1 Co 14
14
A jun tzo'n̈ chucchc ti'al
1Caw tzeyac' eyip e chamc'ojlan e b'a junjn ex. An̈jtona', tzeya'n 'ip e sayn 'ec' jun tzo'n̈ 'opiso tzyac' Yespíritu Dios 'ayex. 'Ay wal jun 'opiso yel xo wach', atn jun alj 'el spaxti Dios. 2'Ay eb' tztac' spaxtin 'a jun tzo'n̈ chucchc ti'al. A 'a Dios tzpaxtin eb', man̈oc 'a 'anma', yujto may junc mach tz'ab'n tas tzyal eb'. Yuj ton Yespíritu Dios tz'ajx yal eb' jun tzo'n̈ cha, palta may junc mach 'ojtnac tas tzyal eb' cha. 3Palta a mach tzaln 'el spaxti Dios, a 'a eb' yit 'anmal tzyal-li, sec tz'och ste'nal eb'. Toto 'ixta', caw tzjaw snab'en eb', tz'ajx sniwnal sc'ojl eb' yu'uj. 4A eb' tzpaxtin 'a jun tzo'n̈ chucchc ti'al, mun tzte'nb'i eb' sch'ocoj. Palta ax eb' tzaln 'el spaxti Dios, atn eb' tz'a'n ste'nal eb' yit creyenteal.
5Tzin nib'j tzex paxtin 'a jun tzo'n̈ chucchc til e masnil. Palta yel xo wal tzin nib'j tzeyal-l spaxti Dios. Yujto a jun tic, yel xo wal 'ay yopiso 'a yib'n̈ jun tzo'n̈ chucchc til cha. A jun tzo'n̈ cha, 'ay ton yopiso, toto 'ay mach tztac' yaln 'eli tas tzyal 'el'chi, sec wach' 'oj 'och ste'nal eb' creyente chi yu'uj. 6Yuj cha, ex wu'tac, ex wanab', q'uinloc an tzin c'och wal-l jun tzo'n̈ chucchc til chi 'ayx ticnec, ¿tas wal jac swach'l tzeyij cani? Cojn to tzwac' eyojcoc 'el jun tzo'n̈ tas 'ac'b'il 'ayn yuj Dios, jun tzo'n̈ sjelnal, mto tzwal-l spaxti Dios yet' jun tzo'n̈ xo cuynb'il 'ayex, cojn 'ixta', 'ay tas wach' 'oj eyi'cn b'i'an.
7Q'uinloc 'ay jun tzo'n̈ son ticnec, tz'oc' junc chirminax, tzc'an̈ pax junc arpa. Toto ton̈j tzsomlji sjaj, ¿tom tzcab'i, tas sb'itn jun jun? 8Q'uinloc 'ay junc owl ticnec, tzc'och yorail s'at eb' soldado 'a owl cha. Tz'oc' strompeta eb', tz'at eb'. Toto man̈oc yaj tz'aj yutz'xi, ¿tom tztac' ya'n lista sb'a eb', tz'at eb' 'a owl cha? 9An̈jtona', 'ixta 'on̈ec. Toto tzcalc jun tzo'n̈ paxti may mach tz'ab'ni, ¿tast wal 'oj yutc eb' snan 'el tas tzcalec? Nab'an̈ej tzon̈ cob' paxtinc 'ixta'. 10A ticnec, til wal jun tzo'n̈ sti eb' 'anma 'ay 'a yolyib'n̈q'uinl tic. Smasnil jun tzo'n̈ sti eb' cha, 'ay yel'ch jun jun. 11Q'uinloc 'ay junc mach tzpaxtini, palta matz cab'c tas tzyala. Toto 'ixta', 'icha to chuc chon̈b'al cajc 'a 'a. An̈jtona', 'icha to chuc chon̈b'al pax yaj 'ayn̈ec. 12An tic, wojc xoni, to tze nib'j jun tzo'n̈ 'opiso tzyac' Yespíritu Dios. Yuj cha, tzwal 'ayex, tzeyac' eyip, sec wach' 'oj e cha jun 'opiso caw wach'. Toto 'ixta', 'oj stac' eya'n ste'nal eb' eyit creyenteal.
