Lv 27
27
Leyal ofrenda bay Jehová
1Max yalon Jehová bay cham Moisés axca ti':
2Al juntzan ti' bay eb et israelal: Ta ay junok chi yochej chi man pax el junok anima, tol max yak' is ti' yak'on ayin, ok tojlanej atac'ala' yalon jun lista ti'. 3A junok winak tol 20 abil is k'inal, masantac'al yin 60 abil, a eb tu' yowalil chi ak'lay 50 siclo ch'en plata is manbanilok, atac'ala' echbal chi k'anabax bay in cajlobal. 4Axa pax yuj junok ix ix xin, asan 30 siclo plata chi ak'layi. 5Axa pax yuj eb yin oyeb abil, masantac'al yin 20 abil is k'inal xin, ta winak, 20 siclo ch'en plata chi ak'layi. Ta ix xin, 10 siclo ch'en plata chi ak'layi. 6Axa yuj eb unin tol jun xajaw is k'inal, masantac'al yin oyeb abil, a eb winak, oyeb siclo ch'en plata chi ak'layi, axa eb ix xin, oxeb siclo ch'en chi ak'layi. 7Axa pax yuj eb icham anima ec'banxa yin 60 abil is k'inal xin, a yuj eb winak 15 siclo ch'en plata chi ak'layi; axa yuj eb xal ix xin, 10 siclo ch'en chi ak'layi. 8Tatol ay junok anima yelxac'al meba' xin, c'am chi je' yak'on axca bisil ch'en tol txequel yayji tu', chi ilaytek bay satak eb sacerdote, cax chi nalayi jantak wal chi je' yak'oni.
9Axa pax yuj no no' tol chi ak'layc'alta' yin xajanbalil ayin xin, a masanil no' tol chi ak'lay ayin tu', txequel chi yuncan no'. 10C'am chi je' q'uexlay no' yetok junokxa no', caxc'al watx' no', ma yobtak wal no'. Palta tatol chi q'uexlay no' xin, a no q'uexelej tu', chi canxac'al no' yetok no txequelxac'alta' yayji tu'.
11A pax yuj junok no no' tol man watx'okc'alta' yoc yin xajanbalil ayin xin, a no' tu' chi ilaytek bay junok sacerdote, 12yet watx' chi nalay jantak is tojol, atac'ala' tzetbil yili no'. Axca is tojol no' max nalay yuj jun sacerdote tu xin, axcac'al tu' chi yuncan tojol no' yet chi txonlayi yuj yoccan tojol no' yetok in cajlobal. 13Ta ac'ala' jun ay yet no' tu' chi yochej chi manon pax el no' xin, yowalil chi yak' junxa yet is so' makan, yetok is tojol no' tol nabilxa tu'.
14Ta ay mactxel chi yak' yatut ayin, ta watx' yayji, ma yobtak wal yayji, a junok sacerdote chi naoni jantak wal is tojol; caytu' chi yun yoccan is tojol tu' yin junelnej. 15Palta ta a mac ay yet jun na tu' chi yochej chi manilok, yowalil chi yak' junxa yet is so' makan yetok is tojol max nalaycan tu', catatu' chi yion pax jun mactxel tu' is na junelxa.
16Ta ay mactxel chi yak' junok makan is tx'otx' ayin, a tojol tx'otx' tx'otx' tu' chi nalayi, atac'ala' jantak inat chi awlay sat tx'otx'. Tatol baloneb arroba ixim cebada chi awlay bay tx'otx', 50 siclo plata is tojol tx'otx'. 17Tatol chi ak'lay tx'otx' tx'otx' tu' yul abil yet bekbanilal, chi canxac'al can is tojol, axca max yun nalaycan tu'. 18Palta ta a yet mayal lajwi ec' jun abil bekbanilal tu' cax chi ak'lay tx'otx', a jun sacerdote chi je' naoni jantak ch'en plata chi je' yak'layi. Chi ilay aytek janic'ok is tojol, atac'ala' jayebto abil yet ok jay junxa abil yet bekbanilal tu'.
