Nm 4
4
Is yopiso eb levita
1Max k'anjab Jehová bay cham Moisés c'al bay cham Aarón, max yalon axca ti':
2Iaj yin txolilal is bisil eb levita is yinatil Coat, 3a ton eb 30 abil is k'inal, cax chi apni oc yin 50. A ton eb ti' caw wal moj yak'wi serbil eb bay mantiado bay chin chalej in ba e yetok.
4A is mulnajil eb yinatil Coat tol chi taynej eb juntzan tzet yetal ya' yili, a ton juntzan ti': 5A yet chi aj wan eb conob toji, ach Aarón yetokc'al eb a c'ajol, ok e yiel an cortina ayoc makilok jun lugar wet yayji, cax che makchen el te caẍail in trato yetok an. 6Axa yiban che yaoc jun tz'um caw wal lababixac'al is makilok, axa yiban jun tu' che yatok jun yax k'ap, cax che yaon oc te' batxbalej yet chi ilaytok. 7Che yaon c'apaxtok jun yax k'ap bay yiban meẍa ay bay in satak, axa yiban jun tu' che yaay plato, c'al juntzan ch'en cucharón, c'al sec' yetokc'al juntzan ẍalual vino chi ak'lay yin ofrendail, yetokc'al ixim pan chi ak'layc'alta'a. 8A yiban masanil juntzan tu' che yatok jun cak k'ap, cax che makchen ay yetok jun tz'um lababixac'al tu', cax che yaon c'apax oc te' batxbalej yet chi ilaytok. 9Cax ok e yion c'apaxtek junxa an yax k'ap, cax ok e makchen el jun batxlub candil yetok juntzan candil, c'al ch'en ch'en chi ion el tanil an mecha, c'al platillo, c'al yetok masanil net chi k'anlay yetok aceite. 10Masanil juntzan tu' ok e makchej el yetok jun tz'um toxac'al chi lababi, ok e yaon oc yiban juntzan te' batxbalej.
11Cax ok e yaon c'apaxtok junxa an yax k'ap yiban altar oro. Ok e pichon el yetok juntzan no tz'um lababixac'al, cax ok e yaon c'apax oc teal yet chi batxlayi. 12Cax ok e wajon c'apax aj masanil mitx'k'abej chi k'anlay bay yul in cajlobal, cax ok e pichon oc yul jun yax k'ap c'apaxok, ok e yaon c'apax oc juntzanxa lababi tz'um yin, ok e yaon oc yiban te' batxbalej. 13Yowalil che yiel jantak sebo somanxa yetok tan ay bay altar, chi lajwi tu' cax ok e makchen el yetok jun an k'ap púrpura. 14Axa yiban ok alay ay masanil tzetak yetal chi k'anabax bay altar tu': a ton netal tzak'ak' c'al juntzan ch'en tenedor, ch'en pala, c'al mimek sec', yetokc'al masanil mitx'k'abej bay altar. A yiban masanil juntzan ti' ok alaytok no tz'um lababixac'al, cax ok e yaon c'apax oc te te' yet chi batxlayi. 15A yet chi lajwi e pichon ay masanil juntzan tzet yetal miman yelapnok ti', watx'xa yayji yet chi ilaytok, cax ok tit eb yinatil Coat yuj yiontok eb masanil juntzan tzetak yetal ti'. A masanil juntzan tzet yetal wet yayji oc ti', c'am chi je' mitx'on eb, yet watx' c'am chi cam eb yuj. Masanil jantak is mitx'k'abil yet mantiado bay chin chalej in ba e yetok, a eb yinatil Coat yowalil chi iontok. 16A Eleazar, a c'ajol ach sacerdote Aarón, a' chi ilon tzetbil yayji aceite yet candil, yetok incienso watx' yoc jabil, yetokc'al ofrenda yin ixim trigo tol yowalil chi ak'lay ayin, yetokc'al aceite tol chi k'anabax yet chi sic'lay el junok mactxel ma junok tzet yetal. A chi taynen in cajlobal yetokc'al masanil is mitx'k'abil, ẍi Jehová.