13Yuj cha, toto 'ay mach tz'ajx paxtinc 'a junc chuc ti'al, yowlal tzc'an 'a Dios, sec 'oj stac' yaln 'eli tas tzyal 'el'ch jun cha. 14Q'uinloc tzin leslwi 'a junc chuc til ticnec. A 'in pixan tzleslwi. Palta ax in nab'en, matz nachj 'el jac yu'uj, tas chi tzwala. 15Yuj cha, ¿tasm tzqui b'o tze na'a? Man̈ cojnoc tzon̈ leslwiec yet' qui pixan. Yowlal tzon̈ leslwiec pax yet' qui nab'en, sec tznachj 'el cujec. An̈jtona', a yic tzon̈ b'itnec, man̈ cojnoc tzon̈ b'itnec yet' qui pixan. Yowlal tzon̈ b'itnec pax yet' qui nab'en, sec tznachj 'el cujec. 16Q'uinloc 'ay junc ex ticnec, tzeyal wach' paxti 'a Dios 'a junc chuc ti'al. Toto 'ixta', an̈j yet' e pixn tzeyala. Ax eb' 'ayc' eyet'oc, matz nachj 'el yuj eb' tas chi tzeyala. Yuj cha, a yic tzeyaln yuj diosal 'a Dios, matz tac' jun tzleslwi eb' eyet'oc. 17Tecn wach' jun e lesl yic tzeyac' yuj diosal cha, palta may junc mach tz'ajx ste'nal yu'uj. 18Yuj wal dios 'a qui Mam Dios, yujto caw wal tztac' in paxtin 'a jun tzo'n̈ chucchc til chi 'a eyib'n̈ e masnil ta'. 19Palta a yic tzqui yamnec qui b'a 'a culto, yel xo wach' tzwal 'a e ti', yic tzex in cuyni. Yujto wach'xam o'en̈ej paxti'al tzwal 'ayx 'a e ti', palta 'ec'b'al yopiso 'a yib'n̈ lajn̈e'oc mil paxti'al matz nachj 'el eyu'uj.
20Ex wu'tac, ex wanab', man̈ 'icha'oc eb' 'unin, man̈ 'ichcta tzeyutj e b'a e nan jun tzo'n̈ tic. Ax e b'eyb'al, comnoc 'icha eb' cotc 'unin, may 'aj tzb'o eb' maysch'olnil, 'ichcta tzeyutj e b'a. Ax e nab'en, caw te'n tzeyutej, yujto man̈ ex 'unnoc. 21A 'a sley Dios, ata tz'ib'b'il can 'ixtic: An tic, 'oj in paxtin 'a jun chon̈b' tic 'a jun tzo'n̈ chucchc ti'al, yet' 'a sti eb' chucchc chon̈b'al. Palta an̈j 'ijnoc ma'oj ya'ch eb' snab'en 'ayin, xchi Cajlilec. 22Yuj cha, a jun tzo'n̈ chucchc til tzalxi, ch'oxnb'il yajcn 'a eb' man̈ creyenteoc, man̈oc 'a eb' creyente. Palta a yic tzalx 'el spaxti Dios, yic eb' creyente jun cha, man̈ yico'oc eb' man̈ creyenteoc. 23Q'uinloc tzeyam e b'a e masnil ax creyente ex ta ticnec. Q'uinloc c'uxn tzex laj paxtin e masnil 'a jun tzo'n̈ chucchc ti'al. Toto tz'och junc man̈ creyenteoc 'a e cal, toto man̈ yojcoc, tas yaj jun quiquec tic, tecn 'oj yal 'ixtic: 'Icha to owya tzcot 'a sjolm eb' tic, 'oj schioc. 24Palta q'uinloc wan eyaln 'el spaxti Dios e masnil. Toto tz'och junc man̈ creyenteoc 'a e cal, wach'xam man̈ yojcoc tas yaj jun quiquec tic, 'oj nachjc 'el yu'uj, chajtlto 'ay smul. 'Oj sb'eyc'ojloc sb'a, yic 'oj yab'n tas tzeyal junjn ex. 25'Ixta to b'i'an, ax scheclj 'el tas 'ay 'a spixan. Yuj cha, 'oj 'em cuman, ax yaln sb'a 'a Dios. Ax yaln 'ixtic: Yel toni, caw 'aych Dios eyet'oc, 'oj schioc.
