Samia Maa-ŋuŋ 5
5
Gono-têe Gãla káa Felesia-ŋai yêei
1Felesia-ŋai kɛ́ɛ da Gono-têe Gãlai kúla Eezuɛ-ŋai yêei, dí gùla Ɛbɛniza dí lí la dípɔ-taai Asɔdɔ. 2Nya ƃe dí zìɣe dí lí la díɣâlai Daagɔ̃ŋ ŋɔpɛ́rɛi mu, dí zèe bɔkɔɔ̂ŋ kɔlɛ. 3Bôlu ma ɣelei, Asɔdɔ-ƃelai dí dímu sìɣe dí díɣâlai Daagɔ̃ŋ pɔɔkɔ̂ŋ káa toôni Gono-tee Gãlai kɔlɛ ma bɛlɛ́ɛ ǹíi ma. Dí zìɣe dí zèe pôlu zeêi. 4Ɣelei ƃɔ́ɔi, dí dímu sìɣe dí ŋɔ́nɔ gáa toôni Gono-tee Gãlai ŋɛ́i túɛ pere bɛlɛ́ɛ ǹíi ma. Ǹyaŋ dí gàa a gɛ́ɛ díɣâlai Ŋ̀uŋ è kɛ̀ a ŋ̀óloɔɔ ǹyee veerɛ dí kɛ̀ a dí ɣale-ɣaleɛɛ díkɛ ƃò toôni gbôŋ lá. Kɛ́lɛ gbono è kɛ̀ a ŋ̀áa pɔriɛɛ gɛ́ ƃò lâani naa. 5M̀ɛnii ŋí ƃé Daagɔ̃ŋ ŋɔsâla láa soŋ-ƃelai da dîai kélee da lɔ̂ Daagɔ̃ŋ ŋɔpɛ́rɛi mui dífa ƃɔ̀rɔŋ la gbôŋ lá-ƃerei da kɛ̀ lɔ̂i Daagɔ̃ŋ ŋɔfɛli kêrei mu Asɔdɔ taa sui.
6Ǹuu-namui è mɛni kpɔ̂lu támaa làa Asɔdɔ-ƃelai kélee dîa. È gɛ̀ pala é tée dîa da mɔ̃lɛ-laa támaa sɔlɔ ƃó da díkɔlɛ ma-ƃelai kélee. 7Díkɛɛ da gàa mɛni-ŋai ŋí dí kɛ̀ a dîai, dí mò dîɛi, “Eezuɛ-ƃelai díɣâlai da kúɣâlai Daagɔ̃ŋ ƃé gɛ̂i mɛni kpɔ̂lu-ŋai ŋí díkɛ làa kûa. M̀ɛni ma kwaa kú gula ƃɛ́.” 8Nya ƃe Asɔdɔ-ƃelai dí Felesia-ŋai mɛi-ƃela kpaya-kpayai kélee tòli dí dímarê kɛ́ dîɛi, “Lé ƃé kwa pâi gɛ̂i a Eezuɛ-ƃelai Díɣâlai Ŋɔkono-tee Gãlai ŋí?” Dîɛ dîai, “Ka ziɣe ká lí la Gâa.” Nya ƃe dí zìɣe dí lí la Gâa nyíi kɛ̀ a Felesia-ŋai dítaa-leei dɔnɔ. 9Kɛ́lɛ, dí liɛ́ɛ la naai, Ǹuu-namui è mɛni kpɔ̂lu támaa làa naa-ƃelai dîa. È gɛ̀ dí yao kpɔ́ a ŋ̀ánaa. È mɛni kpɔ̂lu làa daai tí su-ƃelai kélee dîa, é máŋ kɛ́ yɛ̂ɛ ǹúu pɔlɔ-ŋai kpaa máŋ ǹyaŋkpa-ŋai. 10Nya ƃe dí Ɣâla Ŋɔkono-tee Gãlai sìɣe dí lí la Ɛkulɔŋ. Kɛ́lɛ é lɛ́ɛ pâi serîi daai su, naa-ƃelai kélee dí pɛ̀lɛ môi dîɛi, “Daâ pá a Gono-tee Gãlai nyíi gáa a Eezuɛ-ƃelai Díɣâlai pɔ́ɔi a gɛ́ɛ é kúpaa kwa kúnûai kélee.” 11Nya ƃe dí Felesia-ŋai díkâloŋ-ŋai kélee tòli ŋɔ́nɔ ŋuŋ pîlaŋ dîɛ dîai, “Ka gãlai ŋí tɛ́ɛ pôlu ƃɛ́i è kùla naai a gɛ́ɛ kúfe sàa.”
Ǹûai kélee díkɛ yaôi, kpɛ́ni fêi, Ɣâla è kɛ̀ dípaâi. 12Diai lɛ̀ɛ a dífului díkɛ mɔ̃lɛ laa támaa sɔlɔ ƃôi balai yêei. Dí wɔ̀lɔ díɣâlai-ŋai dîa a gɛ́ɛ dí kpɔŋ ḿâa tɛ̀ɛ dípɔ.
Currently Selected:
Samia Maa-ŋuŋ 5: KWB
Highlight
Copy
Compare
Share
Want to have your highlights saved across all your devices? Sign up or sign in
© 2012 Bible Society in Liberia