17Max k'anjab pax Jehová bay cham Moisés c'al bay cham Aarón, max yalon axca ti':
18C'amokab chi c'ayil eb yinatil Coat xol eb yet levitail. 19Yet watx' c'am chi jayoc camich yiban eb, yuj mitx'on eb tzet yetal tol ya' yili, yowalil che beybalnej juntzan ti': Ach Aarón, yetok eb a c'ajol yowalil chex octok yetok eb yul in cajlobal; ayex che yal bay eb tzetak yetal ok yitok junjun eb. 20Yuj tu', man ok octok eb junok bek yin matz'en tzet yetal tol wet yayji, yet watx' c'am chi cam eb yuj, ẍi Jehová.
21Max k'anjab pax Jehová bay cham Moisés, max yalon axca ti':
22Iaj is bisil eb yinatil Gersón yin txolilal, 23a ton eb 30 abil is k'inal cax chi apni oc yin 50 abil, a ton wal eb moj wal chi ak'wi serbil bay mantiado bay chin chalej in ba e yetok.
24A ton is mulnajil eb yinatil Gersón ti': 25A eb, yowalil chi iontok an k'ap makil yiban in cajlobal yetok cabxa jenan makil yiban, yetok no' lababi tz'um ayoc is makilok yiban, yetokc'al an cortina ayoc bay is puertail, 26yetokc'al an cortina ayoc yinlak yamak'il in cajlobal, c'al yinlak altar, yetokc'al an cortina ayoc bay puertail yamak'il tu', yetok is mitx'k'abil, c'al jantak is tx'anil ayocok yet chi oc yin yopiso. 27Ach ton Aarón, yetokc'al eb a c'ajol ok e yikbaj masanil eb yinatil Gersón yin mulnajil chi yun eb, c'al yin yiontok eb tzetak yetal tol chi ilaytok. Ayex ti', ayex ok e tx'ox tzet ok yitok junjun eb. 28A ton wal yopiso eb yinatil Gersón ti' yin mulnaj eb bay mantiado bay chin chalej in ba e yetok; yikejokab bay masanil tzet chi yal Itamar, a c'ajol.
29Iaj is bisil eb yinatil Merari yin txolilal, 30a ton eb 30 abil is k'inal, cax chi apni oc yin 50 abil, chi yal elapnok tol a ton wal eb moj wal yak'wi serbil bay mantiado bay chin chalej in ba e yetok. 31A is mulnajil eb, a ton yiontok eb masanil is teal mantiado tu', a ton is chemteal, is reglail, yoyal, c'al batxlubal, 32masanil yoyal oyan oc yinlak yamak'il in cajlobal, yetok batxlubal, c'al is tx'anil chi k'anabax yet ayoc yin yopiso. Ayex che yala' tzet yetal yowalil chi yitok junjun eb. 33A jun mulnajil ti' chi can yul k'ab eb yinatil Merari; a Itamar a c'ajol ok alon tzet chi yun eb, ẍi Jehová.
34-48A cham Moisés, cham Aarón yetokc'al eb yajawil conob, a eb max ion aj bisil eb yinatil Coat yin txolilal. A masanil eb winak, max ilay aj is bisil tu', ay 2,750 eb yin masanil.
A eb yinatil Gersón, atac'ala' is txolilal, ay 2,630 eb yin masanil.
A eb yinatil Merari, atac'ala' is txolilal, ay 3,200 eb yin masanil.
A bisil eb levita max yiaj cham Moisés, cham Aarón yetokc'al eb yajawil yayji, atac'ala' yin txolilal, a ton eb 30 abil is k'inal cax chi apni oc yin 50 abil, tol is moj wal eb mulnaj bay lugar bay chi co chalej co ba yetok Jehová, ay 8,580 eb yin masanil. 49A jun bisil ti', max ilay ajok, cax max al-lay bay junjun yuj tzetak yetal ok yunej, c'al tzetak yetal ok yitok, axca wal max yun yalon Jehová bay cham Moisés.
Currently Selected:
Nm 4: ATBYK89
Highlight
Copy
Compare
Share
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
