Ez 42
42
Juntzan na yinlak templo
1Lajwi tu', max wiloni tol max in yieltek jun winak tu' bay amak' bay yetc'ulal norte. Max in yion octok bay yul juntzan cuarto nan xol jun amak' tu' yinlak templo, yetok junxa na bay yetc'ulal norte. 2A juntzan cuarto tu', ay 50 metro is k'atil bay yetc'ulal norte, yetok 25 metro is sat. 3A jun pac' chi cancan bay ti' amak' yinlak templo, tol ay 10 metro is sat, axa jun pac'xa xin, bay yetc'ulal bay latz'bil ch'en ch'en bay babel amak'. Oxeb piso yayji junjun. Junjun piso chi aji, yaliẍxa yul, yintak jun ay yalan. 4A bay satak juntzan cuarto tu', ay jun jakan aycan nan, oyeb metro sat yetok 50 metro is k'atil, chitac'al apni oc bay yul ocok. A is puertail juntzan cuarto tu', a tu' ayoc bay yetc'ulal norte. 5A juntzan cuarto bay piso yiban, yaliẍ yintak junxa piso ay yalan, yujtol ay is tentail, xan yaliẍxa yul. 6Oxeb piso yayji juntzan cuarto tu', palta xin, c'am pilaliẍal axca is pilaliẍal juntzan cuarto ay yinlak jun babel amak', yuj tu' xan a jun piso yiban, yaliẍ yul yintak jun ayoc nan, axa jun nan tu', yaliẍ yintak jun ay yalan.
7Ay jun pared 25 metro is k'atil chi ec'tok bay satak juntzan cuarto tu', junnej toj k'atan yetok muroal babel amak'. 8Yujtol a juntzan cuarto ay bay is tz'eyil babel amak', asannej 25 metro is k'atil, axa pax juntzan cuarto ay yinlak templo xin, ay 50 metro is k'atil. 9A juntzan cuarto bay babel piso, ay is puertail yet chon octok bay babel amak', bay jun pac' ay bay yetc'ulal yichcan, 10bay chi elol is paredal jun na tu'.
Axa bay yetc'ulal sur xin, bay nan xol jun amak' yinlak templo yetok junxa na, a bay tu' ay c'apax cuartolak. 11Lajanc'al cawxi, lajanc'al yechel axca wal juntzan cuartolak bay yetc'ulal norte. Lajanc'al yayji bay chon oqui c'al bay chon eli, yetokc'al jun jakan nan yul. 12A yet chon octok bay juntzan cuartolak bay yetc'ulal sur, ay jun puerta bay chi babji chaon el yich jun jakan, bay chi elol pared, a ton jun pared tu' enelej yayji bay yetc'ulal yichcan.
13Max yalon jun winak tu' ayin axca ti': A juntzan cuarto bay norte, c'al bay sur, a ton juntzan ay tilak amak' yinlak templo, asannej eb sacerdote ay yet. A bay tu' chi chi' eb sacerdote no xajanbal tol asan Jehová ay yet, yujtol a eb chi ak'wi serbil bay Cham. A bay tu' chi ya c'apax octok eb juntzan tzet yetal tol asan Cham ay yet, a ton ixim trigo chi ak'lay yin ofrendail, c'al ixim chi ak'lay yetok no xajanbal yuj yak'lay tan mulej, c'al yetok no xajanbal, yuj tojlabal yuj mulej, yujtol yet Jehová yayji oc juntzan ofrenda tu'. 14Asan ta mayal oc eb sacerdote bay yul templo, c'am chi eltok eb bay jun babel amak' yet c'amto chi q'uexcan el eb is pichil chi yaoc yet ayoc eb yin ak'oj serbilal bay yul templo tu'. Yujtol a jun is pichil eb tu', miman yelapnok, xan c'am chi je' yeltok eb xol conob yetok; yowalil tx'okxa pichil eb chi yaocok, ẍi jun winak tu' ayin.
Yechel yinlak templo
15A yet max lajwi yechen jun winak tu' bay yul templo, max in yion eltok bay jun puerta ay bay yetc'ulal yichcan. Lajwi tu' max oc ijan yechen tx'otx' yinlak templo tu'. 16Max k'anbalnej jun aj ibil oc yuj, max yechen bay jun pac' bay yetc'ulal yichcan; ay 250 metro. 17Lajwi tu' max yechen c'apax junxa pac' bay yetc'ulal norte, a jun tu' ay c'apax 250 metro. 18Axa pax jun pac'xa bay yetc'ulal sur, ay 250 metro. 19Axa yin is lajubal xin, a bay yetc'ulal yayub c'u, ac'ala' 250 metro c'apaxok. 20Max yechejc'al can paq'uil. A yin masanil is tx'otx'al templo tu', ay jun muro, 250 metro yayji junjun pac'. A jun tu' ayoc nan xol tzet yetal tol yet Dios yayji, c'al juntzan comon tzet yetal.
Currently Selected:
Ez 42: ATBYK89
Highlight
Copy
Compare
Share
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
