Stg 4
4
Manchak co camc'ulnej jun yulyibank'inal ti'
1¿E yojtak mi wali, bay chi ca titoc juntzan owal, c'al caklejbail ay e xol? Tokwal manak bay juntzan yob ochwanilej chi yak' owal e yin, chi tita'. 2Che yochej wal oc junok tzet yetal, palta c'am chi ak'lay pax ayex. Yujc'al tu', xan ayex ok ex mak'wok cam anima. Caw ayoc yin e c'ul e yochen oc tzetak yetal, palta majc'al ak'lay ayex, yujc'al wal tu' xan che lajoc e yak'lenc'al owal. C'am chi ak'lay ayex, yujtol c'am che k'an bay Dios. 3Caxc'al mi tol che k'ana', palta majc'alta' ak'lay ayex, yujtol tx'ok yoc e nabal, xan che k'ana'. A e naoni, tol ok ak'lay ayex, cax ok e yak'on e nabal yin juntzan tzet che k'an tu'. 4Ayex lajan ex wal axca junok ix ajmul ix, caywal tu' e yili yul sat Dios. ¿Tom man e yojtakok xin, tol a yet chi co camc'ulnen yulyibank'inal ti', chon occan ajc'ulal yin Dios? Yuj tu', tzanc'al mactxel chi yochej watx' yak'on yetok yulyibank'inal ti', chi occan ajc'ulal yin Dios. 5¿Tom che na' xin, tol c'amc'al jabok tzet chi yal elapnok is k'anej Dios yul tx'an Un Tz'ibbilcanok tol chi yal axca ti': A ton Dios max cajban can oc Cham Espíritu Santo jin, cax chi yochen Yespíritu tu' tol yet on yin junelnej, ẍi? 6Yuj tu' xan caw miman is watx'c'ulalil Dios chi yak' ayon, yujtol chi yal tx'an Un Tz'ibbilcan tu' axca ti': A Dios chi tenic' is nabal eb mimek winak chi yut ba, axa bay eb yaynakil chi yut ba xin, a is watx'c'ulal Cham chi yak' bay eb, ẍi. 7Yuj tu', yikemokab chi jut co ba bay Dios, cax tec'anc'alokab chi jut co ba bay nak diablo, cax ok el ayon. 8Co jitzek oc co ba c'atan Dios, cax ok jitzontek ba Cham co c'atan. Watx'nejek oc e beybal, ex tol yob e beybal. Watx'nejek oc e nabal mac ex tol chi cabax aj e c'ul. 9Ocanek yin cusc'ulal, jichchajokab e c'ul e yok' sic'libil. Meltzojokab oc e tze' yin ok'il. Meltzojokabcan oc e tzalojc'ulal yin cusc'ulalil. 10Iek ay e ba satak Cham Jajawil, catatu bian, ok ex ilay aj can yuj Cham.
Manchak jal k'umal junok jet creyenteal
11Ex wuẍtak, ex wanab, manchak e yal-lej e k'umal. A mactxel chi yal k'umal junok yet creyenteal, ma chi beyc'ulnej, chi yal elapnok, tol a ley Dios lanan yalon k'umal, c'al beyc'ulneni. Tatol chi co beyc'ulnej ley Dios xin, man ipanok co beybalnen tzet chi yala', palta lanan wal jaon oc co ba yin juezalil chi yal tu'. 12Palta junnej mactxel max watx'nen ley, cax junnej juez, a ton Cham chi je' con coloni, cax chi je' c'apax c'ayil masanil anima yuj. Yuj tu xin, xan ¿tom ay e yalon e yet e beyc'ulnen e yet animail?
Man jojtakok tzet ayon yet yecal cabej
13Abek xin, ex tol lanan e yalon cakti': A tinani', ma yecal, ok on tok bay junok conob, jun abil ok on ayjok bay tu'. Ok jaon oc co txon, cax ok jion co tumin, quex chi. 14Palta man pax jojtakok tzet ayon yet yecal tu', yujtol a co k'inal, junnejch'an bek chi c'ay aj bay yulyibank'inal ti'. Lajan wal axca xob tx'otx', junch'an bek txequel yaj wacacok, cax chi c'ay pax ajok. 15Yelxac'al watx' ta caytu' chi jut k'anjab co ba axca ti': Ta chi el yin c'ul Cham Jajawil, cax tatol iquis onto ec'ok, ok jun jun ti', c'al jun tu', quex chiokabi. 16Akxa tinani', ay ex maynejbail che yunej yet caytu' che yut k'anjab e ba axca tu'. Masanilc'al mactxel chi k'anjab yin maynejbail axca tu xin, man watx'ok chi yut ba eb satak Dios. 17Tatol jojtak wal tzet chi yochej c'ul Dios chi junej, palta c'am chi jun paxok, ipan wal yoc co yobtakil bay.
Currently Selected:
Stg 4: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989