19Ta a jun mac max yak' is tx'otx' tu' ayin, chi yochej chi man pax elok, yowalil chi yak' junxa yet is so' makan yetok is tojol nabilcanok. Catatu' chi je' yion pax is tx'otx' tu' junelxa. 20Ta c'am chi man pax el xin, ma tol chi txontok bay junokxa anima, ta axca tu', c'amxa chi je' manon el junelxa. 21A yet ok can tx'otx' tx'otx' tu' yin bekanil yet junxa abil yet bekbanilal, a jun tx'otx' tu', wet-xac'al ok yuncanok, axa eb sacerdote ok sataknencanok.
22Ta ay mactxel chi yak' is ti' yak'on junok tx'otx' tx'otx' ayin tol manbil yuj, manc'alta' is satakok yayji, 23a junok sacerdote chi naon is tojol yetok jun anima tu', masantac'al yet abil yet bekbanilal. A yet jun c'ual tu' chi yak' jun anima tu' is tojol tx'otx', atac'ala' jantak max yun nalayi, cax chi occan ch'en tumin tu' wetok. 24Axa yet abil yet bekbanilal, chi meltzoj pax tx'otx' bay mac max txonon tu', chi yal elapnok a ton bay jun mac ayc'alta' yet tx'otx'.
25A tojol junok tzet yetal chi na' eb sacerdote chi tojlanelay axca ch'en tumin chi k'anabax bay in cajlobal. 20 geras*fn* yalil junjun siclo ch'en plata.
26A babel yune' no wacax, ma no calnel, ma no chiwo, wetc'alta' yayji, yujtol babel yune' no'. C'am mactxel chi je' yaloni tol chi yak'c'alta' no' yin ofrendail. 27Ta a babel yune' junok no' tol manc'alta' watx'ok atac'ala' yalon ley, chi je' manon pax elok, atac'ala' jantak is tojol no' max nalayi, cax chi ak'lay junokxa yet is so' makan yetok is tojol tu'. Tatol manak jun ay yet tu' chi manon el xin, ac'ala' axcac'al is tojol nabilxa tu' chi je' txonlay el no' yuj eb sacerdote.
28Tzanc'al tzet chi ak'lay ayin yin junelnej, mawal axca junok anima, ma junok no jobbejal no', ma junok tx'otx' tol satakc'alta' jun mac chi ak'on tu' yayji, ma junokxa tzet yetal, c'am chi je' txonlayi, tamwal chi je' manlay pax el yuj mac max ak'oni. Wet-xa yayji yin junelnej. 29A pax junok anima tol t'inanc'alta' c'aylay elok c'am chi je' manlay elok. A jun tu' yowalil chi ak'lay camok.
30A jun yet is lajoneb makan sat awoj chi yak' tx'otx' tx'otx', wetc'alta' yayji ocok. 31Ta ay junok mactxel chi yochej chi manon el jun yet is lajoneb makan tu', yowalil chi yak' junok yet is so' makan yetok is tojol tu'.
32Jun yin lajlajonc'on no wacax, ma no calnel, ma no chiwo, a ton no' tu' chi can yin diezmoal ayin ta watx' no' ma yob no'. 33C'am chi je' sic'layi, tamwal chi je' q'uexlay no' yetok junokxa no' tx'ok yeli. Tatol ay mac chi yochej chi q'uexon no' xin, a no' babel tu', c'al yetok no' chi ak'lay yin q'uexelejal tu', chi canxac'al can no' cac'onal. C'am c'apax chi je' manlay el no', ẍi Jehová, cachi, ẍi Cham.
34A bay jolom witz Sinaí max yak' Jehová juntzan chekbanilej ti' bay cham Moisés, tol yet conob Israel yayji ocok.
Currently Selected:
Lv 27: ATBYK89
Highlight
Copy
Compare
Share
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
