Ez 27
27
Bit yet camich yuj conob Tiro
1Max k'anjab Jehová ayin max yaloni: 2Ach anima, bitnej jun bit yet camich ti' yuj conob Tiro, 3a ton jun conob ay bay ti a' mar, jun tol watx' yak'on yin txon yetok juntzanxa conoblak ay bay tilak a' tu'. Al bay eb: Caywal ti' yalon Jehová Cham Yajaw:
A eb aj conob Tiro chi maynej ba eb, chi na eb tol asannej oc is conob eb watx' yili.
4A is mojonail bay chi ec' eb, atac'al bay tilak a' mar. Caw wal watx' max yun watx'nen aj eb is barco.
5Watx'xac'al max yun watx'ji oc is chemteal, a ton te chemte' taj ibiltek bay jolom witz Senir. Max watx'nelay yoyal yetok te c'ute' chi tit bay Líbano.
6A te mak'bal bey barco, watx'nebil yetok te potxji chi tit bay Basán; axa piso max watx'nelay yetok te q'uisis chi tit bay tilak a' aej bay Chipre, tol ayoc marfil yelbubok.
7A wal k'ap ayaj can yet chi xulay bey barco, naba lino watx'nebil bay Egipto, ay c'apax oc yelbub yin, ac'al oc an k'ap tu' ayoc yin banderail. A is mantiadoal, a an tx'al morado c'al an yax tx'al ayoc yin an ibiltek bay conob Elisa, bay ti a' mar.
8A eb chi mak'on bey barco, aj conob Sidón c'al Arvad eb. Axa eb chi je' tx'umon xin, winak tol caw wal aj nabal, aj Tiro eb.
9Ajun eb icham winak aj Gebal tol jelan yin watx'nen bay chi etaxtok barco yetok eb. Masanil eb chi ec' yul barco, chi apni manjok bay conob Tiro.
10A eb winak aj Persia, aj Lidia c'al eb aj Libia; a eb ayoc is soldadook yin ak'oj owal. A makbal julbal eb, c'al ch'en toctor eb chi locbaj aj eb satlak murallail conob, axcaxac'al tol yelbub yili.
11A eb winak aj Arvad, junej ay eb yetok eb is soldado Tiro, oyan oc eb yin muralla bay yinlak conob tu', axa bay is torre, ay eb winak aj Gamad. A is makbal julbalej eb locan aj bay satlak muralla. Axca tu' caw wal watx'xac'al yili. 12A eb aj Tarsis, chi yak' eb ch'en plata, ch'en hierro, ch'en estaño c'al ch'en plomo q'uexelok xiwilxa tzet yetal chi txonlay bay tu'. 13Yetok c'apax conob Grecia, Tubal c'al Mesec chi manji eb bay tu'. A tzet chi yak' eb tojolok tzet chi man eb bay tu', a ton eb mosejal, c'al juntzan tzet yetal tol bronce. 14Yetok c'apax eb aj conob Bet-togarma chi tojlanej eb tzet chi man eb yetok no chej yet mulnajil, no' chi k'anlay yin owal, yetokc'al no mula. 15A eb anima aj Rodas, c'al bay juntzanxa conoblak bay tilak a' mar, a tzet chi man eb, chi tojlanej eb yetok marfil c'al yetok ébano. 16A eb aj Edom, xiwilxa tzet yetal max man eb bay tu', max tojlanej eb yetok ch'en granate, yetok an k'ap tol cak yili, an ayoc yelbub, yetok an lino, ch'en coral, c'al ch'en rubí. 17A eb aj Judá, c'al eb aj israel max manji eb bay tu'. A yetok trigo chi el bay Minit, yetok pastel, yetok no yalcab, yetok aceite, c'al yetok bálsamo max tojlanej eb. 18Ilab c'apax Damasco, caw wal miman tzet yetal max man bay tu'. Max tojlanej eb yetok vino yet Helbón, c'al yetok lana yet Sahar. 