Wach' tzcutjec qui b'on smasnil tas
26Yuj cha, ex wu'tac, ex wanab', 'oj wal't 'ayex, tas tzeyutj e b'a ta', a yic tzeyamn e b'a. Comnoc 'ayx tzex b'itni, 'ayx tzeyac' junc cuynb'il, 'ayx tzeyal-l junc tas tz'ajx yuj Dios 'ayex, 'ayx tzex paxtin 'a junc chuc ti'al, 'ayx pax tzeyal-l tas tzyal 'el'ch jun chuc til cha. Comnoc tzlaj 'och e te'nal yuj smasnil tas tze b'o cha. 27Toto 'ayx tzex paxtin 'a jun tzo'n̈ chucchc ti'al, cojxn cab' chawn̈oc, mto 'oxwn̈oc ex tzex paxtini. Junjnal eyaln eyico'. An̈jtona', yowlal 'ay junc ex tztac' e yalni, tas tzyal 'el'chi. 28Toto may mach tztac' yalni tas tzyal 'el'chi, yel xo wach' matz ex paxtin cab' 'a jun tzo'n̈ chucchc til chi 'a 'aj tzeyam e b'a cha. Yel xo wach' mun tzex leslwi 'a Dios yet' e pixan. 29An̈jtona', toto 'ayx tzeyal-l spaxti Dios, cojxn cab' chawn̈oc, mto 'oxwn̈oc ex tzeyal-li. Ax xo e masnil, caw tzeya'ch e chicn 'a spaxti Dios chi tzalx 'ayx cha. 30Q'uinloc 'ay junc ex wan eyaln 'el spaxti Dios 'a e cal. Toto 'ay junc xo tz'ajx yal junc xo tas yuj Dios, yowlal tzex 'och wan eyaln chi b'el, tzyaln can junc xo chi yico'. 31Toto 'ixta', jantc ex tz'ajx eyal-l spaxti Dios, junjnal 'oj stac' eyaln eyico', sec wach' 'oj eyic' e cuynb'il e masnil 'a 'aj tzex jucb'tzaxi. 32Junjn ex tz'ajx eyal-l spaxti Dios, caw tzeyac' cuenta e b'a yet' e nab'en, sec junjnal tzeyal eyico'. 33Toto ton̈j tzon̈ somljiec calni, man̈oc 'a Dios tzcot jun cha. Yujto tznib'ej, sictac tzon̈ 'ajec.
A sb'eyb'al eb' creyente 'a junjn iglesia, caw sictac tz'aj eb' 'ix 'ix. 34An̈jtona', 'ixta 'ayex, yowlal sictac tz'aj eb' 'ix 'a 'aj tzeyam e b'a cha, yujto may spermiso eb' 'ix spaxtin 'a culto. Yiclum cab' tzyutj sb'a eb', yujto 'ixta tzyal sley Dios. 35Toto 'ay junc tas tznib'j eb' tzc'anb'j yab'i', yowlal at 'a yichmil eb' tzc'anb'j sc'ochx 'a yatut. Yujto caw wal man̈ smojc tzpaxtin eb' 'ix 'a culto cha.
36Yowlal tze na coti, to man̈oc 'ayx b'ab'l 'ajxnac spaxti Dios. An̈jtona', man̈ e ch'ocjocn̈ej xe chaj spaxti Dios cha. 37Toto 'ayx tze na'a, to 'ay eyopiso eyaln 'el spaxti Dios, mto tze na'a, to a Yespíritu Dios tzmunlj 'ayex, nachj cab' 'el eyu'uj, atn jun tzo'n̈ schecnb'il Cajlilec tzin tz'ib'j 'at 'ayx tic. 38Toto 'ay eb' may yel'ch jun tzo'n̈ checnb'il tic 'a sat, an̈jtona', may cab' pax yel'ch eb' 'a e sat jun xo.
39Yuj cha, ex wu'tac, tzeyac' eyip, sec 'oj stac' eyaln 'el spaxti Dios. Ax eb' tzpaxtin 'a jun tzo'n̈ chucchc ti'al, man̈ e tench wan eb'. 40Caw wach' tzeyutj e b'on smasnil tas, sec tz'och 'a stzolil.
