Jl 1
1
Max etaxtok sat awoj yuj no chapulín
1A ton is k'anej Jehová ti' max yal bay Joel, is c'ajol Petuel.
2Abek wal juntzan ti', ex yicham winakil conob, c'al e masanil mac ex cajan ex bay jun nación ti'. Tokwal ayxa bay max e yil tzet yetal lajan axca jun ti'. Tok mi ay bay max il-lay junok axca ti' yet max ec' eb jichmam.
3Alek juntzan ti' bay eb e yuninal, axa eb ok alon bay is yuninal, axa eb tu' ok alon bay eb ok aljok yet yajtok tu'.
4Masanil tzet max loaytok no chapulín.*fn* Ta ayto wal tzet max can xin, tx'okxa pax junxa makan no' max ul lajonxac'al aytok.
5A wal ayex uq'uem an ex ti', iek el e wayan. Axa ayex uq'uem vino ex ti', ok'anek, yujtol ok ilay ec' yal an uva ti' ayex.
6Mayal oc jun miman bulan chapulín bay yul co tx'otx', axca wal ejército. Caw wal c'amxa chi bischaji, yelxac'al ay is may. A ye no', lajan wal axca ye no coj.
7Mayal yetnejtok no' an uva, mayal yak' c'apax lajwok el no' te higo. Tz'ininixac'al max yuncan yuj no'. Max yion c'apax el no' is tz'umal masanil awoj tu', sakxac'al max yun yilican is k'ablak.
8Ok'anek axca junok ix k'opoj chi ok'i, cax chi pichon ba yetok pichilej yet cusc'ulal, yujtol mayal cam nak max yak' ti' nupay yetok.
9Axca tu' chi yun yok' eb sacerdote chi ak'on serbil Jehová, yujtol c'amxa loj c'al vino bay templo, a ton ofrenda chi ak'lay bay Cham.
10Mayal etax el yili masanil lugar. Axca tol ayoc tx'otx' tx'otx' yin cusc'ulal. Mayal lajwi ay ixim trigo, mayal takaj an uva, cax mayal etax c'apax el te olivo.
11Ayex mulnajwom ex ti', ok'anek, cusanek, yujtol mayal lajwi ay e yawoj. C'amxa jooj trigo c'al cebada.
12Mayal takil an uva, mayal lajwi ay te higo, cax max tak c'apax el te granado, an palma, c'al te mansan, yetok masanil te awbejal te'. ¡Axca tu' max yun lajwi ay is tzalojc'ulal eb anima!
13A wal ayex ti' ex sacerdote, ayex tol chex ak'wi serbil bay altar ti', pichek e ba yetok el pichilej yet cusc'ulal, ocanek bay templo yin iloj ak'bal, cax ok'anek yuj yailal, yujtol a bay templo Dios, c'amxa ixim pan yetok vino chi ak'lay yin xajanbalil.
14Awtejek masanil eb anima, cax chex oc yin c'ajbanc'ulal. Wajbajek oc e ba bay templo Jehová Dios, yetok masanil eb yicham winakil conob, c'al masanil eb anima, cax chex tewi bay Cham.
15¡Ay, caw wal cawilxa chi jayoc jun c'ual yet yowal c'ul Jehová! ¡Jun c'ual ay is may yet ok on c'ayil yuj Cham chic'al je' yuj masanil!
16Co satak wali cax max yion el co lobej; max lajwi tzalojc'ulal bay is templo Jehová co Diosal.
17A ixim inat, toc'al max k'aaytok yul tx'otx', yuj tu' xan c'amxa trigo. Axa c'una, c'amxa tzet yul, tol max lajwi ay masanil.
18Caw wal chi el yaw no no' chi eq'ui. Nabaxac'al chi ec' no wacax say yac'un. Lananxa camay no calnel yuj wajil.
19Chi aj waw ayach Jehová, yujtol mayal takaj masanil; axca tol max ec' k'ak'ej xol an ac'un bay lobal no no', c'al bay masanil xolak te'.
20Yetok masanil no no' ay xolak te', chi aj yaw no' ayach, yujtol mayal tanaj masanil a' aej, axca tol mayal tz'atok masanil an ac'un.
Currently Selected:
Jl 1: ATBYK89
Highlight
Copy
Compare
Share
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