19A eb aj Vedán, c'al eb aj Javán yul makbej Uzal, max tojlanej eb tzet max man yetok ch'en hierro watx'nebilxa, yetok casia c'al canela. 20Ata bay Dedán chi tit juntzan k'ap can tojol chi oc yiban ẍila no chej. 21A eb aj Arabia, yetokc'al masanil eb yajaw yayji bay Cedar max tojlanej tzet max man yetok no yune' calnel, no icham calnel c'al yetok no chiwo. 22Eb txonjom aj Sabá, c'al eb aj Raama, max tojlanej eb tzet max man yetok perfume caw wal watx', yetok ch'en ch'en manxa watx'ilok yili, c'al yetok ch'en oro. 23A eb aj conob bay Harán, c'al masanil eb aj Media, a ton eb tu' chi manji bay tu'. 24Chi tojlanej eb tzet chi man tu' yetok pichilej watx' yili, yetok an k'ap púrpura, yetok k'ap tz'isbil oc yelbub, yetok alfombra xiwil is tz'ibil, c'al yetok lasu caw wal watx' tx'umlayi. 25Mimek barco chi ikon ec' tzet yetal chi man eb c'al tzet yetal chi txon eb.
Lajan ok yun conob Tiro axca junok te barco caw wal al yikatz chi ec' yiban a' mar.
26A eb chi mak'on bey barco, najattac'al chi yitok eb te' yiban a', axa pax cak'ek' chi tit bay yetc'ulal yichcan, a' chi mak'on poj te' bay yiban a' tu'.
27A yet chi etaxtok te' chi tojcan jantak beyomal, c'al txon, yetokc'al masanil tzet yetal ay, bay yich a' mar. Chi toj c'apax can eb chi ion bey te', yetok eb chi aon oc nipil, yetokc'al eb txonjom, yetok eb soldado, yetok juntzanxa eb ayic' yul te', bay yich a' tu'.
28A eb ayic' tilak a' tu', chi yab eb yel yaw eb mulnajwom yin te' lanan paxay eb yich a'.
29A eb chi mak'om bey juntzanxa te barco, chi aytek eb yul is barco tu'. A eb chi ion bey te' tu', chi oc waan eb ti a' mar.
30Caytu' ok yun yaj wal nuk' eb anima yok' yuj cusc'ulal yuj conob Tiro. Ok yaajtok eb pokok yiban jolom, cax ok balon ec' ba eb xol tik'ak'il tan.
31Yuj wali, ok tzukon el eb xil jolom, cax ok pichon ba eb yetok el pichilej, ok ok' eb yin mimek cusc'ulal.
32Ok bitnelay bit yet camich yiban. Ok al-lay yin cusc'ulalil axca ti': Tzetto wal conobal ok je' lajban ba yetok Tiro, a ton jun conob ak'bil lajwok ay xol a' mar.
33A wal yet max toj txon bay yiban a' mar, max yitok tzet yetal ay yopiso yuj juntzanxa nación. Caw wal max aj can beyombi eb reyal yulyibank'inal ti' yuj.
34A tinani', mayal lajwi ay yul a' mar. Atac'al bay yich a' max tojcanok; masanil tzetak yetal ibil oc yuj, yetokc'al eb max mulnaj bay, max tojcan eb masanil bay yich a'.
35Masanil nacionlak bay tilak a' mar, toxac'al chi c'ayaj c'ul eb yuj. Eb is reyal eb, toxac'al chi xiwaj eb, txequelxac'al yili oc sat eb yuj xiwc'ulal.
36A wal yet ok yilon oc eb txonjom bay juntzanxa nacionlak, toxac'al ok buchwaj eb yin. Tol ayxamay xiwc'ulalil max lajwi ayok, c'amxa yechel okto ayjok ec'ok, cachi, ẍi Jehová.
Currently Selected:
Ez 27: ATBYK89
Highlight
Copy
Compare
Share
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
