Ez 18
18
A mactxel chi oc is mul, a' chi cami
1Max k'anjab Jehová ayin max yalon axca ti': 2¿Tzet yuj xan ac'ala' e yalubtanen jun k'anej yin conob Israel: A eb mamej chi lo' eb paj uva, axa eb uninalej jululixac'al toj yichlak ye eb? quex chi. 3Ayin wal caw Jehová Yajaw in chi wala' tol a jun k'anej tu', c'amxa yechel ok e yalubtanej ayex Israel ex ti'. 4Yujtol wet yayji masanil anima, eb mamej c'al eb uninalej c'apaxok. A mactxel chi oc is mul, a' chi cami.
5K'inalok ta ay junok winak tojol is nabal, tojolc'al tzet chi yunej. 6C'am chi oc yetok eb chi chaon k'in bay jolomlak witz yet chi oc eb ayilal bay yechelej. C'am chi yaoc eb is lek'ti diosal eb yet israelal tu' yipok c'ul. C'am chi mulji yetok yistzil yet animail, cax c'am chi junanej ba yetok yistzil yet ayoc ix yin is bisbal xajaw. 7C'am chi yetnej junok yet animail. A ti' yet tol chi yak' meltzoj is majanbilal tumin bay eb ay tzet chi majanej bay. C'am chi yelk'anej is tzet yetal junok mactxel. Chi yak' is lobej eb c'am is lobej, cax chi yak'on is pichil mac c'am is pichil. 8C'am chi yak' ch'en tumin yin majanil yin k'anon el miman yuca'. C'am chi yetnej junok yet animail. Caw wal watx' chi yun watx'nen el junok k'anej yiban cawanok ay owal xol. 9Chi yi wal aj can yiken axca yalon in ley, c'al in chekbanil. A junok winak axca tu', wal yel tojol ton yayji oc yin is beybal, ayin wal caw Jehová in chi wala' tol ok najatilbok is k'inal.
10K'inalok ay junok is c'ajol jun winak tu', caw wal yaxc'ayinak, ma mak'om cam anima chi eloc xin. Chi beybalnej juntzan tzet yetal 11maj beybalnej is mam. A ti' yet, chi cha' k'in bay jolomlak witz, c'al yoc ayilal bay yechelej, c'al mulji yetok yistzil yet animail. 12Chi yetnen eb meba', c'al eb ok'bal c'ul yayji yuj is cawxinakil. Chi elk'an bay eb anima, c'am chi yak' pax is majanbilal tumin bay eb chi oc majan bay. Asanxanej is lek'ti' diosal tu' chi yaoc yipok is c'ul, cax chi yunenc'al tzet yetal tol yajbejtak in satak. 13Chi yak' tumin majanil yin k'anon el miman yuca'. A jun anima axca tu', c'amxa chi je' yiquisbi ec'ok. Yujtol max yun masanil juntzan tzet yetal tol chin yaj tu', ok cam yin tol c'amxac'al yabenc'ulal. A is camichal tu', ac'al oc yiban chi cancanok.
14Talaj c'uxan ay junok is c'ajol jun yob beybal tu', max ilon yunen masanil juntzan tzet yetal max yun is mam tu', palta c'am chi tzakloj yintak is beybal tu'. 15C'am chi chawi k'in bay jolomlak witz yet chi oc ayilal bay yechelej, tamwal chi yaoc is nabal yin lek'ti diosal eb yet israelal. C'am chi mulji yetok yistzil yet animail. 16C'amc'al junok mac chi yetnej. C'am junok tzet yetal chi k'ancan ec' bay eb chi oc majan tumin bay. C'am chi elk'ani. A ti' yet tol chi yak' is lobej eb c'am is lobej, cax chi yak'on is pichil eb c'am is pichil. 17C'am junok mactxel chi yetnej; c'am chi yak' tumin majanil yin k'anon el miman yuca', tol chi yikej in ley, cax chi beybalnen axca yalon in chekbanil. A jun anima axca tu', man ok cam yuj is mul is mam; a ti' yet, ok najatilbok is k'inal. 18Axa is mam tu' ok cam yuj is mul tu', yujtol etnem anima, elk'om, caw wal yob tzet max yun yul is conobal.
19Ayex ti' ok e k'anlej axca ti': ¿Tzet yuj xan c'am chi tojlanej el eb c'ajolej mul is mam? quex chi mi. Ta a c'ajol tu' asan tzet yetal watx', c'al tojolal chi yunej, cax chi yikeni, c'al beybalnen in ley, yuj wal tu' xan ok iquisbokc'al ec'ok. 20A mac chi oc is mul, a' ok camok. C'am chi tojlanej el eb uninalej mul is mam, tamwal eb mamej chi tojlanen el mul yuninal. A mac tojol, ok cha' paktzil is tojolal; axa mac yobtakwom, ok cha' paktzil is yobtakwomal tu'.
Tojol yayji oc is beyc'ulal Jehová
(Ez 33.10-20)
21Ta a jun yobtakwom chi pojil ba yin masanil yobtakil chi yunej, cax chi yiken masanil in ley, c'al beybalnen tojolal, wal yel a jun tu', man ok camok. 22Ayin ti', manxa ok in natek masanil yobtakil max yun tu', axa najatilbi is k'inal yujtol a tojolal chi yunej. 23Ayin wal caw Jehová in chi wala', tol c'am chi wochej tol chi cam eb yobtakwom, palta chi wochej tol chi q'uex eb is beybal cax chi iquisbi ec' eb.
24Palta ta a jun tojol chi yut ba, chi bekcan yunen tojolal, cax chi yunen masanil tzet yetal yajbejtak chi yun eb yobtakwom, ¿ok mi iquisbokc'al ec' jun tu' che na? C'amak. Tokwal okto in natek tzet yetal watx' max el yunen tu'. Asan tol chi cam yuj yobtakil chi el yuneni. 25Ok mi e yal ayex ti' tol man tojolok yayji oc tzet chi wunej. Palta xin, abek ex conob Israel: Chi mi e na' tol manak yayji tzet chi wunej; palta man cayok tu', ayex che yun man tojolalok. 26Ta a jun anima watx' is nabal chi bekcan yunen watx'il cax chi yunen yobtakil, ok cam yuj yobtakil chi yun tu'. 27Palta ta a junok yobtakwom chi pojil ba yin is yobtakil, cax chi yunen watx'il c'al tojolal, chito colchajcan elok. 28Ta chi jay is nabal cax chi pojon el ba yin yobtakil tu', wal yel man ok cam yuj is yobtakilal tu'.
29Axa ayex conob Israel ex ti', ok e yala' tol manak yayji oc in beyc'ulal. Tokwal ayin manak yayji oc in beyc'ulal. ¿May ex minak ayex ti' manak yayji oc e beyc'ulal? 30Ayin wal caw Jehová Yajaw in chi wala', tol ok ex in beyc'ulnej el junjun ex, atac'ala' e yunben. Bekekcan yin junelnej e yob beybalil, naek e ba. Ta c'amak, a e yob beybalil tu' ok ex ak'on c'ayilok. 31Pojek el e ba yin masanil e yobc'ulalil max e yun xin, cax ac'xa che yut e nabal c'al e beybal. Ex conob Israel, ¿tzet yuj xan ok ex camok? 32Ayin wal caw Jehová in chi wala', tol c'am chi wochej tol ay mac chi cami. Pojek el e ba yin yobtakil xin, cax chex iquisbic'al ec'ok, ẍi Cham.
Currently Selected:
Ez 18: ATBYK89
Highlight
Copy
Compare
Share
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