Currently Selected:
1 Co 14: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
1 Co 14
14
A jun tzo'n̈ chucchc ti'al
1Caw tzeyac' eyip e chamc'ojlan e b'a junjn ex. An̈jtona', tzeya'n 'ip e sayn 'ec' jun tzo'n̈ 'opiso tzyac' Yespíritu Dios 'ayex. 'Ay wal jun 'opiso yel xo wach', atn jun alj 'el spaxti Dios. 2'Ay eb' tztac' spaxtin 'a jun tzo'n̈ chucchc ti'al. A 'a Dios tzpaxtin eb', man̈oc 'a 'anma', yujto may junc mach tz'ab'n tas tzyal eb'. Yuj ton Yespíritu Dios tz'ajx yal eb' jun tzo'n̈ cha, palta may junc mach 'ojtnac tas tzyal eb' cha. 3Palta a mach tzaln 'el spaxti Dios, a 'a eb' yit 'anmal tzyal-li, sec tz'och ste'nal eb'. Toto 'ixta', caw tzjaw snab'en eb', tz'ajx sniwnal sc'ojl eb' yu'uj. 4A eb' tzpaxtin 'a jun tzo'n̈ chucchc ti'al, mun tzte'nb'i eb' sch'ocoj. Palta ax eb' tzaln 'el spaxti Dios, atn eb' tz'a'n ste'nal eb' yit creyenteal.
5Tzin nib'j tzex paxtin 'a jun tzo'n̈ chucchc til e masnil. Palta yel xo wal tzin nib'j tzeyal-l spaxti Dios. Yujto a jun tic, yel xo wal 'ay yopiso 'a yib'n̈ jun tzo'n̈ chucchc til cha. A jun tzo'n̈ cha, 'ay ton yopiso, toto 'ay mach tztac' yaln 'eli tas tzyal 'el'chi, sec wach' 'oj 'och ste'nal eb' creyente chi yu'uj. 6Yuj cha, ex wu'tac, ex wanab', q'uinloc an tzin c'och wal-l jun tzo'n̈ chucchc til chi 'ayx ticnec, ¿tas wal jac swach'l tzeyij cani? Cojn to tzwac' eyojcoc 'el jun tzo'n̈ tas 'ac'b'il 'ayn yuj Dios, jun tzo'n̈ sjelnal, mto tzwal-l spaxti Dios yet' jun tzo'n̈ xo cuynb'il 'ayex, cojn 'ixta', 'ay tas wach' 'oj eyi'cn b'i'an.
7Q'uinloc 'ay jun tzo'n̈ son ticnec, tz'oc' junc chirminax, tzc'an̈ pax junc arpa. Toto ton̈j tzsomlji sjaj, ¿tom tzcab'i, tas sb'itn jun jun? 8Q'uinloc 'ay junc owl ticnec, tzc'och yorail s'at eb' soldado 'a owl cha. Tz'oc' strompeta eb', tz'at eb'. Toto man̈oc yaj tz'aj yutz'xi, ¿tom tztac' ya'n lista sb'a eb', tz'at eb' 'a owl cha? 9An̈jtona', 'ixta 'on̈ec. Toto tzcalc jun tzo'n̈ paxti may mach tz'ab'ni, ¿tast wal 'oj yutc eb' snan 'el tas tzcalec? Nab'an̈ej tzon̈ cob' paxtinc 'ixta'. 10A ticnec, til wal jun tzo'n̈ sti eb' 'anma 'ay 'a yolyib'n̈q'uinl tic. Smasnil jun tzo'n̈ sti eb' cha, 'ay yel'ch jun jun. 11Q'uinloc 'ay junc mach tzpaxtini, palta matz cab'c tas tzyala. Toto 'ixta', 'icha to chuc chon̈b'al cajc 'a 'a. An̈jtona', 'icha to chuc chon̈b'al pax yaj 'ayn̈ec. 12An tic, wojc xoni, to tze nib'j jun tzo'n̈ 'opiso tzyac' Yespíritu Dios. Yuj cha, tzwal 'ayex, tzeyac' eyip, sec wach' 'oj e cha jun 'opiso caw wach'. Toto 'ixta', 'oj stac' eya'n ste'nal eb' eyit creyenteal.
