Sof 2
2
1Ex conob tol c'am e q'uixawc'ulal, wajbajek oc e ba; naek wal e ba
2yet c'amto chi jayoc jun c'ual tol naanxa yuj Jehová, jun c'ual ayxa may yayji ocok, yet ok ex saklemcantok yuj, axca chi yun xulaytok matz'il trigo yuj cak'ek'.
3Aek oc e ba yul k'ab Jehová e masanil, ex tol yaynakil che yut e ba yin e yiken tojolal bay yulyibank'inal ti'. Ajanek can yin tojolal c'al yin yaynakilal, talaj chito ilchaj e colbalba yet c'ual yet yowal c'ul Jehová tu'.
Yailal ok cha nacionlak
4Tz'ininixac'al ok yuncan conob Gaza, c'amxa mactxel ayic' bay Ascalón. C'ualil wali, cax chi uktelay eltok eb cajyom bay Asdod; axa pax eb cajan bay Ecrón xin, axcaxac'al tol ok oclay aj eb.
5A wal ayex titnak ex bay Creta, mac ex tol cajan ex bay tilak a' mar, mayal yal Jehová tzet yetal ok jayoc e yiban. Chi yal axca ti': Ok wak' lajwok ay Canaán is tx'otx'al eb filisteo; c'amxa junok mactxel ok cajaycan ec' bay tu', ẍi Cham.
6A masanil tx'otx' tilak a' mar, lobal calnelxac'al ok yuncanok. Axac'al bay tu' ok watx'nej eb ilom calnel is lanchú, c'al corral is calnel.
7A eb okto iquisbokcan bay conobal Judá, ok yi eb satak bay tu'. A tu' ok yil eb is calnel; axa yet ak'balil, a bay nalak bay Ascalón ok way eb, yujtol a Jehová is Diosal eb, a' ok taynen eb, c'al yion aj can eb.
8A wal Jehová Cham Yajaw yin Masanil, co Diosal ayon Israel on ti', a' chi aloni: Max wab wal is buchwal k'anej eb moabita, c'al eb amonita yin in conob, tol ok yiec' eb is tx'otx' yaloni.
9Yuj tu', xan ayin wal caw chi wala', tol a Moab ti' lajan wal ok yun axca wal max yun Sodoma. Axa pax conob Amón xin, lajan wal ok yun axca conob Gomorra bay chi ch'ibaj te q'uix, c'al bay chi watx'ji aj atz'am. Tz'ininixac'al ok yuncan yin junelnej. A eb okto iquisbok can ec' bay in conob, a eb ok ion eltek is tzet yetal eb. A eb ok sataknencan is tx'otx'al eb tu', ẍi Jehová.
10A ton wal paktzebal ok cha Moab c'al Amón ti' yuj is maynejbail, c'al yuj buchwal eb yin is conob Jehová Cham Yajaw yin Masanil.
11Ayxa is may Jehová bay eb. Ok yak' lajwok comon dios bay masanil yulyibank'inal. Toltax a eb cajan bay k'axepaltok a' mar, a bay tu' ok oc eb ayilal bay Cham.
12Yetok c'apax ayex ti', ex aj Etiopía, ok ex yasjoktok yuj yespada Jehová, cax ok ex ayc'ayok.
13Ok yaon c'apaxtok Cham k'ab yin eb ay bay norte, yet chi yak' lajwok ay Asiria. Tz'ininixac'al ok yuncan conob Nínive yuj, takin tx'otx'xac'al ok yuncantok.
14A bay tu' ok ayjok no jobbejal no', yetokc'al masanil no xolakilteal no'. Axac'al no tonton, yetok no xotx' ok ok' bay chonlak yoyal tu'; axac'al bay yulak wentena, ok bitnok eltek no'. Toxac'al ok ay wekan bay yulak ti puertail. A is chemteal ayoc yul, a ton te c'ute', toxac'al ok can jakanok.
15Axca tu' ok utlay jun conob c'am tzet chi na', caw wal chi yipc'ulnej ba, chi yalon eb cajyom bay, tol c'am junokxa conob lajan yetok. Palta tz'ininixac'al ok yuncanok, asanxanej no chiwajwom no' ok cajaycan ec' bay tu'. A mactxel ok ec' bay cawilal tu', ok buchwaj eb yin.
Currently Selected:
Sof 2: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989