Ez 40
40
Yabixal jun templo yet yajtok tu'
1A yet 10 waay xajaw, a ton yet jun c'ual yet ac' abil, a yet tu' max yaoc Jehová is k'ab wiban. Max wila', axca tol max quin ilaytok bay is tx'otx' Israel. Lananxa lajwi 25 abil jilaytek bay Babilonia ti', 14 abilxa yettax max ayc'ay Jerusalén.
2A bay tx'otx' Israel tu', a bay jolom jun witz puch can ayajok, a tu' max quin yiajtok Jehová max wila'. Atac'al bay tu' max wiltok bay yetc'ulal sur ay jun bulan na lajanxac'al yili axca junok miman conob. 3Max quin yiontok Jehová bay jun conob tu'. A bay tu' max wil jun winak tol lajanxac'al yili axca ch'en bronce. A tu' lecan oc bay ti' junok puerta, ibil oc jun tx'an naba lino yuj, yetok jun aj yet chi yak'balnej yin yechbalok. 4Max yalon jun winak tu' ayin axca ti': Chi cam wal abeni c'al elon tzet yetal ok in tx'ox ayach, yujtol a Dios max ach iontek cayti' yet watx' chojtaknej elok. Lajwi tu' ok alon masanil tzet yetal chel ti' bay eb et conob Israel, ẍi ayin.
Puertail templo bay yetc'ulal yichcan
5A bay yinlak templo ay jun muralla oyan oc yin. A jun aj ibil oc yuj jun winak tu', oxeb metro is tel. Max yechen jun muralla tu xin. A jun tu' ay oxeb metro is pimal, oxeb c'apax metro ayaj is tel can. 6Lajwi tu', max toj bay jun puerta bay yetc'ulal yichcan, max ajtok bay k'och yayji, cax max yechen jolom puerta. A jun tu' oxeb metro yul puerta tu'. 7Ay jun jakan chi toj bay puerta, cax chi tojc'al bay yul. Axa bay is tz'eyil-lak ay ox ox cuarto bay ay eb taynewom. A junjun cuarto tu', ay oxeb metro is sat, oxeb metro c'apax is k'atil. Axa pared ayoc nan xol juntzan cuarto tu', nan yox metro is pimal. Axa bay satak octok juntzan cuarto tu', ay junxa jakan, ay oxeb metro is k'atil, chi apni oc bay jun tenta acantok bay templo. 8-9Max yechen jun winak tu' jun tenta bay chon octok yul templo, caneb metro is sat jun tu'. Ay cab mimek pilaliẍ jun metro wal is pimal. 10A bay junjun pac' bay chon octok bay yetc'ulal yichcan, ay ox ox cuarto lajanc'al yul, lajanc'al pimal pared ayoc nan xol junjun.
11Lajwi tu', max yechen c'apax puerta; ay oyeb metro is sat, axa masanil bay chon octok xin, ay nan is suk metro. 12A bay ti' junjun cuarto tu', ay junjun yaliẍ muro nan metro is sat, c'al nan metro is tel ayajok. Junjunc'al juntzan cuarto tu', ay oxeb metro is sat c'al oxeb metro is k'atil. 13Lajwi tu', max yechen masanil is sat bay chon octok, chi tittac'al yechen bay yul jun cuarto masantac'al bay yul junxa cuarto paq'uil ba yetok, ay nan yoxlajoneb metro yin masanil. 14Lajwi tu' max yechen c'apax jun tenta acantok bay templo, ay lajoneb metro is k'atil. 15A jantak is k'atil yin masanil, chi tittac'al bay yich masantac'al bay puerta bay is ti', ay 25 metro yin masanil. 16Ay wentenail bay masanil is paredal juntzan cuarto acantok bay amak'. Ay c'apax wentenail bay pared nan xol juntzan cuarto tu'. Axa bay yinlak sat pared bay tz'eyil jun jakan, ayoc yechel an palma yin.
