂wo tíŋ ta mɛni ní kpaa máŋ é gáa é túmo. Nya ƃe Giazɛ è pène pôlu a gɛɛ da Ilasa dí koyâŋ. È mò Ilasa ma ǹyɛɛi, “Zurɔ̂ŋ-looi fé mu siɣe ní.”
32Tãi Ilasa è pà la é lɔ́ bɛ́rɛi mui, è zurɔ̂ŋ-looi poma kâa lâani ŋɔgbìŋ ŋá. 33Ilasa è lɔ̀ lôŋpoi su é ǹáa tɛ́ dîa dí feerɛŋɔɔ é Yâwɛɛ fɛli. 34Nya ƃe è tɛ̀ gbìŋ ŋá é láa bomai mɛi é ǹá lɔ́ ǹá é ŋɛ́i sée ŋɔi mɛi é ǹyée pɛ́lɛ ŋɔyeei mɛi. Tãi è làa é sãa ǹôloŋ pomai mɛi, ǹôloŋ kponôi è nâa pɛ̀lɛ fãa ma. 35Ilasa è mù sìɣe é kúla ǹôloŋ mɛi, é sia-sîa bɛ́rɛi mu é ŋɔ́nɔ lí pôlu é lâa bomai mɛi é zu sãa. Ǹôloŋ è tìso gîei lɔ́ɔlu mɛi feerɛ é nâa ŋ̀ɛ́i láa ƃó gɛ́ lɛ̀wo. 36Ilasa è Giazɛ tòli ǹyɛɛ mai, “Sunɛŋ-nɛnii tóli.” Nya ƃe è dòli. Tãi è pà lai, Ilasa è mò ma ǹyɛɛi, “Íloŋ-surɔŋ-looi síɣe.” 37Ǹɛnîi è pà é lɔ́ bɛ́rɛi mu é tóo Ilasa kɔ́ɔ mu é maa pɛ́lɛ ǹɔii ma. Naa pôlu ma, è ǹóŋ-surɔŋ-looi síɣe da ǹyaa dí kúla.
Ilasa è ŋɔ́nɔ ŋɛi-kɛ-maa feerɛ kɛ̀
38Ilasa è pène pôlu Geega ǹyaŋ puru kɛ́tɛ è kɛ̀ a doɔɔ naa kpiniŋ su. Tãi Ɣâla ŋɔlóno-kɛ-ƃela kpului da Ilasa-ni dí kɛ̀ góyaŋ kɛ̂i lai, è mò ǹyée-mu-nuui ma ǹyɛɛi, “Neɣi kɛ́tɛi tɔ́ɔ ŋɔŋ ŋá í kpɔrɔya ɣíli ǹûai ŋí mɛni ma.” 39Ɣâla ŋɔlóno-kɛ-ƃelai su nuu-kpului dɔnɔ è lì a gɛɛ é mii-tûma-laa-ŋa kula é kpɔmɔ da káa m̀áa. È m̀á gɛrɛ-gɛrɛ-ŋai da kùla é ŋɔyokpoi láa fɛ́ɛ a dia. Tãi è pà la pôlui, è dí su tèe-tee é bú ǹáoi su berei máŋ núu da fé kɛ́ ní a gbɔmɔ ƃai zîi kɔ́lɔŋɔɔ lai. 40Tãi ǹáoi è mɔ̀ lai, dí gùla zinâai mɛni ma a gɛɛ dí gbele, kɛ́lɛ tãi dí pɛ̀lɛ dílaa mîi lai, dí wɔ̀lɔ dîyɛɛi, “Óo Ɣâla-naloŋ, núu paa sâle káa neɣii su.” Ǹyaŋ dífe pɔri ní miî. 41Ilasa è mò ǹyɛɛi, “Ka pá a felaƃa fũa.” Tãi dí pà la a felaƃa fũai, è bù neɣii su ǹyɛɛi, “Dɛɛ ǹûai pɔ́ dí mii.” Ǹyaŋ núu paa sɛ̂ŋ fé ŋɔ́nɔ kɛ́ ní neɣii su.
42Tãi tɔnɔ, nalôŋ tɔnɔ ta è kùla Bee Salisa. È kɛ̀ pâi Ŋala-naloŋ pɔ́ a kpólo-kpûa buu feerɛ nyii dí gbɛ̀tɛ a ŋɔsí-sɛŋ m̀á maa-ŋuŋ é pɛ́lɛ tuma-lâa da mii-sãa kpulu-kpulu dîa ŋɔƃɔrɔi su. Ilasa è mò ǹyɛɛi, “Dɛɛ ǹûai pɔ́ dí mii.” 43Ǹyée-mu-nuui è mò ǹyɛɛi, “Ŋa pɔ̂ri mii-sãa kuroi ŋí seêi léŋ ǹûa ŋuŋ tɔnɔi ŋí ŋɛi?” Ilasa è zu tòo ǹyɛɛ mai, “Dɛɛ ǹûai pɔ́ dí mii. Kpɛ́ni fêi, mɛnii ká ŋí Yâwɛɛ a m̀ôi, ‘Da pâi mii-sãai ŋí miî da é lɛ́ɛ.’ ” 44Nya ƃe ǹyée mu-nuui è mii-sãai sêe ǹûai ŋɛ́i, dí mìi da é lɛ́ɛ kpɔ́ nɔ́ yɛ̂ɛ berei Yâwɛɛ è mò lai.
Currently Selected:
Kâloŋ-ŋa Veerɛi 4: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia