Ap 12

Jun ix ix yetok jun no dragón

1Max lajwi tu', max txecloj aj jun tx'oxbanil bay satcan caw miman yelapnok. Ay jun xal ix, tol a c'u ayoc is pichilok, axa xajaw ayoc batxlubok yakan, cax ay lajcaweb waycan ayaj is coronaok. 2Yobixxa xal, caw chi el yaw xal yuj yail aljil; xiwil chi yochej chi colchaji. 3Ayman max txecloj aj junxa tx'oxbanil bay satcan tu'. Ay jun miman cakyin dragón, ay ukeb jolom, cax ay lajoneb yuc'a'. Ayc'al aj corona junjun is jolom tu'. 4Txenxanej man nanok waycan max loctek yetok ne bay satcan, cax max k'okon ay sat tx'otx'. Lajwi tu', max apni oc lecan satak xal yobixxa tu', yuj chion aytok jun unin tu' yet wal ok aljok yaloni. 5Winak unin jun max alji yuj xal tu'. A ton ok ikban masanil nación yetok jun is ch'en k'okoch. Max aljic'al jun unin tu', max ilaytok bay Dios bay satak is trono. 6A jun xal tu' max elajok, cax max toj bay tz'inan tx'otx'. Ata tu' watx'xa yayji jun is lugar yuj Dios. 1,260 c'u max bet ak'lay low bay tu'.

7Max oc c'apax jun miman owal bay satcan. A jun sat ángel chi yik Miguel, yetok eb yet ángelal, a eb max yak'lej owal yetok jun dragón tu', cax max wajon ba jun dragón tu' yetok is yángel yin eb. 8Palta maj uj yuj jun dragón tu'. Yuj tu', c'amxa lugar eb max ak'lay bay satcan. 9Axca ton ti' max yun k'oklay eltok jun miman dragón tu' yina. Ac'al ton oc jun tu' yutnak ba labajil payxa. A ton nak diablo, chi yik c'apax Satanás, jun chi etnen masanil anima bay sat tx'otx' ti'. K'okbil aytek sat tx'otx' yetokc'al eb yángel.

10Max lajwi tu', max waben yoc jun aw bay satcan, caw yip yalon axca ti':

A tinani', mayal txecloj aj jun colbanilej chi yak' co Diosal. A tinani' mayal tx'oxk'abnej elok, tol caw ay yipalil, cax Yajaw yayji. A Cristo Cham ak'bil yikbej yuj Dios, a' max tx'oxk'abnen elok tol a' chi ikban masanil. Yujtol max k'oklay aytok nak chi ak'on queja eb juẍtak, eb janab bay Dios yet c'ualil c'al yet ak'balil.

11A eb tu' max yak' techaj eb, yujtol yujc'al eb xan max cam Cham chi yik Calnel tu', cax elnak is chiq'uil. Max uj yuj eb, yujtol tec'an max yut ba eb yak'on ba testigoal yin. C'am jabok max xiw eb cami, a ti' yet eb tol bekan max yut eb c'ul.

12Yuj tu', tzalojokab satcan yetok masanil mac ayic' bay tu'. Palta ok'bal ex c'ul ex ayex ec' bay sat tx'otx', c'al ex ayex ec' yibanlak a' mar. Yujtol max ayapnok nak diablo ayex tu'. Caw chi tit yowal sic'libil, yujtol yojtak tol txenxanej is tiempoal, ẍi jun aw tu'.

13A yet max yilon jun dragón tu', tol max k'oklay aytok sat tx'otx', max c'oli yuktelay ec' xal aljinak yune' tu' yuj. 14Palta max alay oc cab xic' xal caw mimek, lajan wal axca xic' no tx'acbaj, cax max toj jenenok xal bay tz'inan tx'otx', yet watx' c'am chi michchaj xal yuj jun labaj tu'. A ta tu' max ak'lay low xal yin nan is can abil. 15Axa max yunajok, a jun labaj tu', ay wal jun miman aej max pitzc'oj aj yuj, a yul is ti' chi eltek. A yochwan tol max iklaytok xal ix tu' yuj jun aej tu'. 16Palta a tx'otx' tx'otx' max coloncan el xal, max tojcan a' yulak tx'otx' tx'otx'. 17Cax max tit yowal jun dragón tu' yin xal sic'libil, xan max toj yak'lej owal yetok juntzanxa eb yinatil xal, a ton eb chi iken chekbanil Dios, tol tec'an chi yut yak'on testigoal yin Jesucristo. 18Lajwi tu xin, max oc lecan jun dragón tu' xol yarenail ti a' mar.

Currently Selected:

Ap 12: ATBYK89

Highlight

Copy

Compare