13Yuj cha, toto 'ay mach tz'ajx paxtinc 'a junc chuc ti'al, yowlal tzc'an 'a Dios, sec 'oj stac' yaln 'eli tas tzyal 'el'ch jun cha. 14Q'uinloc tzin leslwi 'a junc chuc til ticnec. A 'in pixan tzleslwi. Palta ax in nab'en, matz nachj 'el jac yu'uj, tas chi tzwala. 15Yuj cha, ¿tasm tzqui b'o tze na'a? Man̈ cojnoc tzon̈ leslwiec yet' qui pixan. Yowlal tzon̈ leslwiec pax yet' qui nab'en, sec tznachj 'el cujec. An̈jtona', a yic tzon̈ b'itnec, man̈ cojnoc tzon̈ b'itnec yet' qui pixan. Yowlal tzon̈ b'itnec pax yet' qui nab'en, sec tznachj 'el cujec. 16Q'uinloc 'ay junc ex ticnec, tzeyal wach' paxti 'a Dios 'a junc chuc ti'al. Toto 'ixta', an̈j yet' e pixn tzeyala. Ax eb' 'ayc' eyet'oc, matz nachj 'el yuj eb' tas chi tzeyala. Yuj cha, a yic tzeyaln yuj diosal 'a Dios, matz tac' jun tzleslwi eb' eyet'oc. 17Tecn wach' jun e lesl yic tzeyac' yuj diosal cha, palta may junc mach tz'ajx ste'nal yu'uj. 18Yuj wal dios 'a qui Mam Dios, yujto caw wal tztac' in paxtin 'a jun tzo'n̈ chucchc til chi 'a eyib'n̈ e masnil ta'. 19Palta a yic tzqui yamnec qui b'a 'a culto, yel xo wach' tzwal 'a e ti', yic tzex in cuyni. Yujto wach'xam o'en̈ej paxti'al tzwal 'ayx 'a e ti', palta 'ec'b'al yopiso 'a yib'n̈ lajn̈e'oc mil paxti'al matz nachj 'el eyu'uj.
20Ex wu'tac, ex wanab', man̈ 'icha'oc eb' 'unin, man̈ 'ichcta tzeyutj e b'a e nan jun tzo'n̈ tic. Ax e b'eyb'al, comnoc 'icha eb' cotc 'unin, may 'aj tzb'o eb' maysch'olnil, 'ichcta tzeyutj e b'a. Ax e nab'en, caw te'n tzeyutej, yujto man̈ ex 'unnoc. 21A 'a sley Dios, ata tz'ib'b'il can 'ixtic: An tic, 'oj in paxtin 'a jun chon̈b' tic 'a jun tzo'n̈ chucchc ti'al, yet' 'a sti eb' chucchc chon̈b'al. Palta an̈j 'ijnoc ma'oj ya'ch eb' snab'en 'ayin, xchi Cajlilec. 22Yuj cha, a jun tzo'n̈ chucchc til tzalxi, ch'oxnb'il yajcn 'a eb' man̈ creyenteoc, man̈oc 'a eb' creyente. Palta a yic tzalx 'el spaxti Dios, yic eb' creyente jun cha, man̈ yico'oc eb' man̈ creyenteoc. 23Q'uinloc tzeyam e b'a e masnil ax creyente ex ta ticnec. Q'uinloc c'uxn tzex laj paxtin e masnil 'a jun tzo'n̈ chucchc ti'al. Toto tz'och junc man̈ creyenteoc 'a e cal, toto man̈ yojcoc, tas yaj jun quiquec tic, tecn 'oj yal 'ixtic: 'Icha to owya tzcot 'a sjolm eb' tic, 'oj schioc. 24Palta q'uinloc wan eyaln 'el spaxti Dios e masnil. Toto tz'och junc man̈ creyenteoc 'a e cal, wach'xam man̈ yojcoc tas yaj jun quiquec tic, 'oj nachjc 'el yu'uj, chajtlto 'ay smul. 'Oj sb'eyc'ojloc sb'a, yic 'oj yab'n tas tzeyal junjn ex. 25'Ixta to b'i'an, ax scheclj 'el tas 'ay 'a spixan. Yuj cha, 'oj 'em cuman, ax yaln sb'a 'a Dios. Ax yaln 'ixtic: Yel toni, caw 'aych Dios eyet'oc, 'oj schioc.
