Ez 32
32
Yabixal reyal Egipto yin tx'oxbanilejal
1A yet babel c'ual, yet lajcaweb xajaw yet lajcaweb abilxa joc yin presoal, a yet tu' max k'anjab Jehová ayin, max yalon axca ti': 2Ach anima, bitnej jun bit yet camich ti' yin reyal Egipto:
Ach ti' cha lajbaj a ba yetok junok no coj xol nacionlak; palta lajan ach wal axca junok no miman no' ay bay yul a' mar. Chach tec'lab aytok yul a' cax chi aj tatil a' oj.
3Axca ti' yalon Jehová Cham Yajaw: Ayin ok ach in mitx' yetok in txim, yet ok in wajban oc xiwil nación. A yul in txim ok ach canok, axa eb tu' ok ach ion ajtek bay ti a'. 4Ok ach in jutxil ti a', ok ach waoncantok bay mayayi; cax ok jayoc no ostoc en, a no xolakilteal no' ok ach chiontok. 5A yetok a mimanil tol toxac'al chi k'atok tu' ok wak' nojil bay jolomlak witz c'al yetok bay jobelak. 6Ok wak' uc'tzan tx'otx' tx'otx' ti' yuj a chiq'uil, masantac'al ok apnok oc bay yichlak witz. A yetok chic' tu' ok nojil is belak aej. 7A yet ok ach wak'on lajwok ayok, ok wak' k'ekbok el bay satcan, cax ok tan yakan waycan; ok makay el c'u yuj asun; axa xajaw, c'amxa is sakk'inalil ok yak'a'. 8Ayin wal caw Jehová in chi wala', tol oj wali xan ok wak' tan masanil tzektebalej ay bay satcan, asanxanej k'ekk'inal ok ayjok ec' bay yiban a conob.
9A yabixal yet ok ach lajwok ay tu', ok apnoktac'al bay juntzanxa nación tol man ojtakbilok oj, toxac'al ok wak' bilaj conoblak yuj xiwc'ulal yet ok yaben eb yabixal a yailal. 10Oj wali xan ok watok xiwc'ulal yiban xiwil conoblak. Caw wal ok wak' xiwaj eb reyal conoblak tu' yet ok wak'on ec' jopnaj wespada satak eb. A wal yet ok ach ayc'ayok, caw wal ok bilaj eb yuj xiwc'ulalil bay camich.
11Axca ti' yalon Jehová Cham Yajaw: A yespada reyal Babilonia ok low en. 12A a conob xiwil bisil tu', ok tzoc'lay cam eb yuj yespada juntzan ak'om owal c'am yabenc'ulal. Cha maynej a ba yuj masanil a conob, c'al yuj masanil a beyomal; palta ok wak' lajwok ayok. 13Ok wak' lajwok ay masanil no' a jobbejal no' chi low bay tilak aej. C'amxa yechel ok tatbok a' aej tec'on eb anima, tamwal no no'. 14Ayin caw Jehová in chi wala' tol caytu' ok yun sakbok el a' aej, melelixac'al ok yun bey a'. 15A yet ok can Egipto yin tz'inanil wuj, c'amxa tzet yetal. A yet chi wak' lajwok masanil eb cajyom, a yet tu', ok yojtaknej el eb tol ayin ton Jehová in, ẍi Jehová, cachi.
16Ayin Jehová Yajaw in chi wala', tol ok bitnej eb ix ix bay nacionlak jun bit yet camich ti', yet chi ok' eb yuj Egipto, c'al yuj xiwil bisil anima, ẍi Cham.
A Egipto ayic' yul makbej camich
17A yet 15 c'ualxa waay yet lajcaweb xajaw yet lajcaweb abilxa joc yin presoal, max k'anjab Jehová ayin, max yalon axca ti': 18Ach anima, bitnej jun bit yet camich yuj eb conob xiwilxa bisil bay Egipto:
Junej chi yun aontok eb bay cambal bay yalan tx'otx' tx'otx' yetok eb cajyom bay juntzanxa nación mimanbil.
