Kɔlɔnikɔ Veerɛi 2
2
Dí díkpîŋ kpɛ̀tɛ Ŋ̀âla-pɛrɛ Kɛ́tɛi tɔɔ mɛni ma
(Kâloŋ-ŋa Maa-ŋuŋ 5:1-18)
1Saloma è gbɛ̀tɛ gíli ŋá a gɛ́ɛ dí Ŋ̀âla-pɛrɛ Kɛ́tɛi tɔ́ɔ Yâwɛɛ mɛni ma da ŋɔkâloŋ-pɛrɛi. 2È kpakolo wála buu lɔ́ɔlu mɛi feerɛ (70,000) sìɣe zu a gɛ́ɛ díkɛ zãai tĩɛ, é kpakolo wála buu lɔ́ɔlu mɛi saaƃa (80,000) síɣe zu a gɛ́ɛ díkɛ gɔnii saa ǹyée lɔii su. È ŋɔ́nɔ kpakolo wála saaƃa, ŋ̀uŋ lɔ́ɔlu mɛi da (3,600) sìɣe zu a gɛ́ɛ díkɛ díi kɛ́-ƃelai mɛi kâa.
3È worɛ̂ tɛ̀ɛ Taya kaloŋ Elaŋ pɔ́-naa ǹyɛɛ m̀ai, “Ye wúru-kpono-ŋa tɛɛ mî yɛ̂ɛ berei í wɔ́lɔ gɛ̀ la ǹâŋ Deeƃé mi gɛ́ɛ kɛ̀ ŋɔkâloŋ-pɛrɛ kɛ́tɛi tɔɔ̂i. Í sîda wuru-kpono-ŋa tɛ̀ɛ bɔ́. 4Ŋaâ gbɛ̀tɛ ŋ́gili ŋá a gɛ́ɛ ŋá Ɣâla-pɛrɛ kɛ́tɛ tɔ́ɔ Ŋáɣâlai Yâwɛɛ mɛni ma. Ŋa bɛ́rɛi ŋí tɔɔ̂i a gɛ́ɛ ŋ́gɛ kéreŋ sala kúŋ nɛ̃ɛ kula naa, kúkɛ mii-sãa maa-waa-ŋa sèe naa, kúkɛ kéreŋ sala kùla naa a ɣele-wulii da ɣele-wala a Vii-tɔɔ-ɣelei da ŋ̀áloŋ nina kuu-ŋai nyii-ŋai díkaa Kúɣâlai Yâwɛɛ mɛni ma yɛ̂ɛ berei gáa wɔ́lɔ la Eezuɛ-ŋai mɛni mai. 5Ŋ̀âla-pɛrɛi ŋa pâi dɔɔ̂i a pâi kɛ̂i kpɔ́ a gɛ́tɛ, kpɛ́ni fêi, Kúɣâlai kɛ́tɛi kpɔ́ é tɛ́ɛ ŋ̀âla-ŋai kélee dîa. 6Núu da fa pɔri pɛ́rɛ tɔɔ̂i Ɣâla mi, kpɛ́ni fêi, gɛ́tɛi é tɛ́ɛ ŋ̀ele-kɔlɔŋ tí da bôlu-pere ɣele-kɔlɔŋ sui ma. M̀ɛni ma, Fa pɔ̂ri pɛ́rɛ tɔɔ̂i mì fɛ̂ɛ nɔ́ ƃɛ́i da kɛ̂ kéreŋ sala kulâi naa ŋ̀ɛ́i-tuɛi. 7M̀ɛni ma, ye yɛrɛ-kɛ́ núu lɛ́lɛɛ tɔnɔ tɛɛ mî nyíi a gôo, káne, ƃara da kɔli sâa, gɛ́ seɣe-kpɔlu mu-tɛɣiɛ, seɣe-kpɔlu da seɣe-buluŋ kɛ́ɛ kpɛ̀tɛi. M̀aa-nuui kpîŋ é kɛ́ a ǹúui nyíi a pɔ̂ri kɔni saa-tii kɛ̂i. Ǹúui ŋí da ǹyɛrɛ-kɛ-ƃelai ǹâŋ Deeƃé è wɔ́lɔ dí lɛ̀ Zuda da Zerusâlɛŋ da pâi tíi kɛ̂i gîe ma. 8Ye sîda, sapɔlɔ wuru lɛ́lɛɛ da aguŋ wuru-kpono-ŋa kula Lɛƃanɔŋ í dí tɛɛ mî. Ŋá gɔ́lɔŋ a gɛ́ɛ wúru Ƃéla-ƃèla lɛ́lɛɛ-ŋa díkaa ílɔii su. Ŋa pâi ŋánûai tɛɛ̂i da ínûai dí díi ŋí kɛ́ gîe ma. 9Ŋa wuru-kpono támaa wɛ̂lii. Bɛ́rɛi ŋa pâi dɔɔ̂i, a pâi kɛ̂i a pɛ́rɛ kɛ́tɛ maa-pɔlɔ-pɔlɔɔ. 10Ŋa pâi wîi kuluŋ wála ŋ̀uŋ feer (200,000), bale kuluŋ wála ŋ̀uŋ feerɛ (200,000), ŋwã̂ai tiŋ wála buu feerɛ káo feerɛ (22,000) da Ɔle wulɔ tìŋ wála buu feerɛ káo feerɛ (22,000) tɛɛ̂i dípɔ a díkɔ̃nɔŋ.”