A babel yamak'il templo
17Lajwi tu', a jun winak tu', max in yitok wilon jun babel amak' bay yul. Ay 30 cuartos yin satlak muralla ayoc yinlak amak'; axa bay tilak juntzan cuarto tu', c'al yinlak latz'bil ay ch'en. 18A ch'en ch'en latz'bil ay tu', chi apnitac'al oc bay is paredal juntzan cuarto bay puertalak, ayc'al oc bay masanil yinlak amak'. A jun babel amak' tu', ayay yintak junxa yet is cab amak'. 19A jun winak tu' max yechejtac'al nan xol satak puertail bay yalan, masantac'al bay yin junxa puerta bay yul. A yin masanil jun tu' ay 50 metro, ac'ala' c'apax bay yetc'ulal norte, c'al bay yetc'ulal yichcan.
Puerta bay norte
20Ay c'apax jun puerta bay babel amak' bay yetc'ulal norte. A jun winak tu' max yechej is k'atil c'al is sat. 21Ay oxeb cuarto bay junjun paq'uil. Ay pared, c'al tentail; lajanc'al yechel yetok puerta bay yetc'ulal yichcan, chi yal elapnok tol ay 25 metro is k'atil, yetok nan yoxlajoneb metro is sat. 22A jun tenta tu' yetokc'al wentenail, yetok yechel an palma, lajanc'al yetok juntzan ay bay yetc'ulal yichcan. Ay ukeb sat is k'ochal chi ajtok bay puerta, axa is tentail tu' chi cancan bay yul. 23A bay satak puerta bay norte ti', a tu' ay pax puerta bay yet is cab amak', lajanc'al axca jun ay bay yetc'ulal yichcan. A jun winak tu' max yechej bay nan xol cab puerta tu', ay 50 metro nan xol.
Junxa puerta bay sur
24Lajwi tu', max in yiontok jun winak tu' bay yetc'ulal sur, ay c'apax jun puerta bay tu'. Max yechen is pared, yetokc'al tentail, lajanc'al is yechel yetok juntzanxa. 25A jun na tu', yetokc'al is tentail, ayc'al is wentenail axcac'al juntzanxa tu'. A yechel yin masanil, ay 25 metro is k'atil, yetok nan yoxlajoneb metro is sat. 26Ukeb sat jun is k'ochal chi ajapnok bay jun puerta tu', ay c'apax is tentail bay yul. Ay c'apax oc yechel an palma yin satlak pared bay junjun paq'uil. 27A jun yet is cab amak' tu', ay jun is puertail bay yetc'ulal sur. Max yechen jun winak tu' nan xol cab puerta bay yetc'ulal sur tu', ay 50 metro nan xol.
Jun yet is cab amak' c'al puerta bay sur
28Lajwi tu', max in yiontok bay puertail yet is cab amak' bay yetc'ulal sur. Max yechen jun puerta tu', lajanc'al yechel yetok juntzanxa puerta. 29-30Is cuartolakil, c'al is tentail, yetok is paredal, lajanc'al yechel yetok juntzanxa. A jun na tu', c'al is tentail, ay c'apax is wentenail bay yinlak. Ay 25 metro is k'atil yin masanil yetok nan yoxlajoneb metro is sat. 31A jun tenta tu', a tu' ay bay babel amak', ac'ala' ayoc yechel an palma yin satlak pared. A bay jun puerta tu' ay waxakeb sat is k'ochal chi ajtok.
Jun yet is cab amak' c'al puerta bay yichcan
32Lajwi tu' max quin yion octok bay yet is cab amak', bay puerta yetc'ulal yichcan, max yechen puerta tu', lajanc'al yechel jun tu' axca juntzanxa. 33Ayc'al is puertail, c'al is tentail is wentenail bay yinlak tu'. Ay 25 metro is k'atil yetok nan yoxlajoneb metro is sat. 34A jun tenta ay bay babel amak', ayoc yechel an palma yin satlak pared bay junjun paq'uil. A bay jun puerta tu' ay waxakeb sat is k'ochal chi ajtok.