Wach' tzcutjec qui b'on smasnil tas
26Yuj cha, ex wu'tac, ex wanab', 'oj wal't 'ayex, tas tzeyutj e b'a ta', a yic tzeyamn e b'a. Comnoc 'ayx tzex b'itni, 'ayx tzeyac' junc cuynb'il, 'ayx tzeyal-l junc tas tz'ajx yuj Dios 'ayex, 'ayx tzex paxtin 'a junc chuc ti'al, 'ayx pax tzeyal-l tas tzyal 'el'ch jun chuc til cha. Comnoc tzlaj 'och e te'nal yuj smasnil tas tze b'o cha. 27Toto 'ayx tzex paxtin 'a jun tzo'n̈ chucchc ti'al, cojxn cab' chawn̈oc, mto 'oxwn̈oc ex tzex paxtini. Junjnal eyaln eyico'. An̈jtona', yowlal 'ay junc ex tztac' e yalni, tas tzyal 'el'chi. 28Toto may mach tztac' yalni tas tzyal 'el'chi, yel xo wach' matz ex paxtin cab' 'a jun tzo'n̈ chucchc til chi 'a 'aj tzeyam e b'a cha. Yel xo wach' mun tzex leslwi 'a Dios yet' e pixan. 29An̈jtona', toto 'ayx tzeyal-l spaxti Dios, cojxn cab' chawn̈oc, mto 'oxwn̈oc ex tzeyal-li. Ax xo e masnil, caw tzeya'ch e chicn 'a spaxti Dios chi tzalx 'ayx cha. 30Q'uinloc 'ay junc ex wan eyaln 'el spaxti Dios 'a e cal. Toto 'ay junc xo tz'ajx yal junc xo tas yuj Dios, yowlal tzex 'och wan eyaln chi b'el, tzyaln can junc xo chi yico'. 31Toto 'ixta', jantc ex tz'ajx eyal-l spaxti Dios, junjnal 'oj stac' eyaln eyico', sec wach' 'oj eyic' e cuynb'il e masnil 'a 'aj tzex jucb'tzaxi. 32Junjn ex tz'ajx eyal-l spaxti Dios, caw tzeyac' cuenta e b'a yet' e nab'en, sec junjnal tzeyal eyico'. 33Toto ton̈j tzon̈ somljiec calni, man̈oc 'a Dios tzcot jun cha. Yujto tznib'ej, sictac tzon̈ 'ajec.
A sb'eyb'al eb' creyente 'a junjn iglesia, caw sictac tz'aj eb' 'ix 'ix. 34An̈jtona', 'ixta 'ayex, yowlal sictac tz'aj eb' 'ix 'a 'aj tzeyam e b'a cha, yujto may spermiso eb' 'ix spaxtin 'a culto. Yiclum cab' tzyutj sb'a eb', yujto 'ixta tzyal sley Dios. 35Toto 'ay junc tas tznib'j eb' tzc'anb'j yab'i', yowlal at 'a yichmil eb' tzc'anb'j sc'ochx 'a yatut. Yujto caw wal man̈ smojc tzpaxtin eb' 'ix 'a culto cha.
36Yowlal tze na coti, to man̈oc 'ayx b'ab'l 'ajxnac spaxti Dios. An̈jtona', man̈ e ch'ocjocn̈ej xe chaj spaxti Dios cha. 37Toto 'ayx tze na'a, to 'ay eyopiso eyaln 'el spaxti Dios, mto tze na'a, to a Yespíritu Dios tzmunlj 'ayex, nachj cab' 'el eyu'uj, atn jun tzo'n̈ schecnb'il Cajlilec tzin tz'ib'j 'at 'ayx tic. 38Toto 'ay eb' may yel'ch jun tzo'n̈ checnb'il tic 'a sat, an̈jtona', may cab' pax yel'ch eb' 'a e sat jun xo.
39Yuj cha, ex wu'tac, tzeyac' eyip, sec 'oj stac' eyaln 'el spaxti Dios. Ax eb' tzpaxtin 'a jun tzo'n̈ chucchc ti'al, man̈ e tench wan eb'. 40Caw wach' tzeyutj e b'on smasnil tas, sec tz'och 'a stzolil.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.