Hag 2
2
Is watx'il yili ac' templo
1A yet 21 waay yet is suk xajaw, a yet tu' max k'anjab pax Jehová bay Hageo is chekbej. 2Max yaloni, tol chi al-lay bay Zorobabel, c'al bay Josué yetok c'apax bay masanil eb anima: 3A mac ex maxto e yil jun templo yet yalantok, yetokc'al watx'il yili, yalokabi, tatol lajan yetok jun jet ti' tinani'. ¿C'am mi che na' tol c'am jabok yelapnok, ta chi co lajlej yetok jun tu'? 4Manchak a cabc'ulnej a ba ach ti' Zorobabel, c'al ach Josué sat sacerdote; manchak e cabc'ulnej c'apax e ba ex conob. Mulnajanek, yujtol ayin wal caw Jehová Yajaw in yin Masanil, ayin ec' e yetok. 5Ayc'al oc Wespíritu e yetok atac'ala' max yun wak'on in ti' yet max ex el bay Egipto, xan c'amc'al chex xiwi. 6Janic'xanej axa c'oli wak'on bilaj satcan, c'al yulyibank'inal ti', a ton a' mar yetok tx'otx' tx'otx'. 7Ok wak' bilaj masanil nacionlak, caytu' ok yun yiontek eb is beyomal bay in templo. Ayin wal caw Jehová Yajaw in yin Masanil chi wala', tol ok nojxac'al jun templo ti' yuj tzet yetal watx' yili. 8Ayin ay wet ch'en plata c'al ch'en oro. 9Ayin wal caw Jehová Yajaw in yin Masanil chi wala', tol a mimanbilal jun templo ti', yelxac'al miman ok yun binaj yintak jun yet babelal. A cayti' ok wak' tz'unchaj junc'ulal, ẍi Cham.
Chi tenchanej Dios is conob
10A yet 24 waay yet is baloneb xajaw, ac'al oc yet is cab abil yoc Darío yin reyal, a yet tu' max k'anjab Jehová bay Hageo is chekbej; max yalon axca ti': 11K'anlej bay eb sacerdote tzet chi yal ley. 12K'inalok ta ay junok winak ibil oc jabok chibej yuj, tol pichan oc yul is pichil, tol wet yayji jab chibej tu', yujtol max ak'lay yin xajanbalil. Ta a ti' is pichil tu' chi low tennaj yin ixim pan, yin junok tajnak loj, yin vino, ma yin aceite, ma yin tzanc'al tzet lojal. ¿A mi yuj tu' wet-xac'al chi yuncan juntzan loj tu'? cachi bay eb sacerdote, ẍi Cham. C'amak, ẍi eb sacerdote. 13Max occ'al ijan Hageo tu' k'anjabi: K'inalok ta ay junok mactxel man watx'ok yul sat ley, yujtol max mitx' junok mimanil camnak, cax chi mitx'on c'apax juntzan tzet yetal maxax jal tu': ¿Chi mi cancan juntzan tu' yin man watx'ok, atac'ala' ley? ẍi Hageo. Axa max tak'wi eb: Yel toni, ẍi eb sacerdote tu'.
14Lajwi tu', max yalon Hageo: Caywal ti' yalon Jehová: Axca wal tu' yayji juntzan anima ti'; a masanil tzet chi yun eb, c'al tzet chi yak' eb ayin, junelnej man watx'ok. 15Naek wali, tzetbil yayji yet c'amto che chail yich e ca watx'nen aj in templo ti'. 16Ilab yet ay mac max toj ion 20 echbal trigo yaloni, axa yet max apni bay c'uan, asanxanej 10 echbal ixim ayic'ok. Ta ay c'apax mac max toj bay chi watx'ji vino yet chi toj yiajtek junok 50 moc vino yaloni, axa yet max yion ajtek, asannej 20 moc max ajtek. 17Ayin caw max wak' lajwok masanil sat e yawoj yetok yabil, c'al yetok sakbat; palta ayex ti', maj ex meltzojtek ayin. 18A yet jun c'u ti' 24 waay yet is baloneb xajaw, a ton yet jun c'ual ti', max e yaytok yich in templo. 19Axa tinani' xin, chi cam wal e yilon tzet ok yun e yeloc yet ok ex beyc'altok. Caxc'al c'amxa trigo chi can bay c'uan, c'al an uva, yetokc'al te higo, yetok te granado, c'al te olivo, c'amto chi yak' te' sat, palta a wal tinani', c'al yet ok beyc'altok, ok wak' wal yaxilal e yiban, ẍi Jehová, ẍi Hageo.
Is ti' Jehová max yak' bay Zorobabel
20Ac'ala' yet jun c'u tu' max k'anjab Jehová bay Hageo: 21Max yaloni, tol chi yal bay Zorobabel is gobernadoral Judá axca ti': Ayin ok wak' bil satcan, c'al tx'otx' tx'otx' ti'. 22Ok wak' lajwok ay masanil is yipalil juntzan nacionlak yulyibank'inal ti', cax ok in k'okon ay masanil is yikbej. Ok wak' aj pac'lajbok masanil carruaje yet owal, c'al yetok eb ayoc yul. Ok cam no chej, yetokc'al mac ayoc yiban no'; junjunc'al ok tzoc'lay cam yuj mac ajun yetok. 23Ayin Jehová Yajaw in yin Masanil chi wal ayach, ach in chekbej Zorobabel, c'ajol Salatiel, tol a yet jun c'ual tu', ok waoc opiso axca yopiso in sello, yujtol ayin max ach in siq'uilok, ẍi Jehová, cachi bay, ẍi Cham bay Hageo.
Currently Selected:
Hag 2: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989