A yet is cab amak' c'al puerta bay norte
35Lajwi tu' max quin yiontok jun winak tu' bay puerta bay yetc'ulal norte; max yechen puerta tu', a jun tu' lajanc'al yetok juntzanxa. 36Ay c'apax is cuartolakil, c'al paredal, yetok tentail c'al wentenail bay yinlak. Ay 25 metro is k'atil yetok nan yoxlajoneb metro is sat. 37A is tentail ay bay chi ocapnok babel amak'. Ayoc yechel an palma yin satlak pared yin junjun paq'uil; waxakeb sat is k'ochal chi ajtok.
Juntzan cuarto junej ay yetok puerta
38Ay jun cuarto junej ay yetok tentail bay junjun puerta. A bay tu' chi tx'ajlay no no' chi oc yin xajanbalil. 39A bay tentail bay ti' puerta ay caneb meẍa ch'en latz'bil ajok, cabcab bay junjun paq'uil. A yiban juntzan meẍa tu', a tu' chi mak'lay cam no no' chi tz'a yin xajanbalil, yetokc'al no' chi cam yuj yak'lay tan mulej ma yuj tojlabal yuj mulej. 40A bay yinel is tentail bay puerta bay yetc'ulal norte ay cabcab ch'en ch'en axca meẍa bay jun paq'uil, 41chi yal elapnok ay caneb juntzan ch'en tu' bay yul, c'al caneb bay yinel jun tentail tu'. Ay waxakeb meẍa tu' yin masanil, a ton yiban juntzan tu' chi mak'lay cam no no'. 42A caneb meẍa bay chi mak'lay cam no no' chi tz'a yin xajanbalil, ch'en josbil ayoc yin. A junjun ay 75 centímetro is k'atil, ay c'apax 75 centímetro is sat, 50 centímetro ayaj is tel. A yiban juntzan tu', a tu' chi alay ajtok ch'en mitx'k'abej chi k'anlay yin yak'lay cam no xajanbal tu'. 43A bay yiban tilak juntzan meẍa ti', 8 centímetro ayajok. Masanil no chibej chi ak'lay yin xajanbalil, chi alay ay yiban juntzan ch'en tu'.
44Lajwi tu' max in yion octok bay yet is cab amak'. A bay tu', ay cab cuarto, a tu' acantok bay yetc'ulal amak'. Ay jun, a tu' ay bay cawilal puerta bay norte; acantok bay yetc'ulal sur. Axa pax junxa xin, a tu' ay bay cawilal puerta bay yetc'ulal sur, a tu' acantok bay yetc'ulal norte.
45Max yalon jun winak tu' ayin axca ti': A jun cuarto acantok bay yetc'ulal sur tu', yet eb sacerdote chi ak'wi serbil bay templo. 46Axa cuarto acantok bay yetc'ulal norte, yet eb sacerdote chi ak'wi serbil bay altar. Masanil eb sacerdote, yinatil Sadoc eb, asannej eb xol eb yinatil levita chi je' yoc satak Jehová yin yak'wi serbil, ẍi jun winak tu' ayin.
Yet is cab amak' c'al templo
47Lajwi tu' max yechen jun winak tu' jun yet is cab amak'. Lajanc'al yechel is can paq'uil, 50 metro c'al yayji. A jun altar ayic' bay satak templo. 48A jun winak tu', max in yitok bay tentail templo, cax max yechen is pimal pared c'al is tentail tu'; nan yox metro c'al is pimal. Axa jun puerta xin, ay ukeb metro is sat. A janic' pared ay bay ti' puerta tu', nan is cab metro bay junjun paq'uil ayiltek. 49A jun tenta tu', ay 10 metro is sat, yetok wakeb metro yul. Ay is k'ochal chi ajtok. Ay cab mimek ch'en oy bay ti' puerta, junjunc'al bay junjun paq'uil.
Currently Selected:
Ez 40: ATBYK89
Highlight
Copy
Compare
Share
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
