Nm 10
10
Juntzan trompeta plata
1Max k'anjab Jehová bay cham Moisés, max yalon axca ti':
2Watx'nelayokab cabok trompeta plata tol chi chac'lay yetok martillo. A juntzan tu' ok xulay yet cha wajban oc eb anima, c'al yet chex bey e toji. 3A yet chi xulay cab trompeta tu', masanil conob chi jayoc wajan a satak, bay mantiado bay chin chalej in ba e yetok. 4Palta ta asan jun chi xulay xin, asan eb yajawil yayji oc yin junjun makquiltakil tribual chi wajbaj oc ba. 5Tatol coc'xac'al xol chi yun xulay ch'en trompeta tu xin, ti tol ok aj wan jun campamento toji, a ton jun ayic' bay yetc'ulal bay chi ajol c'u bay in cajlobal. 6Axa yet ok xulay ch'en trompeta yet cayelal axa toj eb ayic' bay yetc'ulal sur. Xan a yet chi xulay trompeta axca tu', tx'oxbanilej yayji yet chi bey eb toji. 7Ta man coc' xolokxac'al chi yun xulay trompeta, tita tol toc'al chi wajbelay oc anima. 8A mac chi xuon trompeta tu', a ton eb sacerdote yinatil Aarón. A jun ti' ley chi yuncan ayex yin tojbalk'inal.
9Ta ay junok ajc'ul chi jayoc ayex bay yul e tx'otx'al, cax chex eltok e yak'on owal yin, ayman chi xulay ch'en trompeta; yin coc'xac'al xol chi yun xulayi, yet watx' ok ex in natek, ayin Jehová e Diosal in ti', axa ex in colon el bay eb ajc'ul tu'. 10A yet c'ual ay e tzalojc'ulal, axca c'ual k'in, ma yet unin xajaw, che xuon ch'en trompeta tu', yet che yak'on xajanbal chi tz'a'i, ma xajanbal yet junc'ulalil. Axca tu' ok ex in natek. Ayin ton Jehová e Diosal in ti' chi wala', ẍi Cham.
Max el eb israel bay Sinaí
11A yet 20 waay yet is cab xajaw yet is cab abil yel conob Israel bay Egipto, max el jun asun yiban mantiado yet trato. 12Catatu' max el eb israel bay takin tx'otx' Sinaí, max beyc'al toj eb yin c'ojanc'ulal, masantac'al bay takin tx'otx' Parán, yujtol a bay tu' max oc waan jun asun tu'. 13Babelto wal ti' chi bey eb yin txolilal axca wal max yun yalon Jehová bay cham Moisés. 14Yin babelal chi toj eb soldado ibil oc is bandera Judá yuj; a Naasón c'ajol Aminadab ayoc is yajawilalok eb. 15Axa satak eb soldado yet Isacar, a tu' ayoc Natanael c'ajol Zuar. 16A Eliab c'ajol Helón ayoc satak eb soldado yet is tribual Zabulón. 17Lajwi tu xin max xuyon aj eb is cajlobal Jehová, axa eb yinatil Gersón c'al eb yinatil Merari, max iontok, yujtol a eb tu' ayoc yiban yion beyok.
18Catatu' chi toj eb soldado inej oc is bandera Rubén. A Elisur c'ajol Sedeur ayoc is yajawilalok eb. 19A Selumiel c'ajol Zurisadai ayoc satak eb soldado yin is tribual Simeón. 20A Eliasaf, c'ajol Reuel ayoc satak eb soldado yin is tribual Gad. 21Tzunan toj c'apax eb yinatil Coat; a eb inej oc masanil mitx'k'abil cajlobal Jehová. Axa yet max apni oc eb, mayal watx'ji aj is cajlobal Jehová tu'.
22Catatu' chi toj pax eb soldado inej oc is bandera Efraín. A Elisama c'ajol Amiud, a' ayoc is yajawilalok eb. 23A Gamaliel c'ajol Pedasur, a' ayoc satak eb soldado yin is tribual Manasés. 24A Abidán c'ajol Gedeoni, a' ayoc is satak eb soldado yin is tribual Benjamín.
25Yintakxac'al masanil juntzan soldado tu', max toj eb inej oc is bandera Dan. A Ahiezer c'ajol Amisadai ayoc is yajawilok eb. 26A Pagiel c'ajol Ocrán, a' ayoc is satak eb soldado yin is tribual Aser. 27A Ahira c'ajol Enán, a' ayoc satak eb soldado yin is tribual Neftalí. 28Cay wal tu' chi yun txolon ba eb israel yet chi bey eb toji.
Max yawtej tok cham Moisés is bax yetok
29Ay jun c'ual, max yal cham Moisés bay is bax, a ton Hobab, c'ajol cham Reuel aj Madián:
—Ayon ti' chon toj bay jun lugar bay max yak' Jehová is ti' yak'on ayon; ton jetok, watx' ok ach jila', yujtol max yak' Jehová is ti' on ya'ilneni, ẍi Moisés.
30Palta max yalon Hobab axca ti':
—C'amak, ayin ti' ok in meltzojcan bay in tx'otx'al, bay ayic' masanil eb wican, ẍi.
31Max yalonc'al cham Moisés bay:
—Manchak on a bekcanok, yujtol ach ti' ojtak masanil juntzan lugar bay takin tx'otx' ti', chi je' wal tol ach ok on ekbaj. 32Tatol chach toj jetok, a tzet yetal watx' ok yak' Jehová ayon, ok jak' c'apax et, ẍi bay.
33Lajwi tu', max el eb bay Sinaí, a ton jun tzalan bay max tx'ox ba Jehová; oxeb c'ual max bey eb. Babel te caẍail trato Jehová yuj eb, yuj tx'oxon junok lugar bay watx' chi xew eb. 34Junjuntakc'al el chi bey eb toji, chi oc jun asun yet Jehová yiban eb yet c'ualil. 35A yet chi ilaytok te caẍa tu' chi yalon cham Moisés axca ti':
¡Ajan wan Mamin Jehová! ¡Uch saklem eb ajc'ul oc en! ¡Elokab aj eb c'am chach ocheni a satak! ẍi cham.
36A yet chi oc wanaj te caẍa tu', chi yalon pax cham axca ti':
Sebach pax Mamin Jehová, ayjan co xol ayon Israel on ti' c'amxa chon bischaji, ẍi cham.
Currently Selected:
Nm 10: ATBYK89
Highlight
Copy
Compare
Share
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
