Kâloŋ-ŋa Veerɛi 2
2
Dí tɛ̀ a Ilaza Ɣâla-taa
1Tãi Yâwɛɛ è kɛ̀ pâi tɛ̂i la a Ilaza Ɣâla-taa fãa kɛ́tɛ sui, Ilaza da Ilasa dí kɛ̀ perêi díkɛ kùla Geega. 2Ilaza è mò Ilasa ma ǹyɛɛi, “Lɛɛ ƃɛ́ kpɛ́ni fêi, Yâwɛɛ a ńdɛɛ Bɛtɛ.” Kɛ́lɛ Ilasa è zu tòo, “Ŋa ŋ́oo míi íyêei a gɛɛ tãi nɔ́ Yâwɛɛ káa la ɣele ma a tɔ̃yâi, ǹyaŋ íkɛ ƃò a ífului, ḿve pâi siɣêi ípôlu.” Nya ƃe dí lì Bɛtɛ.
3Ɣâla ŋɔlóno kɛ́-ƃelai kɛ̀ Bɛtɛi, dí kùla dí pá Ilasa pɔ́ naa dí marê kɛ́, “Í gɔ́lɔŋ a gɛɛ Yâwɛɛ a pâi ínuu-namui kulâi íyêei sâa?” Ilasa è zu tòo ǹyɛɛi, “Óowei, ŋá gɔ́lɔŋ, kɛ́lɛ káfe lòno é pîlaŋ ma.”
4Nya ƃe Ilaza è mò mà ǹyɛɛi, “Ilasa, lɛɛ ƃɛ́. Yâwɛɛ a ńdɛɛ Zɛleko.” Ǹyaŋ è zu tòo, “Ŋa ŋ́oo míi íyêei a gɛɛ tãi nɔ́ Yâwɛɛ káa la ɣele ma a tɔ̃yâi, ǹyaŋ íkɛ ƃò a ífului, ḿve pâi siɣêi ípôlu.” Nya ƃe dí lì Zɛleko.
5Ɣâla ŋɔlóno-kɛ-ƃelai kɛ̀ Zɛlekoi, dí kùla dí pá Ilasa pɔ́ naa, dí marê kɛ́, “Í gɔ́lɔŋ a gɛɛ Yâawa a pâi ínuu-namui kulâi íyêei sâa?” Ilasa è zu tòo ǹyɛɛi, “Óowei ŋá gɔ́lɔŋ, kɛ́lɛ káfe lòno é pîlaŋ ma.”
6Nya ƃe Ilaza è mò ma ǹyɛɛi, “Lɛɛ ƃɛ́ kpɛ́ni fêi, Yâwɛɛ a ńdɛɛ Zɔdiŋ Ya-leei ma.” Ǹyaŋ è zu tòo, “Ŋa ŋ́oo míi íyêei a gɛɛ tãi nɔ́ Yâwɛɛ káa la ɣele ma a tɔ̃yâi, ǹyaŋ íkɛ ƃò a ífului, ḿve pâi siɣêi ípôlu.” Nya ƃe dí feerɛ dí lì. 7Ɣâla ŋɔlóno kɛ́-ƃelai buu lɔ́ɔlu dí lì dí tɔ́ɔ kwaa kôya ma dí kɛ́ ƃɛ́i kàa Ilaza da Ilasa dí kpèra naa Zɔdiŋ Ya-leei mai. 8Ilaza è ŋɔyokpoi kùla ma, é ǹyái ŋá lókwa la. Ǹyái ŋáa è kɔ̀lɛ gîei feerɛ, kɔɔ yêe mɛi pere da laa-mii-yee mɛi pere, ǹyaŋ dífeerɛ dí dìyeŋ lɔii kpâla ma.
9Tãi dí nâa ǹyái tìyeŋ lai, Ilaza è Ilasa marê kɛ̀ ǹyɛɛ mai, “Mó mâ, lé ƃé ƃa ŋ̀wɛ̂lii ŋá gɛ́ yɛ̂ dí lɛ́ɛ pâi ŋ́gulâi íyêei?” Ilasa è zu tòo, “Tɔɔ ŋá íwala-wala-laai gɛ́tɛ ɣele sɔlɔ ƃó é tɛ́ɛ ḿarâi dîa a gɛɛ ŋá lɛ́ɛ ípɔɔ ŋá a dítuɛ-nuu.”
10Ilaza è zu tòo ǹyɛɛi, “Ƃa mɛni kpanaŋɔɔ mare kɛ̂ɛ kɛ́. É máŋ kɛ́ tí, à kɛ̀ ƃa ŋ́gàa a tãi da pâi ŋ́gûlai la íyêei, gɛ̀ nì a pâi kɛ̂i a ípɔɔ, kɛ́lɛ à kɛ̀ ƃà wàla ŋ́gaa, gɛ̀ ní vé pâi kɛ̂i tí.”