19Al bay eb: ¿Chi mi e na tol yelxac'al watx' ex yintak juntzanokxa? Ayanektok cax chex ay telan xol eb man in conobok, cachi bay eb.
20A eb conob xiwilxa bisil bay Egipto, ok ayc'ay eb yetok eb chi cam xol owal. Ijanxac'al oc ch'en espada yin masanil eb. 21A eb mimek yajaw ayxa ec' bay cambal, ok yalon eb yin eb aj Egipto c'al eb ajun yetok: ¡E… a eb max cam xol owal, mayal ayol cayti'! ¡Mayal ay telan eb jetok, ayon man conobok on Jehová! ẍi mi eb.
22A bay tu' ayic' reyalben Asiria; oyan oc is soldado yin bay cambal. Masanil juntzan tu' max cam yin owal. 23Atac'al bay najatil yich xab olan ayic' eb. A eb soldado tu', max yacan oc eb xiwc'ulal xol eb cajyom yulyibank'inal; palta a xol owal max cam masanil eb tu', axa is mukbanil eb, oyan oc yin yet reyalben Asiria bay cambal. 24-25A bay tu' ay c'apax ec' jun reyalben conob Elam, telanxa ay xol eb maxax cam xol owal. Axa yinlak, a tu' oyan oc is mukbanil eb is soldado, eb man in conobok. A masanil eb tu', ac'al xol owal max cam eb. A yet iquis ec' eb, caw wal max xiw eb cajyom bay yulyibank'inal ti' yuj eb, palta yinxac'al q'uixwiltakilal max yun cam eb, ayxa ec' eb xol eb camnak, eb camnak xol owal.
26A bay tu' ayic' reyalben Mesec, yetokc'al reyalben Tubal. A yinlak eb oyan oc is mukbanil masanil eb is soldado eb. Max cam eb man in conobok tu' xol owal, caxc'al max xiw eb cajyom bay yulyibank'inal ti' yuj eb, yet iquis ec' eb. 27Junej mukan yetok eb soldado caw wal jelan tol man in conobok. A eb tu' max aytok eb yetok is yarma bay cambal. Aycan oc is yespada eb yalan is jolom. Yuj is yobtakilal eb, xan ayoc yailal yiban eb, yujtol a juntzan eb tu', max xibtej eb eb cajyom bay yulyibank'inal ti'.
28Ok ach ak'lay lajwok el ach reyal Egipto, ok ach apnok bay nan xol eb man in conobok, tol mak'bil cam xol owal.
29A bay tu' ayic' is reyalben Edom, c'al yetok eb yajaw. Caxc'al caw wal mimanbil max yun eb, palta a tu' ayic' xol eb max cam xol owal. A tu' mukan bay xol eb man in conobok bay chi tojcan eb camnak.
30A bay tu' ayic' masanil eb max ec'lej yin yajawilal bay norte, yetokc'al eb aj Sidón. Caxc'al caw wal mimanbil max yun eb max ya wal oc eb xiwc'ulal xol yet animail, palta axa tinani' yinxa q'uixwiltakil max yun cam eb. Mayal aytok eb xol eb camnak, eb camnak xol owal, a ton eb man in conobok tol aynakxa tok bay chi tojcan eb camnak.
31Ayin wal caw Jehová in chi wala' tol yet ok il-lay eb yuj reyal Egipto, yetok masanil is soldado, caw wal ok mimanc'ulnej ba yuj is camichal is yet conob, yujtol max cam yetok masanil eb is soldado yin owal. 32Caxc'al ayin max wak' yaoc reyal Egipto ti' xiwc'ulalil xol eb cajyom bay yulyibank'inal, palta ayin Jehová Yajaw in chi wala', tol a tu' ok muklay bay xol eb man in conobok, a ton eb camnak xol owal, yetokc'al eb is soldado tol xiwilxa is bisil, ẍi Cham.
Currently Selected:
Ez 32: ATBYK89
Highlight
Copy
Compare
Share
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
