Nm 35
35
Is satak eb levita
1Max k'anjab pax Jehová bay cham Moisés bay yac'alil Moab, bay is ti a' Jordán bay satak Jericó, max yalon axca ti':
2Al bay eb et israelal tol a yul is tx'otx' eb ok cha', a tu' ok yi' eb levita jayeb conoblak bay ok cajay eb; cax chak'on c'apax tx'otx' colan bay yinlak conoblak tu', bay ok low is jobbejal no' eb. 3A bay juntzan conob ok cajay eb, axa bay yinlak ok low is jobbejal no' eb. 4A lugar colan yinlak conob tu' chi ak'lay bay eb, tol ayokab 450 metro chi toj yinlak. 5A yin masanil jun tx'otx' tu' ay 900 metro bay junjun paq'uil, lajanc'al yechel can paq'uil. Axa nan yul tx'otx' tu', a tu' aycan junjun conob tu'.
6A xol juntzan conob chi ak'lay bay eb levita tu', ay wakeb conob bay chi je' toj c'ubaj ba junok mac chi mak'wi cam anima. Tx'ok pax chi yun e yak'on junokxa 42 conob. 7A yin masanil yowalil chi ak'lay 48 conob bay eb levita yetokc'al lugaril yinlak bay chi low is jobbejal no' eb. 8A yin tx'otx' is satak eb yet israelal eb, a tu' chi el juntzan conob chi ak'lay bay eb levita. Yuj tu' xan junjunc'al tribu chi yak' jayebok juntzan conob tu'. A juntzan tribu mimek is tx'otx', tx'ial conob chi yak' bay eb levita, axa juntzan tribu txennej yayji oc tx'otx' xin, txennej conob chi yak' bay eb, ẍi Jehová.
Conoblak bay chi col ba eb anima
(Dt 19.1-13; Jos 20.1-9)
9Max k'anjab pax Jehová bay cham Moisés, max yalon axca ti':
10Al jun ti' bay eb et israelal: A yet chex k'axpoj bay yul a' Jordán, cax ok ex oc yin conobal bay sat tx'otx' Canaán tu', 11ok e siq'uil jayebok conob bay ok je' colon ba mac chi mak'on cam junok anima, ta man yinok is c'ul chi yuneni. 12A tu' chi col ba jun mactxel tu', caxc'al chi saylay ec' yuj mac ayto yuj ba yetok jun max cam tu', c'am chi je' cami, ta c'amto chi oc k'anlebal bay yuj eb yajaw conob tu'. 13A juntzan conob bay chi col ba eb tu', wakeb conobal chi yil ba: 14oxeb chi cancan bay k'axepal ec'tok a' Jordán, axa pax oxebxa xin, a tu' chi cancan bay Canaán. 15A bay wakeb conob ti' chi col ba eb anima tol mak'oj cam anima chi yunej, eb e yet israelal c'al eb man e yet conobok tol cajan ec' e xol, ma eb toc'al chi ec'jab yin posada. A tu' chi col ba eb ta man yinok is c'ul chi mak'on cam anima tu'.
16-18Ta ay junok mactxel chi mak'on junok anima yetok junok ch'en mitx'k'abej yet owal, ma yetok junok comon ch'en, ma yetok junok te te', ta c'uxan chi cam jun anima tu' yuj, a jun chi mak'waj tu', mak'om cam anima toni, yowalil chi mak'lay c'apax camok. 19A junok ayto yuj ba yetok nak max cam tu', a' chi mak'on pax cam nak mak'om cam anima tu' yet chi chalen ba yetok.
20Ta ay junok mactxel chi tenontok pac'naj junok anima yujtol chi chichon oc c'ul yin, ma chi tentok junok tzet yetal yin yuj yobc'ulalil, 21ma chi mak' yetok is k'ab yujtol yajc'ul ba eb, axa chi yunej chi camxac'al jun chi mak'lay tu', yowalil chi ak'lay cam nak tu', yujtol mak'oj cam animaxa yin axca tu'. Xan a junok ayto yuj ba yetok nak max cam tu', a chi ak'on c'apax camok.
22Palta ta ay junok mac chi tenontok junok anima cax man wal yinok is c'ul, tamwal tol ay owal xol eb, ma xin, chi tentok junok tzet yetal yiban, 23yetok c'apaxok ta maj yila' cax chi k'okontok junok ch'en cax chi ayc'ay yiban jun mactxel tu', cax chi camxac'al yuj, ta man yajc'ulok ba eb, cax man yujok yak'on yobc'ulalil yin, xan caytu' max yunej; 24ta axca tu', axa eb conob bay chi yochej chi col ba tu' a eb ok beyc'ulnen el xol eb atac'ala' is leyalil, jun ay is mul tu', c'al jun ayto yuj ba yetok jun max cam tu'. 25A eb anima max iloni, a eb chi colon el nak mak'om cam anima tu' yul is k'ab nak ayto yuj ba yetok jun max cam tu'. Axa eb max ilon tu' ok ak'on meltzoj nak junelxa bay conob baytac'a max betlej colon ba tu'. A jun nak tu' chi canc'alcan bay tu' masantac'al chi cam cham sat sacerdote sic'bil oc yin yopiso yet tu'. 26Palta ta chi eltok yinlak conob bay ayic' colon ba tu', 27cax chi chaloj yuj mac ayto yuj ba yetok nak camom tu', cax chi cam yuj nak tu', c'am chi oc is mulok nak, yujtol yina ayil nak chi col ba tu'. 28Yuj tu xin, a nak max mak'on cam nak tu', yowalil chi can bay yul conob tu' masantac'al chi cam cham sat sacerdote. Catatu' chi toj pax bay is tx'otx'al.
29A juntzan ti' ley chi yuncan e xol, c'al xol e yinatil tzanc'al baytal ayex ec'ok.
30Ta ay cawanok ma oxwanok testigo yin junok mac chi mak'wi cam anima, a jun tu' ay ley chi cami. Ta asan jun testigo xin, c'am chi je' cami.
31C'am chi je' chalay ch'en tumin ta mayal oc yiban jun anima tol mak'oj cam anima max yunej, yowalil tol chi camxac'al.
32C'am chi je' chalay ch'en tumin bay nak mak'om cam anima tu' yuj yel bay conob bay ayic' colon ba tu', cax chi meltzoj bay is conobal, yet c'amto chi cam cham sat sacerdote.
33Man e yetnejtok tx'otx' tx'otx' bay ok ex cajay ec' tu', yuj is chiq'uil anima chi mak'lay camok. A xan ta ay chic' max pultok sat tx'otx', c'am junok tzet yetal chi je' yak'on tanok, asan tol chi cam jun max mak'wi cam anima tu'.
34Yuj tu xin, manchak e yetnejtok sat tx'otx' tx'otx' bay cajan ex ec' tu', tol ayin Jehová in, ayin ec' e xol bay sat tx'otx' tu', ẍi Jehová, cachi, ẍi Cham.
Currently Selected:
Nm 35: ATBYK89
Highlight
Copy
Compare
Share
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