11Tãi díkɛ̀ niî siâi la, díkɛ lònoi, a naa maa félaa kpɔ́, ŋɔŋ kɔ-kɔ́-keleŋ da ŋɔŋ sôo-ŋa nyii-ŋai kɛ̀ ŋɔŋ kɔ-kɔ́-keleŋ siâi, dí kùla dí ŋɛ́i, dí Ilaza da Ilasa ŋáa kɔ́lɛ, ǹyaŋ fãa kɛ́tɛ è tɛ̀ a Ilaza Ɣâla-taa. 12Ilasa è nyíŋi kàa ǹyaŋ è wɔ̀lɔ a ɣelêi pere, “Ńâŋ! Ńâŋ! Eezuɛ ŋɔkɔ́-keleŋ da ŋɔsoo sia kpakolo-ŋai!” Ǹyaŋ Ilasa fé ŋɔ́nɔ Ilaza káa ní. Nya ƃe è ŋɔseɣei kùla ma é vála. 13Ilaza ŋɔyokpoi kùla ǹyêei é tóoi, Ilasa è zìɣe ǹyaŋ è lène pôlu é tɔ́ɔ Zɔdiŋ Ya-leei zîŋ ŋá. 14Nya ƃe è ǹyokpoi sìɣe nyii kùla Ilaza yêei é tóoi é ǹyái ŋá lókwa la. È marê kɛ̂ɛ kɛ̀ ǹyɛɛi, “Yâwɛɛ kɔɔ nâa, Ilaza Ŋɔɣâlai?” Ǹyái ŋá ŋáa è kɔ̀lɛ, é tɔ́ɔ laa-mii-yêe mɛi-pêre da kɔɔ-yêe mɛi-pêre ǹyaŋ è ǹyái tìyeŋ. 15Ɣâla ŋɔlóno kɛ́-ƃela kpului kùla Zɛleko nyii-ŋai kɛ̀ tɔɔ-ni dí kɛ́ naa kàai dí mò dîyɛɛi, “Ilaza ŋɔmɔ̂leŋ káa Ilasa kponôi.” Ǹyaŋ dí lì a gɛɛ da dîa-ni dí koyaŋ. Dí dímaa pɛ̂lɛ ǹɔii ma ŋ̀ɛ́i túɛ. 16Dí mò ma dîyɛɛi, “Ƃɛ́ káa, kúai a íyee mu-ƃelai, kponoi kpânaŋ-ƃela buu lɔ́ɔlu díkaa kúyêei. Ǹɛɛ naa dí lí dí ínuu-namui kɔ́ri. Tãi da Yáawɛ Ŋɔmɔ̂leŋleŋ è zìɣe é zee ǹyée-ŋai da tôŋ su kpaa máŋ diŋ-tiŋ-ŋai da su.” Ilasa è zu tòo ǹyɛɛi,
“Kpao, káfe dí tɛ̀ɛ.”
17Dí lɛɛ kpɔ́ kpâlai ǹá dí kɛ́ gberâi fè é lɛ́ɛ la zu ŋumɛ é ŋɛ́i sóŋ a sɛŋ nyii va pɔri ǹyée kulâi díwoo mu. Nya ƃe è mò ǹyɛɛi, “Ka dí tɛ́ɛ.” Nya ƃe dí kpakolo buu lɔ́ɔlu tɛ̀ɛ nyii-ŋai gɔ̀ri a ɣele-kûu saaƃa kɛ́lɛ dífe gáa ní. 18Tãi dí pène la pôlu Ilasa pɔ́ naa nyii kɛ̀ nîi Zɛlekoi, è mò dîa ǹyɛɛi, “Fé mó ní kâa a gɛɛ káfe lî?”
Ilasa è ŋɛi-kɛ́-maa feerɛ kɛ̀
19Daa-lêei su kpakolo-ŋai dí mò mà dîyɛɛi, “Kúnuu-namui, ƃɛ́ káa, yɛ̂ɛ berei ya gâai lai, daai ŋí tɔɔ̂i kwaa lɛ́lɛɛ ma, kɛ́lɛ ǹyái nyɔ̂mɔɔi ǹyaŋ ǹɔii fa sí-sɛŋ lɛ̀lɛ.” 20Ilasa è mò ǹyɛɛi, “Ka pá mî a kawúlu nina tɔnɔ. Ka mii-kpôlo pú zu.” Nya ƃe dí pà la bɔ́. 21Nya ƃe è kùla é lí ǹyái lá é mii-kpôloi píli ǹyái su ǹyɛɛi, “Mɛnii ká ŋí Yâwɛɛ a m̀ôi. ‘Ŋa ŋɔ́nɔ ǹyái maa kɛ́ a ŋwaa. Vé pâi ŋɔ́nɔ ǹûai kɛ̂i dí sáa kpaa máŋ é ǹɔii kɛ́ a nyɔ́mɔɔ sí-sɛŋ mɛni ma.’ ” 22Ǹyaŋ ǹyái lɛ̂lɛɛi é tóo sâai ŋí ma, yɛ̂ɛ berei Ilasa è wɔ́lɔ mò lai.
23Ilasa è kùla naa é lí Bɛtɛ. Gɛ́ɛ siâi berei ma gɛ́ lii, sinâa-nɛyaa da-ni dí kùla taa tɔ̂nɔ su dí kɛ́ ɣɛ́lɛ maa kûla gbonôi. Dí mò mà dîyɛɛi, “Kula ƃɛ́ í lí a íŋûa kpulaŋ, kula ƃɛ́ í lí a íŋûa kpulaŋ.”
24È tìnaŋ dí pɔ́ naa pêre é dí káa sĩi, é dí náɣaŋ Yâwɛɛ láai su. Nya ƃe lɔɔ fɛnɛ-sãa kpaya-kpaya feerɛ dí kùla nɔɔi su dí zinâa-nɛyãai buu náaŋ káo feerɛ páa.
25Ǹyaŋ è kùla naa é lí Kamɛ Yeei ma é kúla naa é lí Sameria.
Currently Selected:
Kâloŋ-ŋa Veerɛi 2: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia