Ap 19

1Lajwi tu', max waben yoc nuk' jun miman bulan eb ayxa ec' bay satcan. Caw yip eb yalon axca ti':

¡Aleluya! A co Diosal max ak'on co colbanil. Caw miman yelapnok Cham, miman c'apax yipalil Cham.

2Bayc'al ijan chi yut beyc'ulnewok ba Cham yin yel.

Alek watx' k'anej bay, yujtol max beyc'ulnej jun ix yajawil ajmul ix, ix max etnen el anima bay yulyibank'inal yuj yajmulal tu'. Mayal yiic' Dios pak eb is chekbej max mak' cam ix, ẍi eb.

3Lajwi tu', max yalon c'apax eb axca ti':

¡Aleluya! C'am bak'in ok oc waan yaj wacacok mubal jun conob tu' tz'a'i, ẍi eb.

4Axa yay nojan eb 24 icham winak tu' sat tx'otx' yetok eb querubín canwanil. Max yion ay ba eb bay Dios, Cham chotan ay yul is trono. Max c'oli yalon eb axca ti': ¡Amén! ¡Aleluya! ẍi eb.

5Max waben yoc jun k'anej chi eltek bay is despacho Dios tol max yal axca ti':

¡Alek watx' k'anej bay co Diosal e masanil ex che yak' serbil, a ton ex chex xiw bay, caxc'al yaynakil ex, ma miman e yelapnok! ẍi.

Is k'inal nupayil Cham chi yik Calnel

6Max waben c'apax yoc junxa bit, axca wal yoc yul nuk' xiwilok anima. Caw chi nilili eb, axca wal bil junok miman aej. Axca wal nilili bil c'u, caytu' yoc yul nuk' eb, cax max yalon eb axca ti':

¡Aleluya! Yujtol a Cham Jajawil co Diosal, max chail yich yak'on Yajawilal. Masanil tzet yetal chi je' yuj Cham.

7Tzalojokonek, ayokab co tzalojc'ulal. Jalek watx' k'anej bay. Yujtol max ajapnok yorail nupay jun Cham chi yik Calnel. A yistzil ok yi' tu', watx'xa yayji.

8Mayal ak'lay yaoc jun pichilej caw wal watx' sic'libil. Caw sak, caw tzekeki yili, ẍi eb.

(A jun pichilej caw sak tu', chi yal elapnok is watx'ilal ak'bil bay eb yet-xa Dios.)

9Ay jun ángel max alon ayin axca ti': Tz'ibej juntzan ok wal ti': A eb awtebil yin k'inal nupayil Cham chi yik Calnel, caw wal watx' yet eb, cha tz'ibej, ẍi. A juntzan k'anej ti', wal yel, yet ton Dios, ẍi c'apax ayin.

10Max lajwi tu', max in ay jajan satak jun ángel tu'. Palta a yet max wion ay in ba bay, max yalon ayin axca ti': Man ot axca tu', yujtol ayin ti', yak'omal in c'apax serbil Dios etok, yetok eb oẍtak tec'an chi yut ba yak'on ba testigoal yin Jesús. A bay Dios, a tu' cheay a ba. Yujtol a yabixal Jesús, a chi iptzen eb chekbej Dios, ẍi.

Cham ayaj yiban jun sakyin chej

11Axa max wiloni, jakan satcan; cax max wilon jun sakyin chej. A Cham ayaj yiban, chi yik Chic'al Yun Tzet Chi Yala'. Chi yikon c'apax Yel. Yujtol yin tojolal chi yun beyc'ulnewi, c'al yak'wi owal. 12A is bak' sat, lajan axca xak k'ak'ej. Xiwil corona ayaj yin jolom. Ay jun is bi tz'ibbil oc yin, tol asannej ojtaknej jun biej tu'. 13Max bonaxtok is pichil ayocok yuj chic'. Chi yik Cham K'anej Dios. 14Tzakan oc eb soldado aj satcan yintak. Caw watx' pichil eb ayocok, cax caw wal sak. C'am jabok tz'il ayoc yin. Ayc'al aj eb yiban junjun is sakyin chej. 15Ayiltek jun espada caw el ye yul is ti' Cham bay tzakan oc eb tu', cax chi mak'on junjun nación yetok. A ok oc Yajawilok eb yetok is ch'en k'okoch. Axca chi yun tec'lay eltek yal an uva, caytu' ok utlay eb yuj. Caw wal ok alay oc yailal eb sic'libil yuj yowal c'ul Dios, Cham chic'al je' yuj masanil. 16A yin is pichil bay sat xub, a tu' tz'ibbil oc jun biej ti': Reyal eb rey, Yajawilal eb yajaw, ẍi.

17Axa max wiloni, ay jun ángel lecan oc bay c'u, cax max yalon yin ipejal bay masanil no no' chi jeneni ec' bay nan satcan axca ti': Sebaxek, wajbajek oc e ba yuj jun miman loj ok yak' Dios. 18Cax chi ul e chion chibejal eb rey, c'al chibejal eb mimek yajawil eb soldado, c'al eb mimek winak, c'al chibejal no chej, c'al chibejal eb ayaj yiban no', a ton chibejal eb yet ba, eb mosejal, eb c'am yelapnok, c'al eb mimek yelapnok. Ok e chi' chibejal eb masanil, ẍi bay no'.

19Cax max wiloni, ayic' jun chi yik No', yetok eb reyal sat tx'otx', c'al eb is soldado eb. Max wajbaj oc ba eb masanil, yuj yak'len eb owal yetok Cham ayaj yiban chej tu', c'al yetok eb soldado tzakan oc yintak tu'. 20A jun chi yik No' tu', a' max babji michchaji, cax max michchaj c'apax jun chi tz'ak yaloc ba chekbejok Dios, jun tx'oxnak juntzan milagro satak jun chi yik No' tu'. A juntzan milagro tu' max yak'balnej, yuj yetnen eb max chaoc bi jun chi yik No' tu' yin, eb max yiay ba bay yechel. A jun chi yik No' tu', c'al jun max tz'ak yaloc ba chekbejok Dios tu', yin wal yiquisal eb, max k'oklaytok eb xol jun miman k'ak' chi nilxi yetok azufre, axcaxac'al yili junok najab. 21Axa juntzanxa eb xin, max ak'lay cam eb masanil yuj ch'en espada ayiltek yul is ti' jun ayaj yiban chej tu', cax max nojcan c'ul no no' masanil yuj chibejal eb tu'.

Currently Selected:

Ap 19: ATBYK89

Highlight

Copy

Compare