Samia Maa-ŋuŋ 23
23
Deeƃé è Keila taai kula yêei kɛ̀
1Ɣele tɔnɔ da ǹûai dí mò Deeƃé ma dîyɛɛi, “Felesia-ŋai díkaa nɔ́ niî kɔ́ pɛlɛ̂i Keila taai ma, díkɛ ǹaa-ƃelai dímii-sãai kùla m̀ii-sãa táŋ kwaai ma.” 2Nya ƃe Deeƃé è Yâwɛɛ marê kɛ̀ ǹyɛɛi, “Ŋá kɔ́ pɛ́lɛ Felesia-ŋai ŋí dîa?” Yâwɛɛ è ŋ̀óo su tòo ǹyɛɛi, “Óoei, kɔ́ pɛ́lɛ dîa í Keila ŋuŋ ma ƃó.” 3Kɛ́lɛ Deeƃé ŋɔkɔ-kuluƃa-ŋai dí mò ma dîyɛɛi, “Ya gâai, kwa yaôi Felesia-ŋai dîa Zuda ƃɛ́. Lé ƃé pâi kúkɛ̂i à kɛ̀ kwà lì Keila a gɛ́ɛ kú kɔ́ naa kwa dîa-ni?” 4Deeƃé è ŋɔ́nɔ Yâwɛɛ marê kɛ̀. Yâwɛɛ ǹyɛɛ m̀ai, “Ye lí lônii ma. Ŋa pâi gɛ̂i í Felesia-ŋai yée mɛi ɣále gɔ́i su Keila.” 5Deeƃé da ŋɔkɔ-kuluƃa-ŋai dí lì naa dí kɔ́ kpɔ́ Felesia-ŋai pɔ́-naa a gbanaŋɔɔ. Dí dítamaa ɣele pàa dí díniŋa-ŋai da Keila kula yêei kɛ́.
6Gɛ́ɛ tíi, Sɔ̂ɔ è mɛni a gɛ́ɛ Deeƃé káa Keila. Sɔ̂ɔ è mò ǹyɛɛi, “Ɣâla aâ fáa ma a gɛ́ɛ ŋá Deeƃé sóŋ. Deeƃé káa nâa daai su nyíi maa tinaŋɔɔ̂i a siyâŋ. Núu a pɔri ǹáa tɛ̂i é zɔ́ɔŋ tóo.”
7Sɔ̂ɔ è gbɛ̀tɛ gíli ŋá a gɛ́ɛ é lí naa é ŋɔkɔ-kuluƃa-ŋai tínaŋ daai ma a gɛ́ɛ é Deeƃé sóŋ da ŋɔkɔ-kuluƃa-ŋai. È kéla-ŋa tɛ̀ɛ daa-ŋai su da gbanâŋ-ŋai lá a gɛ́ɛ dí m̀ó dîa ǹyɛɛi, “Ka zinâai tɛɛ a gɛ́ɛ dí kɛ́ a Sɔ̂ɔ ŋɔkɔ-kuluƃa-ŋai da!” 8Sɔ̂ɔ è ŋɔkɔ-kuluƃa-ŋai ŋáa tɛ̀ ma kɔ́ kɔ́ mɛni ma a gɛ́ɛ dí Keila dí sóŋ Deeƃé da ŋɔkpakolo-ŋai 9Deeƃé è mɛ̀ni a gɛ́ɛ Sɔ̂ɔ a gbɛ̀tɛ a gɛ́ɛ é zóŋ. È mò zâla-laa soŋ-nuui Aƃiata ma ǹyɛɛi, “Kú Ɣâla marê kɛ́ lé ƃé kwa pɔri gɛ̂i.” 10Deeƃé è Ɣâla fɛ̀li ǹyɛɛi, “Óo Yâwɛɛ, Eezuɛ Ŋɔɣâlai, dí mò ḿâ a gɛ́ɛ Sɔ̂ɔ a gbɛtɛ̂i gíli ŋá a gɛ́ɛ é pá ƃɛ́. Lé ƃé ŋa pɔri gɛ̂i? À kɛ̀ a ǹûai maa yao a gɛ́ɛ é daai su kara, kpɛ́ni fêi, kúkaa ƃɛ́. 11Keila-ƃela kpaya-kpaya da pâi ńdɛɛ̂i Sɔ̂ɔ pɔ́-naa? Kpaa máŋ gáa pâi a tɔ̃yâ? Kpera yɛ̂, ye m̀ó ḿâ, Yâwɛɛ.” Yâwɛɛ ǹyɛɛ m̀ai, “Owoei, a pâi pâi.”
12Deeƃé ǹyɛɛ m̀ai, “Nûa kpaya-kpayai Keila da pâi kwa ŋákɔ-kuluƃa-ŋai kútɛɛ̂i Sɔ̂ɔ pɔ́?”
Yâwɛɛ ǹyɛɛ m̀ai, “Owoei da pâi gɛ̂i tí.”
13Nya ƃe Deeƃé da ŋɔkɔ-kuluƃa ŋuŋ lɔ́ɔlu mɛi dai dí pɛ̀lɛ lì ƃɛ́i-ŋai dí kɛ̀ wɛ̂lii lai a tɛɛ-ŋa. Sɔ̂ɔ è mɛ̀ni a gɛ́ɛ Deeƃé a kula Keila. È gbɛ̀tɛ a gɛ́ɛ vé lɛ̀ɛ bôlu.
Zonetaŋ è mò a gɛ́ɛ Deeƃé a pâi kɛ̂i a kâloŋ
14Deeƃé è kɛ̀ loo-pere su Zifi Fɛ̃ɛ-kpalaŋ su ǹyée lɔii su. Sɔ̂ɔ è kɛ̀ nɔ́ gɔ̂rii, kɛ́lɛ Ɣâla fé fáa ní ma a gɛ́ɛ é zoŋ. 15Ɣele tɔnɔ da Deeƃé è kɛ̀ Ɔriɛ, Zifi fɛ̃ɛ-kpalaŋ su. È kɛ̀ yaôi, kpɛ́ni fêi, Sɔ̂ɔ è pà gwaa tɔnɔi tí ma pere a gɛ́ɛ é bàa. 16Nya ƃe Sɔ̂ɔ ǹóŋ Zonetaŋ è lì Olɛ a gɛ́ɛ é Deeƃé káa. Ɣâla è kpɔŋ mâa bɔ́ é gɛ́ Deeƃé líi mu é siɣe. 17Zonetaŋ è mò ma ǹyɛɛi, “Ífe yao, ǹâŋ Sɔ̂ɔ fé pâi pɔri ǹyée pɛlɛ̂i yâ a dɔnɔ kpîŋ. Nyíŋi pôlu ma yá ƃé pâi kɛ̂i a Eezuɛ-ŋai díkâloŋ. Ǹyaŋ ŋa pâi kɛ̂i a ítii kɛ́-nuu kɛ́tɛi. Ńâŋ ǹyaa kpîŋ è nyíŋi kɔ́lɔŋ a ǹɛ́lɛɛ.” 18Dífeerɛ dí díkono tèe díkîe-ni yêei a gɛ́ɛ da pâi kɛ̂i a díteniŋ ƃoɔɔ díkîe-ni mɛni ma. Nya ƃe Zonetaŋ è lì pôlu bɔ́-naa. Kɛ́lɛ Deeƃé è lɛ̀ɛ Ɔriɛ.
Deeƃé è pù Sɔ̂ɔ yêei
19Núu da-ni dí kùla Zifi taai su dí lí Sɔ̂ɔ pɔ́-naa Giƃea dîyɛɛ m̀ai, “Gâloŋ, Deeƃé káa ǹoôi kúkɔlɛ ma. Ǹaa káa nɔ́ Ɔriɛ kɔlɛ Akila yeei ma, Zɛsimɔŋ kwára pere. 20À kɛ̀ ya pa kwa pâi kpɔnîii yâ ízɔŋ.”
21Sɔ̂ɔ è mò dîa ǹyɛɛi, “Ka mɛni lɛ́lɛɛ támaa kɛ́ mî. Ŋa Yâwɛɛ fɛlîi a gɛ́ɛ é lûwa láa kâa. 22Kɛ́lɛ ŋa ŋ̀wɛ̂lii ká ƃɛ́i ma kɔ́ri Deeƃé káa naai da ƃɛ́i kélee a kɛ̀ lì naai. Ka naa maa kpɛ́ɛ a kɛ̀ núu da a tá gáa. Dí mò ḿâ a gɛ́ɛ wôya târe támaa káa ǹyêei. 23Ka ƃɛ́i-ŋai kɔ́ri a nòo naa a tɛɛ-ŋai. À kɛ̀ tí, ká pá pôlu, gɛ̀ ní kwa kâa-ni kwa pâi liî naa. À kɛ̀ gáa niî gwaa tɔnɔi tí ma, kpaa máŋ a kula naa a lí Zuda-ƃelai sáma, ŋa pâi lɛɛ̂i gɔ̂rii é lɛ́ɛ la zu ŋá zoŋ.”
24Dí dímu sìɣe dí lí Zifi t Sɔ̂ɔ túɛ. Dí gàa a gɛ́ɛ Deeƃé da ŋɔkɔ-kuluƃa-ŋai díkɛ niî Mao vɛ̃ɛ-kpâlaŋ su, Araba kpiniŋ su Zɛsiŋmɔŋ lɔii kwára pere. 25Sɔ̂ɔ da ŋɔkɔ-kuluƃa-ŋai dí lì a gɛ́ɛ dí Deeƃé kɔ́ri. Deeƃé è mɛ̀ni a gɛ́ɛ Sɔ̂ɔ è kɛ̀ pâi. Nya ƃe è lì ƃɛ́i da naa tòli a kɔnii é sée naa Mao Fɛ̃ɛ-kpalaŋ su. Sɔ̂ɔ kɛ́ɛ a mɛni a gɛ́ɛ Deeƃé káa vɛ̃ɛ-kpâlaŋ tí sui è làaŋ ma. 26Sɔ̂ɔ è lì ǹyéei m̀éla tɔnɔ ma, Deeƃé da ŋɔkɔ-kuluƃa-ŋai dí ƃò ǹyée-ƃelai nyíti ma pere díkɛ kɔ̀ a gɛ́ɛ dí pú. Naa è lɛ̀ɛ a guro a gɛ́ɛ Sɔ̂ɔ da ŋɔkɔ-kuluƃa-ŋai dí Deeƃé ni soŋ. 27Worɛ̂-woo ƃó-nuu tɔnɔ da è pà Sɔ̂ɔ pɔ́-naa ǹyɛɛ m̀ai, “Pá a maa félaa! Felesia-ŋai daâ ǹɔii síɣe. Da naa sãai kélee siɣêi.” 28Sɔ̂ɔ è nâa sìɣe Deeƃé pôlu é pene pôlu é pɛ́lɛ kɔ̂i Felesia-ŋai pɔ́. Zɛŋ ƃé da gwaai tí ma tòli la a “Bú Kɔnii ma.” 29Deeƃé è kùla naa é lí é nòo Ɛŋgidi nyíi tínaɔɔi a siɣâŋ.
Currently Selected:
Samia Maa-ŋuŋ 23: KWB
Highlight
Copy
Compare
Share
Want to have your highlights saved across all your devices? Sign up or sign in
© 2012 Bible Society in Liberia
