Ex 27

Jun altar tol bronce

(Ex 38.1-7)

1Watx'jokokab junok altar yetok te acacia, lajanc'al chi yun is yechel is can paq'uil, cab metro yetok 25 centímetro junjun pac', jun metro yetok 25 centímetro chi yun yaj is tel. 2Cax chi watx'ji aj junjun is yuc'a' bay junjun is txiquinlak. A juntzan ti' junnejc'al chi yun yetok jun altar tu'; chi oc c'apax bronce yin altar tu'. 3A masanil jantak mitx'k'abej bay altar, bronceokabc'al elok: axca net bay chi ay tik'ak'il tan, c'al pala, yetok mimek sec', yetok ch'en tenedor, c'al yetok netal bay chi ay tzak'ak'. 4Chi watx'ji c'apax junok rejail naba bronce, cax chi oc junjun argolla bronce yin junjun yesquinail jun reja tu'. 5Cax chi oc bay yalan is tilak altar bay yiban, asan bay is nan jun altar tu' chi apni jun reja tu'. 6Cax chi watx'ji c'apax juntzanok is batxbanil jun altar tu'; a te acacia chi oc yin, chi lajwi tu', cax chi oc bronce yin. 7A te batxbanil tu', yowalil chi eq'uel te' yul ch'en argolla ayoc yin jun altar tu'. A yet chi ilaytok altar, cax chi jul-lay ec'tok junjun te batxbalej bay junjun pac'. 8A jun altar tu', chemte' chi oc yin, olan chi yuncan yul, axca yayji yechel chin tx'ox ayach bay jolom witz ti'.

Is yamak'il is cajlobal Dios

(Ex 38.9-20)

9Watx'jokokab an cortina lino caw wal watx' tx'umbil, yet chi oc oyan is makilok amak' ay yinlak in cajlobal ti'. A bay jun pac' yetc'ulal sur, ay 45 metro chi yun toj t'inan an cortina tu'. 1020 oy chi oqui, 20 c'apax batxlubal naba bronce chi ay yichok, axa is ganchoal yetok makil chon oy chi oc xin, naba plataokabc'al elok. 11Cay c'apax tu' bay yetc'ulal norte, yowalil chi oc c'apax an cortina yin masanil is k'atil tu'; 45 metro yayji, 20 c'apax yoyal chi oqui, yetok 20 is batxlubal tu' naba bronceokabi, yetokc'al is ganchoal, c'al yetok makil chon oy naba plata. 12Axa bay yetc'ulal yayubc'u xin, a an cortina chi oc yin, 22 metro is sat yetok nan, yetok lajoneb yoyal, c'al yetok lajoneb batxlubal oy tu'. 13Cay c'apax tu' bay yetc'ulal bay chi ajol c'u, bay jun amak' tu', ay c'apax an cortina ok oc yin, a is sat, 22 metro yetok nan. 14A bay jun pac' ti amak' tu', ay ukeb metro an cortina chi oqui, yetok oxeb yoyal, c'al yetok oxeb batxlubal oy tu'. 15Ac'ala' c'apax bay jun pac'xa ti', ay c'apax ukeb metro an cortina chi oqui yetok oxeb oy, c'al oxeb batxlubal oy tu'. 16Ac'ala' bay ti' amak' tu', yowalil chi oc c'apax an cortina chembil yetok yax tx'al, an tx'al púrpura, c'al an cak tx'al, c'al lino watx', tol tx'umbil, nan is baloneb metro is sat, chi tz'islay c'apax oc is yelbub yuj junok jelan tz'isoni; caneb c'apax yoyal yetok caneb batxlubal oy tu'. 17Masanil oy yinlak amak' tu', chi oc plata makilok chon, c'al gancho chi oc yin, plata c'apaxok. Axa pax batxlubal xin, bronce toni. 18A jun amak' tu', ay 45 metro is k'atil, axa is sat, ay 22 metro yetok nan, lajanc'al is ca paq'uil. Axa pax is tel an an cortina ayaj can xin, ay cab metro yetok 25 centímetro. Axa an an cortina chi oc yin xin, a ton lino watx' tx'umbil, axa batxlub oy tu' naba bronce. 19Masanil mitx'k'abej ok k'anabax bay in cajlobal, bronceokab c'al elok, cay c'apax tu' masanil is yestacail, yetokc'al estaca ayoc bay amak' tu'.

Aceite yet candil

(Lv 24.1-4)

20Al bay eb et israelal tol chi yitek eb aceite watx' chi el yin sat te olivo, yet watx' ayc'al oc k'ak'al candil. 21A Aarón, yetok eb is c'ajol ayoc yiban yin watx'nen oc k'ak'al candil tu', yet watx' tzekanokabc'al oc k'ak'al in satak yet chi ec' ak'bal bay yul mantiado, bay chin chalej in ba e yetok, bay satak eltek an an cortina ayoc yenelok te caẍail in trato. A jun ti', junelnej tol ley chi yuncan e xol ayex israel ex ti', yetokc'al bay e yinatil.

Currently Selected:

Ex 27: ATBYK89

Highlight

Copy