Nm 15
15
Leyal yin Xajanbal
1Max k'anjab Jehová bay cham Moisés, max yalon axca ti':
2Al juntzan ti' bay eb et israelal: A yet ok ex octok bay jun lugar ok wak' ayex yuj e cajay bay tu', 3ok je' e yak'on tz'a junok no wacax, ma junok no calnel, ma junok no chiwo yin xajanbalil caw wal watx' chi wabej, caxc'al yuj e yiken bay maxax e yak' e ti' e yak'oni, ma toc'al chi el yin e c'ul xin, ma yuj junok k'in. 4A mac chi yak' junok is xajanbal, yowalil chi yak' c'apax cabok libra harina caw wal watx', sombil yetok junok litro aceite. 5A yetok juntzan xajanbal mayal wal tu' che yak' junok litro vino yin ofrendail yetok junjun no calnel tu'. 6Tatol a junok no icham calnel chi ak'lay yin xajanbalil xin, chi ak'lay waxakeb libra harina chi somlay yetok ec'ban jun litro aceite; 7ec'ban c'apax jun litro vino che yak' yetok. Caw wal watx' jun ofrenda tu' chi wabej. 8Ta a junok no ach'ej wacax che yak' yin xajanbal tol chi tz'a'i, ma xajanbal yet che yikej bay maxax e yak' e ti', ma xajanbal yet junc'ulalil, 9chi ak'lay c'apax lajcawebok libra harina yetok cabok litro aceite, 10yetok c'apax cabok litro vino yin ofrendail. A jun ofrenda tu' watx' chi wabej. 11A ton juntzan ti' yowalil che yak' yetok junjun no wacax tu', ma yetok junjun no icham calnel, ma yetok junjun no yunetak calnel, ma yetok junjun no yunetak chiwo che yak'a'. 12Atac'ala' jayc'on no' che yak' yin xajanbalil tu', caytu' c'apax bisil juntzanxa ofrenda che yak' yetok tu'. 13E masanil ayex israel ex ti' yowalil che yikej masanil juntzan ley ti' yet che yak'on tz'a e yofrenda tol watx' chi wabej.
14Ta ay junok tx'ok conobal, toc'al chi ec'jab e xol, ma tol junelnej cajan e yetok, ta chi yochej chi yak' tz'a junok is xajanbal tol watx' chi wabej, yowalil chi yikej masanil leyal axca che yikej ayex ti'. 15A jun ley tu' chi oc yopiso e yuj ayex ti', c'al yuj eb tx'ok conobal tu'. A jun ley tu' ok beyc'altok e xol yin tojbalk'inal. 16Junnej ley tol e yet yayji ayex ti', yetok eb tx'ok conobal, ẍi Cham.
17Max k'anjab Jehová bay cham Moisés, max yalon axca ti':
18Al bay eb et israelal masanil juntzan ti': A yet ok apnok oc eb bay jun lugar bay ok witok eb, 19axa ixim trigo chi yak' bay tx'otx' tu' ok lo eb, yowalil ok pojcan el eb janic'ok ixim yin ofrendail yet ok yak' eb ayin. 20Axca chi yun yak'on eb ayin ixim babel chi tec'lay elok, cay c'apax tu', a jun babel pan chi watx'ji yin ixim harina yet ac' trigo tu' ok yak' eb yin ofrendail ayin. 21A jun makan ofrenda ti' ok yak'c'al eb yin tojbalk'inal.
22Ta c'uxan chi toj c'ayc'ulal e yuj e yunen junok tzet yetal max wal bay Moisés ti' yettax babelal, 23yuj e yikeni, c'al yiken eb e yinatil yet ok beyc'altok, yowalil ok e yikej masanil juntzan ok wal ti':
24Tatol ay junok chekbanilej chi toj c'ayc'ulal e yuj e yunen e masanil, ok e yak' junok no ach'ej wacax tz'a yin xajanbalil tol watx' chi wabej, yetokc'al ixim trigo c'al vino che yak'c'alta' yin ofrendail yetok xajanbal tu', axca is leyalil. Yetok c'apax juntzan tu' che yak'on junok no mam chiwo yin xajanbalil yuj yak'lay tan mulej. 25Axa junok sacerdote ok watx'nen jun tu' axcac'alta' is leyalil, yet watx' chi tancan el e mul e yiban. Ayin ton ok wak' tanil e mul tu' yujtol man yinok e c'ul max tita, xan maj e yunej, max e yak'on pax xajanbal yuj e mul. 26A yuj e xajanbal tu', xan chi tancan el e mul tu' e yiban ayex israel ex ti', c'al eb tx'ok conobal ayic' e xol, yujtol e masanil max oc e mul.
27Ta a junok anima chi oc is mul, yuj chi toj c'ayc'ulal yuj yiken junok chekbanilej, a yuj is mul jun mactxel tu', yowalil chi yak' junok no k'opoj chiwo jun abil is k'inal yin xajanbalil. 28Axa junok sacerdote ok aon oc jun xajanbal tu' yiban altar axca is leyalil, caytu' ok yun tancan el is mul jun anima tu' yiban. 29Ac'ala' jun ley tu' chi oc yopiso e yuj ayex ti', c'al yuj eb tx'ok conobal ayic' e xol, yet chi oc e mul yin tol man naanok e yuj.
30Palta ta ay mactxel chi oc is mul tol yin wal c'ul chi tita, caxc'al e yet israelal, ma junok tx'ok conobal, a ayin chi oc is tenomtakil, xan a jun anima tu' yowalil chi c'aylay el e xol, 31yujtol max yintaknej el in k'anej naan wal yuj, max tenon in chekbanil, yuj tu' xan ac'al oc chi yitek is camichal yiban, ẍi Cham.
Camich yuj c'am chi ikelay c'ual xewilal
32A yet ayic' eb israel bay takin tx'otx', ay junok eb tol lanan wajon si' yet c'ual xewilal. 33A eb max ilon tu', max ilaytok nak satak cham Moisés, cham Aarón, c'al satak masanil conob yuj eb. 34Max taynelay nak yuj eb, yujtol manto txequelok tzet ok utlayok. 35Yuj tu xin, max yalon Jehová bay cham Moisés: A jun winak ti' yowalil chi cami; masanil eb et conob chi k'okch'ennen bay yinil campamento, ẍi Jehová. 36Xan max yieltok eb nak bay yinil campamento tu'. A tu' max k'ok cam eb, axca max yun yalon Jehová bay cham Moisés.
Yelbub yin ti pichilej
37Max k'anjab Jehová bay cham Moisés, max yalon axca ti':
38Al juntzan ti' bay eb et israelal: Ayex ti' yetokc'al eb e yinatil yowalilokab chi oc yelbub txiquinlak e pichil, a juntzan tu' tx'al c'albil yuchay yetok yax tx'al. 39A yet ok e yilon oc juntzan is yelbub tu', cax ok e naontek masanil chekbanilej max wala' tol che yikej, yet watx' man ok ex ikbelay yin yob beybalej yin ayilal bay yechelej yuj e nabal c'al yuj e yochwan yul e yet, axca che yunc'alta'a. 40Cay wal tu' ok yun e naontek in chekbanil, cax ok e yikeni. Axca tu' ok yun e yaonxac'al oc e ba ayin tol wet ex. 41Ayin Jehová e Diosal in, max ex wieltek bay Egipto yet chin oc e Diosalok. Ayin ton wal Jehová e Diosal in, chi wal juntzan ti', ẍi Cham, cachi bay eb.
Currently Selected:
Nm 15: ATBYK89
Highlight
Copy
Compare
Share
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