11Taya kaloŋ Elaŋ è Saloma wóo su tòo a kɔlɔ ǹyɛɛ mài, “Yâwɛɛ è ŋɔnûai wɛ́lini. Ǹyaa ƃe gɛ̀ é íkɛ a kâloŋ dímɛi.” 12Elaŋ è ŋɔ́nɔ mò Saloma ma ǹyɛɛi, “Laa-ma-tɛ é tɛ́ɛ Eezuɛ Ŋɔɣâlai Yâwɛɛ pɔ́. Ǹyaa ƃé ǹɔii kpɛ̀tɛ da ŋ̀elei! A Gâloŋ Deeƃé ǹóŋ kɛ́ a táre nuu. A táre tɛ́ɛ bɔ́ a gɛ́ɛ gɛ́ mɛni ŋá kàa, nyíi pâi Ŋ̀âla-pɛrɛ Kɛ́tɛi tɔɔ̂i Yâwɛɛ mɛni ma é tela kâloŋ-pɛrɛ tɔɔ gbîŋ mɛni mai. 13Ŋa ǹyɛrɛ kɛ́-nuui Ulaŋ Abi tɛɛ̂i. 14Ulaŋ Abi ǹee è kùla Daŋ ŋɔsîi su. Ǹâŋ è kùla Taya. Ǹalôŋ ŋí káa a gôo, káne, ƃara, kɔli, kɔni, da wuru yɛrɛ-kɛ́ nuu. A seɣe pɔ̃yɛɛ tòo a kpɔluɔɔ mu-tɛɣiɛ, buluŋ kɛ́ɛ, gbɔlu da gole nɛnɛ-fɛfɛ. Kɔni sâa-pere sii támaa maa târe káa ǹalôŋ ŋí yêei. A pɔ̂ri sɛŋ pɔyɛ̃ sîi kélee da nɛ̀ mai. Da íyɛrɛ kɛ́-ƃelai da pâi tíi kɛ̂i gîe ma da diai Dɔɔ-nuui Deeƃé, ínâŋ è dílɛ̀i. 15M̀ɛni ma, tɔɔ-nuu, ye wîi, bâlei, ɔ̂le wulɔi da ŋwã̂ai í íkono tèe lai tɛ́ɛ. 16Yà gɛ̀ tí, gɛ̀ ní kwa pâi ŋ̀úru-kponoi têei Lɛƃanɔŋ kú dí yéŋ a ǹyái dí pá Zâpa, nyíi ya pɔ̂ri dísiɣêi í lí a dia Zerusâlɛŋ.”
Dí pɛ̀lɛ Ŋ̀âla-pɛrɛ Kɛ́tɛi tɔɔ̂i
(Kâloŋ-ŋa Maa-ŋuŋ 6:1-38)
17Saloma è ŋɔ̃ya-ŋai kɛ̀ Eezuɛi kélee lòno yɛ̂ɛ berei ǹâŋ Deeƃé è wɔ́lɔ gɛ̀ lai. Diai kɛ̀ naai díkelee díkɛ̀ a núu wála ŋ̀uŋ tɔnɔ pôlu lɔ́ɔlu káo saaƃa, ŋ̀uŋ lɔ́ɔlu mɛi da (153,600). 18È ǹûai ŋí wála buu lɔ́ɔlu mɛi feerɛ (70,000) kɛ̀ a kpîri siɣe-ƃela, è wála buu lɔ́ɔlu mɛi saaƃa (80,000) sìɣe zu díkɛ kɔni wôlo ǹyéei su. È ŋɔ́nɔ wála ŋ̀uŋ saaƃa, ŋ̀uŋ lɔ́ɔlu mɛi da (3,600) siɣe zu díkɛ díi kɛ́-ƃelai mɛi kàa.
Currently Selected:
Kɔlɔnikɔ Veerɛi 2: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia