Heb 4

1Yak'nakcan Dios is ti', tol chi je' joc xew yetok. Yuj tu', jilekc'al co ba sic'libil, yet watx' c'amokab junok on tol c'am chon oc xew yetok. 2Yujtol max al-lay c'apax k'anejal yet colbanilej ayon, axca max yun yal-lay bay eb jichmam tu'; palta nabac'al max yab eb, yujtol maj yaoc eb yin c'ul. 3Palta ayon ti', ok on oc xew yetok yujtol chi jaoc co c'ul yin. Yalnak Dios yuj eb jichmam tu' axca ti':

Yuj wal tu' yetok wowal max wak'on in ti' bay eb tol man ok oc eb bay ok wak' xew eb, ẍi.

Palta lajwinakxa mulnajil Dios yettax max lajwi watx'nen yulyibank'inal ti'. 4Ay bay chi yalcan yuj jun yet is suk c'ual yul tx'an Un Tz'ibbilcanok, chi yalon axca ti':

A yet is suk c'ual xin, max xew Dios yin masanil is mulnajil, ẍi.

5Cax chi yalon c'apaxok:

Man ok oc eb bay ok wak' xew eb, ẍi.

6A eb tu', babel abnej jun k'anejal yet colbanilej; palta maj oc eb xew yetok Dios, yujtol man yikemok yutnak ba eb. Palta yowalil ay mac ok oc xew axcac'alta' yaloncan tu'. 7Yuj tu', ay jun tiempoal k'okbilcan yuj Dios, a ton jun tiempoal tu' tinani'. Payxatax yalnakcan Dios yuj jun xewilal tu', cax max yak'on yal David axca max wala', yet chi yalon axca ti':

Ta che yab tzet chi wal tinani', manchak e pitnej e ba bay, ẍi.

8K'inalok ta max oc eb jet israelal bay xewilal tu' yuj Josué, majxam yaltek Dios junokxa tiempoal. 9Yuj tu', ay wal jun co xewilal ok yak' Dios ayon yet onxa ti'. 10Yujtol a yet ok on xew yetok Dios, chon xew yin co mulnajil, axca max yun xew Cham yin is mulnajil. 11Yuj tu', jak'ek jip joc bay jun xewilal tu', yet watx' c'am junok on chi jut co ba axca yutnak ba eb maj iken tu'.

12Yujtol a is k'anej Dios iquis, chic'al je' yuj masanil. Lajan is k'anej tu', axca junok ch'en espada el yayji ye ca paq'uil. Yujtol chi jeklay octok yin co nabal c'al yin janimail. Chi tx'ox tzet chi co na' junjun on, c'al tzet chi jochej. 13C'am junok mac chi je' c'uban el ba yul sat Dios. Caw miman txequel masanil tzetak yetal yul sat Cham. A bay Cham ok jak' masanil co cuenta.

A Jesús co sat sacerdote

14Ay jun co sat sacerdote tol miman yelapnok, a ton Jesús, Cham is C'ajol Dios. Paxnak aj Cham satcan, bay is watx' k'ab Dios. Yuj tu', jiekc'al bey co cuybanil. 15A jun co sat sacerdote tu', yojtak chi ok' c'ul jin yuj c'am co tec'anil, yujtol max yak'lej nak diablo yikban Cham yin masanil yobtakil axca on ti'; asan xin, c'am junelok max oc is yobtakil. 16Yuj tu', manchak on xiw japni oc satak Dios bay chi txecloj el is watx'c'ulal. A tu' chi tx'ox is c'ulbal ayon, c'al is watx'c'ulal, mawal yet cawxinak on elok.

Currently Selected:

Heb 4: ATBYK89

Highlight

Copy

Compare