Lv 2
2
Juntzan ofrenda chi ak'lay yin tzet chi loji
1Ta ay junok mactxel chi yitek ixim harina yin ofrendail bay Jehová, a wal ixim harina caw wal watx' chi yitek; a yiban ixim tu' chi alay ay aceite c'al incienso; 2cax chi yiontek bay eb sacerdote is yinatil Aarón. A junok eb tu' chi ion aj junok betxan ixim harina yetok aceite, c'al yetok masanil incienso, cax chi ak'lay tz'a jun ofrenda tu' yiban altar, yuj tx'oxlayi, tol a masanil ofrenda tu' yet Jehová yayji. Watx' jun ofrenda tu' chi yab Cham. 3Axa janic'okxa jun ofrenda tu' yet Aarón, yetokc'al eb yuninal yayji. Miman yayji ocok, yujtol yetbic'al ba yetok jun ofrenda chi ak'lay tz'a satak Jehová.
4A yet chi ak'lay junok ofrenda tol k'anbinak yul horno, aokab ixim harina caw wal watx', c'am yich chi oc xol. Chi je' watx'nelayi, pim chi yunej, sombil yetok aceite; chi je' c'apax yin c'oxoxal c'am yich, cax chi bonlay oc aceite yin.
5Ta a jun ofrenda tu', tol maybil yul ẍaltin, harina wal tol caw wal watx' chi ak'layi, sombil yetok aceite, palta c'am yich. 6Chi bijlay cojok cax chi alay oc aceite yin, yujtol a jun ofrenda tu' chi ak'lay yin tzet chi loji.
7Tatol che yak' junok ofrenda tajnak xol aceite, harina caw wal watx', sombil yetok aceite che yak'a'. 8A yet mayal watx'ji el jun ofrenda tu', a ton juntzan tzet yetal tu', cax chi ilaytek bay Jehová, chi ak'lay bay cham sacerdote, axa chi iontek bay altar. 9A bay tu' chi yak' tz'a jabok jun ofrenda tu' yuj tx'oxbanilok tol a masanil ofrenda tu', yet Cham yayji ocok. Watx' jun ofrenda tu' chi yab Jehová. 10Axa janic'okxa jun ofrenda tu', yet Aarón c'al yetok is yinatil. Miman yayji ocok, yujtol yetbic'al ba yetok juntzan ofrenda max ak'lay tz'a satak Jehová.
11A masanil juntzan ofrenda chi ak'lay bay Jehová yin tzet chi loji, c'amc'al chi alay oc yich. C'amc'al yich, tamwal no yalcab chi ak'lay tz'a yin ofrendail satak Cham. 12Chi je' yak'lay yich pan, c'al no yalcab yin ofrendail yet chi ak'lay babel sat awoj, palta c'am chi ak'lay tz'a yiban altar yin ofrendail tol watx' chi yab Cham.
13A masanil ofrenda chi ak'lay yin tzet chi loji, yowalil chi toj yatz'amil; c'am junok ofrenda tu' tol c'am chi toj yatz'amil, yujtol a' chi tx'oxon el e trato yetok Jehová. Yuj tu' xan masanil ofrenda chi ak'layi, ayokabc'al oc yatz'amil.
14Ta chi ak'lay junok ofrenda bay Jehová yin babel sat awoj, yowalil tol a jayebok jolom trigo chi k'anbi xol k'ak'ej, yaxto wali cax chi chil-lay elok. 15A yiban jun ofrenda tu', chi alay oc aceite c'al incienso, yujtol ofrenda yin ixim trigo ma cebada. 16Axa cham sacerdote chi ak'on tz'a janic'ok ixim tol chilbil el tu', yetok aceite, c'al yetok masanil incienso. A janic' tu' chi tx'oxoni, tol a masanil ofrenda tu' yet Jehová yayji.
Currently Selected:
Lv 2: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989